ಕರೆಂಟ್‌ ಕಟ್‌ಗೆ ನೀರಿಲ್ಲದೆ ಒಣಗಿದ ಭತ್ತ ಬೆಳೆ!

ಹರಿಹರ : ನದಿ ದಡದಲ್ಲಿದ್ದರೂ ವಿದ್ಯುತ್‌ ಸಮಸ್ಯೆಯಿಂದ ಸಮರ್ಪಕವಾಗಿ ನೀರು ಸರಬರಾಜು ಮಾಡಲಾಗದೆ ಇಬ್ಬರು ಸಹೋದರರ 7 ಎಕರೆ ಭತ್ತದ ಬೆಳೆ ಒಣಗಿರುವ ಘಟನೆ ತಾಲೂಕಿನ ರಾಜನಹಳ್ಳಿ ಗ್ರಾಮದಲ್ಲಿ ನಡೆದಿದೆ.

ಚನ್ನಬಸಪ್ಪ ಗೌಡ್ರು ಮತ್ತು ರಾಮಕೃಷ್ಣ ಗೌಡ್ರು ಸಹೋದರರು ಒಟ್ಟು ಏಳು ಎಕರೆ ಪ್ರದೇಶದಲ್ಲಿ ಭತ್ತದ ಬೆಳೆ 4 ತಿಂಗಳ ಹಿಂದೆ ಬೆಳೆದಿದ್ದರು. ಇವರಿಗೆ ಸೇರಿದ ಎರಡು ಪಂಪ್‌ಸೆಟ್‌ಗಳಿವೆ. ಪ್ರತಿ ಬಾರಿಯಂತೆ ಇವರು ನದಿಯಲ್ಲಿನ ನೀರು ಆಶ್ರಯಿಸಿದ್ದಾರೆ.

ಎರಡು ಪಂಪ್‌ಸೆಟ್‌ಗಳಿಂದ ನೀರು ಹರಿಸಿದರೂ ಇವರ ಜಮೀನಿಗೆ ಆ ನೀರು ಸಾಲದಾಯಿತು. ಪರಿಣಾಮವಾಗಿ ಕಣ್ಣೆದುರೆ ಕಷ್ಟಪಟ್ಟು ಬಿತ್ತನೆ ಮಾಡಿ, ಪೋಷಿಸಿದ ಭತ್ತದ ಬೆಲೆ ಒಣಗಿ ಹೋಗಿದೆ.

8 ಗಂಟೆ ವಿದ್ಯುತ್‌ ಸಾಲದು:

ಒಂದು ದಿನಕ್ಕೆ ಬೆಸ್ಕಾಂನವರು ಪಂಪ್‌ಸೆಟ್‌ಗಳಿಗೆ 8 ಗಂಟೆ ನೀರು ಕೊಡುತ್ತಾರೆ. ಅದೂ ನಿರಂತರವಾಗಿರಲ್ಲ. ಮಧ್ಯ ವ್ಯತ್ಯಯವಾಗುತಿರುತ್ತದೆ. ಹೀಗಾಗಿ ಇವರಿಗೆ ಸಮರ್ಪಕವಾಗಿ ನೀರು ಸಿಗಲಿಲ್ಲ ಎಂದು ನಷ್ಟಕ್ಕೀಡಾದ ರೈತರು ಹೇಳಿದರು. ಈ ಕುರಿತು ಇವರು ಸ್ಥಳ ಪರಿಶೀಲನೆ ಹಾಗೂ ಪರಿಹಾರಕ್ಕಾಗಿ ತಹಸೀಲ್ದಾರ್‌ ಹಾಗೂ ಸಹಾಯಕ ಕೃಷಿ ನಿರ್ದೇಶಕರಿಗೆ ಗುರುವಾರ ಅರ್ಜಿ ನೀಡಿದ್ದಾರೆ. ಅವರು ಜಮೀನಿಗೆ ಭೇಟಿ ನೀಡಿ ಮುಂದಿನ ಕ್ರಮ ಕೈಗೊಳ್ಳುವ ಭರವಸೆ ನೀಡಿದ್ದಾರೆ.

ಅಂದಾಜು 2 ಲಕ್ಷ ರೂ. ಖರ್ಚು ಮಾಡಿದ್ದೆವು. ಹರಿಸಿದ ನೀರು ಸಾಕಾಗಲಿಲ್ಲ. ಈ ಹಿಂದೆ ಸಿಎಂ ಕುಮಾರಸ್ವಾಮಿಯವರು ಪಂಪ್‌ಸೆಟ್‌ಗಳಿಗೆ 10 ಗಂಟೆ ವಿದ್ಯುತ್‌ ಹರಿಸಲು ಕ್ರಮಕೈಗೊಳ್ಳುತ್ತೇವೆ ಎಂದು ನೀಡಿದ್ದ ಭರವಸೆ ಆಧರಿಸಿ 7 ಎಕರೆ ಭತ್ತ ಬಿತ್ತನೆ ಮಾಡಿದ್ದೆವು. ಆದರೆ ನಾವು ನಷ್ಟಕ್ಕೀಡಾದೆವು.
-ಚನ್ನಬಸಪ್ಪಗೌಡ್ರು, ರೈತ, ರಾಜನಹಳ್ಳಿ.

ಇವರು ಸಾಲ, ಸೂಲ ಮಾಡಿ ಬಿತ್ತನೆ ಮಾಡಿದ್ದರು. ಭತ್ತ ಒಣಗಲು ಆರಂಭಿಸಿದಾಗ ಇವರ ಕುಟುಂಬದವರು ಮನೆಯಿಂದ ಹೊರಕ್ಕೆ ಬರುತ್ತಿರಲಿಲ್ಲ. ಧೈರ್ಯ ತುಂಬಿ ಪರಿಹಾರ ಕೋರಿ ಅರ್ಜಿ ಸಲ್ಲಿಸಿದ್ದೇವೆ. ಕಂದಾಯ ಮತ್ತು ಕೃಷಿ ಇಲಾಖೆಯವರು ತುರ್ತಾಗಿ ಇವರ ಸಹಾಯಕ್ಕೆ ಬರಬೇಕಿದೆ.
- ಪರಶುರಾಮ ಹಾವಗಾರ್‌, ರೈತ ಸಂಘದ ಮುಖಂಡ, ರಾಜನಹಳ್ಳಿ.