ಅಶೋಕ ಟಾಕೀಸ್‌ ರೈಲ್ವೆ ಮೇಲ್ಸೇತುವೆ ನಿರ್ಮಾಣ

ದಾವಣಗೆರೆ: ಚುನಾವಣೆ ನಿಮಿತ್ತ ದಾವಣಗೆರೆ ಉತ್ತರ ವಿಧಾನಸಭಾ ಕ್ಷೇತ್ರದ ಪ್ರಣಾಳಿಕೆಯನ್ನು ಬಿಜೆಪಿ ಮುಖಂಡ ಶಿವಯೋಗಿಸ್ವಾಮಿ ನಗರದ ಪ್ರೆಸ್‌ಕ್ಲಬ್‌ನಲ್ಲಿ ಭಾನುವಾರ ಬಿಡುಗಡೆ ಮಾಡಿದರು.

ನಂತರ ಮಾತನಾಡಿದ ಅವರು, ಉತ್ತರದ ಬಡಾವಣೆಯ ರಸ್ತೆಗಳ ಅಭಿವೃದ್ಧಿ, ಪಾದಚಾರಿ ಮಾರ್ಗ, ಮಳೆ ನೀರು ಹರಿಯಲು ರಾಜಕಾಲುವೆ ಒತ್ತುವರಿ ತೆರವು, ಕ್ಷೇತ್ರದ ಎಲ್ಲಾ ಪಾರ್ಕ್‌ಗಳಲ್ಲಿ ಉತ್ತಮ ದರ್ಜೆಯ ಸಸಿಗಳೊಂದಿಗೆ ಹಸಿರೀಕರಣ ಮತ್ತು ನೀರಿನ ವ್ಯವಸ್ಥೆ, ರಸ್ತೆ ಬದಿಯಲ್ಲಿ ಪರಿಸರ ಸ್ನೇಹಿ ಮರಗಳನ್ನು ಬೆಳೆಸಲಾಗುವುದು ಎಂದರು.

ಹಂದಿಗಳ ಸ್ಥಳಾಂತರ ಮತ್ತು ಸಮರ್ಪಕ ಕಸವಿಲೇವಾರಿಗೆ ಅಗತ್ಯ ಕ್ರಮ ವಹಿಸಲಾಗುವುದು. ಇ ಟಾಯ್ಲೆಟ್‌, ಜಲ ಸಿರಿ ಯೋಜನೆ ಅನುಷ್ಠಾನ, ಕಳೆದ ನಾಲ್ಕು ವರ್ಷಗಳಿಂದ ನನೆಗುದಿಗೆ ಬಿದ್ದಿರುವ ಅಶೋಕ ಟಾಕೀಸ್‌ ರೈಲ್ವೇ ಮೇಲ್ಸೇತುವೆ ನಿರ್ಮಾಣಕ್ಕೆ ಕ್ರಮ, ಕಾಲಮಿತಿಯಲ್ಲಿ ಸ್ಮಾರ್ಟ್‌ ಸಿಟಿ ಯೋಜನೆ ಅನುಷ್ಠಾನ, ಹೈಟೆಕ್‌ ವಿದ್ಯಾರ್ಥಿ ನಿಲಯ, ಸ್ವಯಂ ಉದ್ಯೋಗ, ಉತ್ತಮ ಗುಣಮಟ್ಟದ ಶಿಕ್ಷಣ, ಮರಳು ಪೂರೈಕೆಗೆ ಅಗತ್ಯ ಕ್ರಮ.

ಮನೆ ಮನೆಗೆ ಪೈಪ್‌ಲೈನ್‌ ಮೂಲಕ ಗ್ಯಾಸ್‌ ಪೂರೈಕೆ, ನೂತನ ವಾಣಿಜ್ಯ ಸಂಕೀರ್ಣ ನಿರ್ಮಾಣ, ಕೊನೆ ಭಾಗದ ರೈತರ ಹೊಲಗಳಿಗೆ ಭದ್ರಾ ನೀರು, ಪ್ರಧಾನ ಮಂತ್ರಿ ಫಸಲ್‌ ಭೀಮಾ ಯೋಜನೆ, ಸಾಯಿಲ್‌ ಹೆಲ್ತ್‌ ಕಾರ್ಡ್‌ ವಿತರಣೆ ಮಾಡಲಾಗುವ ಅಂಶಗಳನ್ನು ಪ್ರಣಾಳಿಕೆಯಲ್ಲಿ ಸೇರಿಸಲಾಗುವುದು ಎಂದರು.

ಗೋಷ್ಠಿಯಲ್ಲಿ ಮುಖಂಡರಾದ ಎ.ಎಸ್‌.ವಸಂತಕುಮಾರ, ಜಗದೀಶ್‌, ಶಿವಶಂಕರ್‌, ಲಿಂಗರಾಜ್‌, ಜಯಣ್ಣ, ಹೇಮಂತ್‌ ಕುಮಾರ್‌, ಮಂಜಣ್ಣ ಸೇರಿದಂತೆ ಮತ್ತಿತರರಿದ್ದರು.

ಹಲ್ಲೆಗೆ ಖಂಡನೆ

ದುಗ್ಗಮ್ಮ ದೇವಸ್ಥಾನದ ಬಳಿ ಬಿಜೆಪಿ ಕಾರ್ಯಕರ್ತರ ಮೇಲೆ ನಡೆದಿರುವ ದೌರ್ಜನ್ಯ ಖಂಡನೀಯ. ಚುನಾವಣೆ ಸಮಯದಲ್ಲಿ ಯಾವುದೇ ಪಕ್ಷದ ಕಾರ್ಯಕರ್ತರು ಶಾಂತಿಯುತವಾಗಿ ಮತ ಪ್ರಚಾರ ಮಾಡಬೇಕು. ಶಾಂತಿ ಕಾಪಾಡುವುದು ಪೊಲೀಸರ ಕೆಲಸ ಮಾತ್ರವಲ್ಲ. ಅದು ಪ್ರತಿಯೊಬ್ಬರ ಜವಾಬ್ದಾರಿಯಾಗಿದೆ. ಇಂತಹ ಘಟನೆಗಳು ನಡೆದಾಗ ನಾಯಕರು ಬುದ್ದಿ ಮಾತನ್ನು ಹೇಳಬೇಕು. ಅದು ಬಿಟ್ಟು ಪ್ರಚೋದಿಸಬಾರದು ಎಂದು ಡಾ.ಎ.ಎಚ್‌. ಶಿವಯೋಗಿ ಸ್ವಾಮಿ ಹೇಳಿದರು.