ಕೌಟುಂಬಿಕ ಕಲಹ: ಮಕ್ಕಳ ಜತೆ ದಂಪತಿ ಆತ್ಮಹತ್ಯೆ

ದಾವಣಗೆರೆ: ಒಂದೇ ಕುಟುಂಬದ ನಾಲ್ವರು ವಿಷ ಸೇವಿಸಿ ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಚನ್ನಗಿರಿ ತಾಲೂಕಿನ ಬೆಳಲಗೆರೆ ಗ್ರಾಮದಲ್ಲಿ ನಡೆದಿದೆ. ಕೌಟುಂಬಿಕ ಕಲಹವೇ ಈ ಆತ್ಮಹತ್ಯೆಗೆ ಕಾರಣ ಎಂದು ಶಂಕಿಸಲಾಗಿದೆ.

ಫಾಲಾಕ್ಷಿ (34) ಮತ್ತು ಶಶಿಕಲಾ (28) ದಂಪತಿ ಹಾಗೂ ಏಳು ವರ್ಷದ ಪುತ್ರ ಕಾರ್ತಿಕ್, ಆರು ವರ್ಷದ ಪುತ್ರಿ ವರ್ಷಿಣಿ ಆತ್ಮಹತ್ಯೆ ಶರಣಾದವರು. ಬೆಳಗ್ಗೆ ಸಂಬಂಧಿಕರು ಬಾಗಿಲು ತೆರೆದಾಗ ವಿಚಾರ ಗೊತ್ತಾಗಿದೆ. ಘಟನೆ ಸ್ಥಳಕ್ಕೆ ಬಸವಪಟ್ಟಣ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.

ಮೃತ ಫಾಲಾಕ್ಷಿ ನಿನ್ನೆ ಕುಟುಂಬ ಸಹಿತ ತಂಗಿ ಮನೆಗೆ ಹೋಗಿ ಗೌರಿ ಹಬ್ಬದ ಬಾಗಿನ ಕೊಟ್ಟು ಬಂದಿದ್ದರು. ಆರೋಗ್ಯ ಸರಿಯಿಲ್ಲ, ಆಸ್ಪತ್ರೆಗೆ ಹೋಗುತ್ತೇವೆ ಎಂದು ಹೇಳಿ ಬಂದಿದ್ದರು. ಮನೆಗೆ ವಾಪಸಾಗುವಾಗ ಕೇಕ್ ತಂದು ರಾತ್ರಿ ಅದಕ್ಕೆ ವಿಷ ಬೆರಸಿ ಮಕ್ಕಳೊಂದಿಗೆ ತಿಂದು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ಸಂಬಂಧಿಕರು ತಿಳಿಸಿದ್ದಾರೆ. ಇವರು ಇತ್ತೀಚೆಗೆ ಸಾಕಷ್ಟು ಸಾಲ ಮಾಡಿಕೊಂಡಿದ್ದರು, ಸಾಲ ತೀರಿಸುವ ಒತ್ತಡ ಇತ್ತು. ಇದು ಕೂಡ ಘಟನೆಗೆ ಕಾರಣ ಎಂದು ಸಂಬಂಧಿಕರು ತಿಳಿಸಿದ್ದಾರೆ.