ನೌಕರಿ ಕೊಡಿಸುವುದಾಗಿ ವಂಚನೆ

ದಾವಣಗೆರೆ: ವಿಧಾನಸೌಧದಲ್ಲಿ ಪರಿಚಯವಾದ ವ್ಯಕ್ತಿಯೊಬ್ಬ ಸರಕಾರಿ ನೌಕರಿ ಕೊಡಿಸುತ್ತೇನೆಂದು ಹೇಳಿ 2.40 ಲಕ್ಷ ರೂ.ತೆಗೆದುಕೊಂಡು ಮೋಸ ಮಾಡಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.

ಹದಡಿ ಗ್ರಾಮದ ರೈತ ಡಿ.ಎಚ್‌. ಹೇಮಂತ್‌ಕುಮಾರ್‌ ಹಣ ಕಳೆದುಕೊಂಡ ವ್ಯಕ್ತಿ. ಬೆಂಗಳೂರಿಗೆ ಹೇಮಂತ್‌ಕುಮಾರ್‌ ಹೋಗಿದ್ದಾಗ ಮಂಡ್ಯದ ಮಧು ಎಂಬ ವ್ಯಕ್ತಿ ವಿಧಾನಸೌಧದಲ್ಲಿ ಪರಿಚಯವಾಗಿದ್ದ. ನಮ್ಮ ತಂದೆ ರೈಲ್ವೇ ನೌಕರರು ನಾನು ಕೂಡ ರೈಲ್ವೇ ಇಲಾಖೆಯಲ್ಲಿದ್ದೇನೆ. ಹಲವಾರು ಜನರಿಗೆ ನೌಕರಿ ಕೊಡಿಸಿದ್ದೇನೆಂದು ಹೇಳಿ ಹೇಮಂತ್‌ಕುಮಾರ್‌ನ್ನು ನಂಬಿಸಿದ್ದಾನೆ.

ನಂತರ ಹೇಮಂತ್‌ಕುಮಾರ್‌ ನನ್ನ ಹೆಂಡತಿಗೆ ನೌಕರಿ ಕೊಡಿಸಬೇಕೆಂದು ಮಧುಗೆ ಕೇಳಿದಾಗ, ಶಾಲಾ ದಾಖಲಾತಿಯನ್ನು ಮೊಬೈಲ್‌ ಮುಖಾಂತರ ಪಡೆದುಕೊಂಡು ಮೊದಲ ಕಂತಿನ ಹಣ ತೆಗೆದುಕೊಂಡಿದ್ದಾನೆ. ಇದಾದ ಬಳಿಕ ಹೇಮಂತ್‌ಕುಮಾರ್‌ ಆರ್ಡರ್‌ ಕಾಫಿ ಬಗ್ಗೆ ಕೇಳಿದ್ದಕ್ಕೆ ನಿಮಗೆ ಚಾಮರಾಜ ನಗರಕ್ಕೆ ಆಗುತ್ತೆ ದೂರ ಆಗುತ್ತದೆ. ಆದ್ದರಿಂದ ನಿಮಗೆ ದಾವಣಗೆರೆಗೆ ಆರ್ಡರ್‌ ಕೊಡಿಸುತ್ತೇನೆಂದು ಹೇಳಿ ಇನ್ನಷ್ಟು ಹಣ ಪಡೆದುಕೊಂಡಿದ್ದಾನೆ.

ಬಳಿಕ ಹೇಮಂತ್‌ ನನಗೆ ಕೆಲಸ ಬೇಡ ಹಣ ವಾಪಸ್‌ ಕೊಡಿ ಎಂದು ಮಧುಗೆ ಕೇಳಿದ್ದಾರೆ. ಆಗ ಮಧು ಇನ್ನೇನು ಕೆಲಸ ಸಿಗುವ ಹೊತ್ತಿಗೆ ನೀವು ಈ ರೀತಿ ಮಾಡಿದರೆ ಹೇಗೆ ಎಂದು ಹೇಳಿದಾಗ ಹೇಮಂತ್‌ಕುಮಾರ್‌ಗೆ ಅನುಮಾನ ಬಂದು ಜೋರು ಮಾಡಿದ್ದಾರೆ. ಈ ವೇಳೆ ವಂಚಕ ಮಧು ಕಾರವಾರಕ್ಕೆ ಹೋಗಿ ಆರ್ಡರ್‌ ಆಗಿದೆ ಎಂದು ಹೇಳಿ ಪೋನ್‌ ಸ್ವೀಚ್‌ ಆಫ್‌ ಮಾಡಿದ್ದಾನೆ. ಬಡಾವಣೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.