50 ರೂ ಕ್ಯಾಶ್‌ಬ್ಯಾಕ್‌ಗಾಗಿ 71,889 ರೂ ಕಳೆದುಕೊಂಡ ಅತಿಥಿ ಉಪನ್ಯಾಸಕ

ದಾವಣಗೆರೆ: ಅತಿಥಿ ಉಪನ್ಯಾಸಕರೊಬ್ಬರ ಖಾತೆಯಿಂದ ಅಪರಿಚಿತರು 71,899 ರೂ.ಗಳನ್ನು ಡ್ರಾ ಮಾಡಿ ವಂಚಿಸಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಹರಿಹರ ವಿದ್ಯಾನಗರದ 12ನೇ ಕ್ರಾಸ್‌ನ ಸಿ ಬ್ಲಾಕ್‌ ನಿವಾಸಿ ಟಿ.ಜಿ. ರಾಘವೇಂದ್ರ ಹಣ ಕಳೆದುಕೊಂಡ ವ್ಯಕ್ತಿ.

ಇವರು ಗೂಗಲ್‌ ಪೇ ಮುಖಾಂತರ ವ್ಯವಹಾರ ಮಾಡುತ್ತಿದ್ದು, ಇದರ ಮೂಲಕ ಮೊಬೈಲ್‌ಗೆ ಕರೆನ್ಸಿ ಹಾಕಿಕೊಂಡಿದ್ದಾರೆ. ನಂತರ 50 ರೂ. ಕ್ಯಾಶ್‌ ಬ್ಯಾಕ್‌ ಬಂದಿದ್ದು, ಖಾತೆಗೆ ಜಮೆ ಆಗಿರಲಿಲ್ಲ. ಬಳಿಕ ಗೂಗಲ್‌ ಸರ್ಚ್‌ ಮಾಡಿ ಕಸ್ಟಮರ್‌ ಕೇರ್‌ಗೆ ಕರೆ ಮಾಡಿ ಕೇಳಿದ್ದಾರೆ.

ಆಗ ಅವರು ಎನಿ ಡೆಸ್ಕ್‌ ಆ್ಯಪ್‌ ಡೌನ್‌ಲೋಡ್‌ ಮಾಡಿ ಎಂದು ಹೇಳಿದ್ದಾರೆ. ನಂತರ ಕೆಲ ಮೆಸೇಜ್‌ಗಳು ಬಂದಿದ್ದು, ಆ ಮೆಸೇಜ್‌ಗಳನ್ನು ಪೋನ್‌ ಮಾಡಿದ ಕಸ್ಟಮರ್‌ ಕೇರ್‌ಗೆ ಕಳುಹಿಸಿದ್ದಾರೆ. ಅನಂತರ ಅವರ ಖಾತೆಯಿಂದ ಹಣ ಡ್ರಾ ಆಗಿದೆ. ಸಿಇಎನ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.