ಬೆಟ್ಟಿಂಗ್‌: 5 ಆರೋಪಿಗಳಿಗೆ 6 ತಿಂಗಳು ಜೈಲು

ಹರಿಹರ : ಐಪಿಎಲ್‌ ಕ್ರಿಕೆಟ್‌ ಬೆಟ್ಟಿಂಗ್‌ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಗರದ 1ನೇ ಹೆಚ್ಚುವರಿ ಸಿವಿಲ್‌ ಹಾಗೂ ಜೆಎಂಎಫ್‌ಸಿ ನ್ಯಾಯಾಲಯ ಐವರು ಆರೋಪಿಗಳಿಗೆ 6 ತಿಂಗಳು ಜೈಲು ಶಿಕ್ಷೆ ಹಾಗೂ ತಲಾ 6 ಸಾವಿರ ರೂ. ದಂಡ ವಿಧಿಸಿ ಆದೇಶಿಸಿದೆ.

2013ರ ಮೇ 22ರಂದು ನಗರದ ಹಳೆ ಪಿ.ಬಿ. ರಸ್ತೆಯಲ್ಲಿರುವ ರಾಯಲ್‌ ಸ್ನೂಕರ್‌ ಪಾಯಿಂಟ್‌ ಮುಂಭಾಗ ಐಪಿಎಲ್‌ ಕ್ರಿಕೆಟ್‌ ಬೆಟ್ಟಿಂಗ್‌ ನಡೆಸುತ್ತಿದ್ದ ಯುವಕರ ಗುಂಪಿನ ಮೇಲೆ ಡಿಸಿಐಬಿ ವಿಭಾಗದ ಅಂದಿನ ಅಧಿಕಾರಿ ಪಂಪಾಪತಿ ದಾಳಿ ನಡೆಸಿ ನಗರದ ಪವನ್‌ಕುಮಾರ್‌ ಭೂತೆ ಹಾಗೂ ಮಲೆಬೆನ್ನೂರಿನ ಅಶೋಕ್‌ ಕುಮಾರ್‌ರನ್ನು ಬಂಧಿಸಿ, 26,100 ರೂ. ನಗದು, 5 ಮೊಬೈಲ್‌ ಫೋನ್‌ ಹಾಗೂ ಒಂದು ಬೈಕ್‌ ವಶಪಡಿಸಿಕೊಂಡಿದ್ದರು.

ಇವರು ಬಾಜಿ ಕಟ್ಟಿಸಿಕೊಂಡು ಸಂಗ್ರಹಿಸಿದ ಹಣವನ್ನು ರಾಘವೇಂದ್ರ ಕಬಾಡೆ, ವೈದ್ಯನಾಥ್‌ ಕಬಾಡೆ ಹಾಗೂ ವಿನಾಯಕ ಕಬಾಡೆಗೆ ಕೊಡುತ್ತಿರುವುದಾಗಿ ಬಾಯಿಬಿಟ್ಟಿದ್ದರು. ವಿಚಾರಣೆ ಮುಗಿಸಿ ನ್ಯಾಯಾಲಯಕ್ಕೆ ಪೊಲೀಸರು ಚಾರ್ಜ್‌ಶೀಟ್‌ ಸಲ್ಲಿಸಿದ್ದರು.

ಆರೋಪ ಸಾಬೀತಾಗಿದ್ದರಿಂದ ನ್ಯಾಯಾಧೀಶರಾದ ಸುಮಲತಾ ಬೆಣ್ಣೆಕಲ್‌ ಆರೋಪಿಗಳಿಗೆ 6 ತಿಂಗಳು ಸೆರೆವಾಸ, ತಲಾ 6 ಸಾವಿರ ರೂ. ದಂಡ, ದಂಡ ಪಾವತಿಸಲು ತಪ್ಪಿದ್ದಲ್ಲಿ ಹೆಚ್ಚುವರಿ 3 ತಿಂಗಳ ಸೆರೆವಾಸದ ಶಿಕ್ಷೆ ವಿಧಿಸಿ ಆದೇಶಿಸಿದರು. ಹಿರಿಯ ಸಹಾಯಕ ಸರಕಾರಿ ಅಭಿಯೋಜಕ ಮುರುಗೇಶ್‌ ಅಂಕದ್‌ ವಾದ ಮಂಡಿಸಿದ್ದರು.