ಭರಣಿ ಮಳೆಗೆ ಇಳೆ ತಂಪು

ನ್ಯಾಮತಿ: ಪಟ್ಟಣದಲ್ಲಿ ಸೋಮವಾರ ಮಧ್ಯಾಹ್ನ ಗುಡುಗು ಸಿಡಿಲು ಆರ್ಭಟದೊಂದಿಗೆ ಭರಣಿ ಮಳೆ ಸುರಿಯಿತು. ಬಿಸಿಲಿನ ಬೇಗೆಯಿಂದ ಬೇಸತ್ತು ಹೋಗಿದ್ದ ಜನರಿಗೆ ಮಳೆ ತಂಪಿನ ಅನುಭವ ನೀಡಿತು.

ಬೆಳಗ್ಗೆಯಿಂದ ಮೋಡ ಕವಿದ ವಾತಾವರಣ ಇತ್ತು. ಜತೆಗೆ ಅತಿಯಾದ ದಗೆ, ಬಿಸಿಲಿನ ತಾಪಕ್ಕೆ ಜನರಿಲ್ಲದೆ ರಸ್ತೆಗಳು ಖಾಲಿಯಾಗಿದ್ದವು. ಮಧ್ಯಾಹ್ನ 3.30ರ ಸುಮಾರಿಗೆ ಅಲ್ಲಲ್ಲಿ ಕಪ್ಪಿಟ್ಟ ಮೋಡಗಳು ಕರಗಿ ಹನಿಗಳಾಗಿ ರಸ್ತೆ ಹಸಿ ಮಾಡಿದವು. ಅರ್ಧ ಗಂಟೆ ಸುರಿದ ಮಳೆಗೆ ರಸ್ತೆಗಳಲ್ಲಿ ನೀರು ಹರಿಯಿತು.

ಇದೆಲ್ಲದರ ನಡುವೆಯೂ ಅರ್ಧ ಗಂಟೆ ಸುರಿದ ಮಳೆಯಿಂದಾಗಿ ಬಿಸಿಲ ಬೇಗೆಯಿಂದ ತತ್ತರಿಸಿದ್ದ ಜನತೆಗೆ ತಾತ್ಕಾಲಿಕ ತಂಪಿನ ಅನುಭವ ದೊರೆಯಿತು. ಪಟ್ಟಣದಲ್ಲಿ ಬಾಲಕರು ಮಳೆಯಲ್ಲಿ ನಿಂತು ಕುಣಿದಾಡಿದ್ದು ಕಂಡುಬಂತು.