ಗೋದಾಮಿನಲ್ಲಿದ್ದ 3 ಲಕ್ಷ ಮೌಲ್ಯದ ಅಡಕೆ ಕಳವು

ದಾವಣಗೆರೆ: ಚನ್ನಗಿರಿ ತಾಲೂಕು ಕಾಶೀಪುರ ಕ್ಯಾಂಪ್‌ ಗ್ರಾಮದ ವಿ.ಎಸ್‌. ವೆಂಕಟರಾವ್‌ ಗೋಡೌನ್‌ನಲ್ಲಿ ಮಂಗಳವಾರ ಗೋದಾಮಿನಲ್ಲಿಟ್ಟಿದ್ದ 3.30 ಲಕ್ಷ ರೂ. ಮೌಲ್ಯದ ಸುಲಿದ ಅಡಕೆಯ 16 ಚೀಲಗಳನ್ನು ಕಳ್ಳತನ ಮಾಡಿರುವ ಘಟನೆ ನಡೆದಿದೆ.

ರೈತರು ಬೆಳೆದಂತಹ ಕೃಷಿ ಉತ್ಪನ್ನಗಳ ಮೇಲೆ ರೈತರಿಗೆ ಬ್ಯಾಂಕುಗಳು ಸಾಲ ಕೊಟ್ಟು, ಹಳ್ಳಿಗಳ ಗೋದಾಮಿನಲ್ಲಿ ದಾಸ್ತಾನು ಮಾಡುವುದು ವಾಡಿಕೆ. ಅದೇ ರೀತಿ ಕಾಶೀಪುರ ಕ್ಯಾಂಪ್‌ನಲ್ಲಿ ವಿ. ಸೀತಮ್ಮ ಎಂಬುವರ ಅಡಕೆ ಚೀಲವನ್ನು ಗೋದಾಮಿನಲ್ಲಿ ದಾಸ್ತಾನು ಮಾಡಲಾಗಿದ್ದು, ಖಾಸಗಿ ಕಂಪನಿ ಹಾಲೇಶ್‌ ಎಂಬುವರಿಗೆ ವಹಿಸಿ ಭದ್ರತೆ ಒದಗಿಸಿತ್ತು.

ಒಂದು ಚೀಲ 75 ಕೆಜಿ ಇದ್ದು, ಗೋದಾಮಿನ ಕಿಟಕಿಯ ಹಿಂಭಾಗದ ಕಬ್ಬಿಣದ ಸರಳುಗಳನ್ನು ಕಳ್ಳರು ಕಟ್‌ ಮಾಡಿ 16 ಚೀಲ ಅಡಕೆ ತೆಗೆದುಕೊಂಡು ಹೋಗಿದ್ದಾರೆ. ಸಂತೆಬೆನ್ನೂರು ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.