ಹರಪನಹಳ್ಳಿ: ಚಿರತೆಗಳ ದಾಳಿಗೆ 25 ಕುರಿ, ಮೇಕೆ ಬಲಿ

ಹರಪನಹಳ್ಳಿ: ತಾಲೂಕಿನ ದಡಗಾರನಹಳ್ಳಿ ಗ್ರಾಮ ಸಮೀಪದ ಜಮೀನಿನ ಕೊಟ್ಟಿಗೆಯಲ್ಲಿದ್ದ ಕುರಿಮೇಕೆಗಳ ಮೇಲೆ ಗುರುವಾರ ತಡರಾತ್ರಿ ಎರಡ್ಮೂರು ಚಿರತೆ ದಾಳಿ ಮಾಡಿದ ಪರಿಣಾಮ 25 ಕುರಿಮೇಕೆಗಳು ಬಲಿಯಾಗಿದ್ದು, ಕುರಿಗಾಯಿಗಳು ಭಯಭೀತರಾಗಿದ್ದಾರೆ.

ರಾತ್ರಿ ಸಮಯದಲ್ಲಿ ಕೊಟ್ಟಿಗೆಗೆ ನುಗ್ಗಿದ ಚಿರತೆಗಳು ದಾಳಿ ಮಾಡಿ ಕೊಟ್ಟಿಗೆಯಲ್ಲಿದ್ದ ಮೂರು ತಿಂಗಳ 18 ಕುರಿ ಮರಿಗಳು ಮತ್ತು 7 ಮೇಕೆಗಳನ್ನು ಬಲಿ ಪಡೆದಿವೆ. ದಾಳಿಯ ತೀವ್ರತೆಗೆ 20 ಕುರಿಮೇಕೆಗಳು ಸತ್ತಿವೆ. ಐದು ಮರಿಗಳನ್ನು ಚಿರತೆಗಳು ತಿಂದು ಹಾಕಿದೆ.

ಮೇಕೆ ಕೂಡಿ ಹಾಕಿದ್ದ ಕೊಟ್ಟಿಗೆ ಬಳಿ ಬೆಳಗ್ಗೆ ಕುರಿಗಾಯಿ ರಾಜಪ್ಪ ಹೋದಾಗ ಮೇಕೆಗಳು ಸತ್ತು ಬಿದ್ದಿರುವುದನ್ನು ಗಮನಿಸಿದ್ದಾರೆ. ಈ ಕುರಿಮೇಕೆಗಳು ಹೊಳಲು ಗೋಣೆಪ್ಪ ನಿಂಗಪ್ಪ, ಹೊಳಲು ಗೋಣೆಪ್ಪ ದೊಡ್ಡಗೋಣೆಪ್ಪ, ರಾಜಪ್ಪ ಬಂಡ್ರಿ ಚಿಕ್ಕಪ್ಪ ಎಂಬುವರಿಗೆ ಸೇರಿದ್ದಾಗಿವೆ.


ದುಕಿಗೆ ಆಸರೆಯಾಗಿದ್ದ ಕುರಿ ಮೇಕೆಗಳು ಚಿರತೆಗಳ ದಾಳಿಗೆ ಮೃತಪಟ್ಟ ಹಿನ್ನೆಲೆಯಲ್ಲಿ ಕುರಿ ಕಾಯುವವರು ಚಿಂತೆಗೊಳಗಾಗಿದ್ದಾರೆ. ರಾಜ್ಯ ಸರಕಾರ ನಮಗೆ ಪರಿಹಾರ ನೀಡಬೇಕೆಂದು ಅಧಿಕಾರಿಗಳ ಹತ್ತಿರ ರಾಜಪ್ಪ ಬೇಡಿಕೊಂಡರು.

ಈ ಸುದ್ದಿ ತಿಳಿದು ತಾಲೂಕಿನ ದಡಗಾರನಹಳ್ಳಿ, ಕಾಯಕದಹಳ್ಳಿ, ಶೃಂಗಾರತೋಟ, ಬಾಗಳಿ, ಕೂಲಹಳ್ಳಿ, ಕೋಡಿಹಳ್ಳಿ, ಕಣವಿಹಳ್ಳಿ ಸೇರಿ ಸುತ್ತಲ ಗ್ರಾಮಗಳ ರೈತರು, ಹೊರಗಡೆ ಬರಲು ಭಯ ಪಡುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಸ್ಥಳಕ್ಕೆ ಅರಣ್ಯ ಇಲಾಖೆ ಗಾರ್ಡ್‌ ರಾಘವೇಂದ್ರ ಭೇಟಿ ನೀಡಿ ಪರಿಶೀಲನೆ ನಡೆಸಿ, ಈ ವಿಷಯವನ್ನು ಮೇಲಧಿಕಾರಿಗಳ ಗಮನಕ್ಕೆ ತಂದು ಪರಿಹಾರ ವಿತರಣೆಗೆ ಕ್ರಮಕೈಗೊಳ್ಳಲಾಗುವುದು ಎಂದು ತಿಳಿಸಿದರು.

ಪಶುವೈದ್ಯಾಧಿಕಾರಿ ಡಾ.ಶ್ರೀದೇವಿ ಸ್ಥಳಕ್ಕೆ ಭೇಟಿ ನೀಡಿ ಕುರಿ ಮತ್ತು ಮೇಕೆಗಳ ಪರೀಕ್ಷೆ ನಡೆಸಿದರು.