ದಾವಣಗೆರೆ: ಕೆಎಸ್‌ಆರ್‌ಟಿಸಿ ಪ್ರಯಾಣಿಕರಿಗೊಂದು ಸಿಹಿ ಸುದ್ದಿ. ಇನ್ನು ಮುಂದೆ ನೀವು ಸಂಚರಿಸುವ ರಾಜ್ಯ ಸಾರಿಗೆ ಸಂಸ್ಥೆ ಬಸ್‌ಗಳಲ್ಲಿ ಉಚಿತ ಇಂಟರ್‌ನೆಟ್‌ ಸೌಲಭ್ಯ ಲಭ್ಯ. ಪ್ರಯಾಣದ ದಾರಿ ಉದ್ದಕ್ಕೂ ನಿಮ್ಮ ಮೊಬೈಲ್‌ಗೆ ನೆಟ್‌ವರ್ಕ್‌ ಸಿಗುತ್ತಿಲ್ಲ ಎಂಬ ಗೊಣಗಾಟಕ್ಕೆ ಇನ್ನು ಬ್ರೇಕ್‌ ಬೀಳಲಿದೆ...!
ಅಂಥಾ ನೆಟ್‌ ಜತೆ ಜರ್ನಿಯ ದಿನಗಳು ಬಹಳ ದೂರವೇನಿಲ್ಲ. ಬರಲಿರುವ ಮಾರ್ಚ್‌ ತಿಂಗಳಿಂದಲೇ ಏಕ್ಸ್‌ಪ್ರೆಸ್‌, ನಗರ ಹಾಗೂ ಗ್ರಾಮೀಣ ಮಾರ್ಗದಲ್ಲಿ ಸಂಚರಿಸುವ ಎಲ್ಲ ಕೆಎಸ್‌ಆರ್‌ಟಿಸಿ ಬಸ್‌ಗಳಲ್ಲಿ ಸಿಗಲಿದೆ.
ಕæಎಸ್‌ಆರ್‌ಟಿಸಿ, ಎನ್‌ಡಬ್ಲ್ಯೂಕೆಆರ್‌ಟಿಸಿ, ಎನ್‌ಇಕೆಆರ್‌ಟಿಸಿ ಮತ್ತು ಬಿಎಂಟಿಸಿ ಸಂಸ್ಥೆಗಳು ಪ್ರಯಾಣಿಕರ ಅನುಕೂಲಕ್ಕಾಗಿ ತನ್ನ ಎಲ್ಲ ಬಸ್‌ಗಳಿಗೂ ವೈಫೈ ಅಳವಡಿಸುವ ನೂತನ ಯೋಜನೆ ಜಾರಿಗೆ ತರಲಿದೆ. ಮೊಬೈಲಿಗರು ತಾವು ಸಂಚರಿಸುವ ಬಸ್‌ಗಳಲ್ಲಿ ವೈಫೈ ಸಂಪರ್ಕ ಪಡೆದು ಸುಲಭವಾಗಿ ಫ್ರೀ ಅಂತರ್ಜಾಲ ಬಳಸಿಕೊಳ್ಳಬಹುದು.
ಎಷ್ಟು ಬಸ್‌ಗೆ ವೈಫೈ :
ರಾಜ್ಯ ಸಾರಿಗೆ ಸಂಸ್ಥೆಯ ನಾಲ್ಕು ನಿಗಮಗಳ ವ್ಯಾಪ್ತಿಯಲ್ಲಿ ಒಟ್ಟು 23, 500 ಬಸ್‌ಗಳಿವೆ. ಈ ಪೈಕಿ ಈಗಾಗಲೇ 1025 ಬಸ್‌ಗಳಿಗೆ ವೈಫೈ ಅಳವಡಿಸಿದೆ. ಇದೀಗ 17,200 ಬಸ್‌ಗಳಿಗೂ ಅಳವಡಿಸಲಾಗುತ್ತಿದೆ. ಈ ಬಸ್‌ಗಳಲ್ಲಿ ಸಂಚರಿಸುವವರು ಇಂಟರ್‌ನೆಟ್‌ ಸೇವೆ ಪಡೆಯುತ್ತಿದ್ದಾರೆ. ವೈಫೈ ಅಳವಡಿಕೆ ಕಾರ್ಯ ನಡೆಯುತ್ತಿದೆ.
ಸಂಸ್ಥೆಗೆ ಟೆಂಡರ್‌:
ಬಸ್‌ಗಳಲ್ಲಿ ವೈಫೈ ಸೇವೆ ನೀಡಲು ಕೆಎಫ್‌ಐಟಿ ಸಂಸ್ಥೆಗೆ ಟೆಂಡರ್‌ ನೀಡಲಾಗಿದೆ. ಜನರಿಗೆ ಉಚಿತ ವೈಫೈ ಸೇವೆ ನೀಡುವ ಕೆಎಫ್‌ಐಟಿ ಸಂಸ್ಥೆ ಇಂಟರ್‌ನೆಟ್‌ ಜಾಹೀರಾತು ಮೂಲಕ ನಿರ್ವಹಣೆಯ ಖರ್ಚು ವೆಚ್ಚ ನಿಭಾಯಿಸುತ್ತದೆ. ಅಲ್ಲದೇ ಇದೇ ಸಂಸ್ಥೆ ರಾಜ್ಯದ ಪ್ರಮುಖ ಬಸ್‌ ನಿಲ್ದಾಣಗಳಲ್ಲೂ ಕೂಡ ಮುಂದಿನ ದಿನಗಳಲ್ಲಿ ವೈಫೈ ಅಳವಡಿಸಲಿದೆ ಎನ್ನುತ್ತಾರೆ ಸಾರಿಗೆ ಅಧಿಕಾರಿಗಳು.
ವೈಫೈ ವಿಧಾನ:
ಪ್ರತಿ ಬಸ್‌ನಲ್ಲೂ 10 ಅಥವಾ 50 ಎಂಬಿನಷ್ಟು ಡೇಟಾ ದೊರೆಯಲಿದೆ. ಫೇಸ್‌ಬುಕ್‌, ವ್ಯಾಟ್ಸಾಪ್‌, ಟ್ವೀಟರ್‌ ಮೇಲ್‌, ಗೂಗಲ್‌ನಂಥ ಸಾಮಾಜಿಕ ಜಾಲತಾಣ ಧಾರಾಳವಾಗಿ ಬಳಸಬಹುದು. ಆದರೆ ಬಸ್‌ನಲ್ಲಿ ಪಯಣಿಸುವ ಪ್ರಯಾಣಿಕರಿಗೆ ಮಾತ್ರ ಈ ಸೇವೆ ಲಭ್ಯ.
ವೈಫೈ ಸಂಪರ್ಕ:
ಬಸ್‌ನ ಪ್ರತಿ ಸೀಟ್‌ ಮುಂಭಾಗ ಅಥವಾ ಪಕ್ಕದಲ್ಲಿ ವೈಫೈ ಸಂಪರ್ಕ ಪಡೆಯುವ ಕುರಿತು ಮಾಹಿತಿ ಫಲಕ ಹಾಕಲಾಗುತ್ತದೆ. ಸುಲಭವಾಗಿ ಸಂಪರ್ಕ ಪಡೆಯಬಹುದು. ಏನಾದರೂ ನ್ಯೂನತೆ ಕಂಡುಬಂದರೆ ಸಹಾಯವಾಣಿ ನಂಬರ್‌ ಕೂಡ ಅಲ್ಲಿರುತ್ತದೆ.
ಕೆಲ ಸಂದರ್ಭಗಳಲ್ಲಿ ಬಸ್‌ಗಳಲ್ಲಿ ನೆಟ್‌ವರ್ಕ್‌ ಸರಿಯಾಗಿ ಸಿಗುವುದಿಲ್ಲ. ಬಸ್‌ನಲ್ಲಿಯೇ ವೈಫೈ ಸೇವೆ ನೀಡುವ ಯೋಜನೆಯಿಂದ ಪ್ರಯಾಣಿಕರಿಗೆ ಅನುಕೂಲವಾಗಲಿದೆ. ಪ್ರತಿಯೊಂದು ಬಸ್‌ಗೂ ಈ ಸೌಲಭ್ಯ ಕಲ್ಪಿಸಬೇಕು.
- ಎಂ.ವೆಂಕಟೇಶ್‌, ದಾವಣಗೆರೆ
ಕೆಎಸ್‌ಆರ್‌ಟಿಸಿ ಪ್ರಯಾಣಿಕರಿಗೆ ಅಂತರ್ಜಾಲ ಸೇವೆ ನೀಡುವ ಉದ್ದೇಶದಿಂದ ಬಸ್‌ಗಳಲ್ಲಿ ವೈಫೈ ಅಳವಡಿಸಲಾಗುತ್ತಿದೆ. ಈಗಾಗಲೇ 1025 ಬಸ್‌ಗಳಿಗೆ ಜೋಡಿಸಲಾಗಿದೆ. ಉಳಿದ ಬಸ್‌ಗಳಿಗೆ ಮಾರ್ಚ್‌ ತಿಂಗಳಿಗೆ ಅಳವಡಿಸಲಾಗುವುದು.
-ಉಮಾಶಂಕರ್‌, ಎಂಡಿ, ಕೆಎಸ್‌ಆರ್‌ಟಿಸಿ, ಬೆಂಗಳೂರು.