ಬಿಗಿ ಭದ್ರತೆಯಲ್ಲಿ ನೀಟ್‌ ಪರೀಕ್ಷೆ

ದಾವಣಗೆರೆ : ವೈದ್ಯಕೀಯ ಮತ್ತು ದಂತ ವೈದ್ಯ ಕೋರ್ಸ್‌ಗಳಿಗೆ ಪ್ರವೇಶ ಕಲ್ಪಿಸುವ ರಾಷ್ಟ್ರೀಯ ಅರ್ಹತಾ ಪ್ರವೇಶ ಪರೀಕ್ಷೆ (ನೀಟ್‌) ನಗರದ ನಾನಾ ಪರೀಕ್ಷಾ ಕೇಂದ್ರಗಳಲ್ಲಿ ಭಾನುವಾರ ಮಧ್ಯಾಹ್ನ 2 ರಿಂದ ಸಂಜೆ 5ರವರೆಗೆ ನಡೆಯಿತು.

ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (ಎನ್‌ಟಿಎ) ನಡೆಸುತ್ತಿರುವ ಈ ಪರೀಕ್ಷೆಯಲ್ಲಿ ಭೌತಶಾಸ್ತ್ರ, ರಸಾಯನಶಾಸ್ತ್ರ, ಪ್ರಾಣಿಶಾಸ್ತ್ರ ಹಾಗೂ ಸಸ್ಯಶಾಸ್ತ್ರ ವಿಷಯಗಳಲ್ಲಿ ತಲಾ 45 ಪ್ರಶ್ನೆಗಳಂತೆ ಒಟ್ಟು 720 ಅಂಕಗಳಿಗೆ 180 ಪ್ರಶ್ನೆಗಳನ್ನು ಕೇಳಲಾಗಿತ್ತು. ಪ್ರತಿ ಸರಿ ಉತ್ತರಕ್ಕೆ ನಾಲ್ಕು ಅಂಕಗಳನ್ನು ನೀಡಲಾಗುವುದಲ್ಲದೇ ಪ್ರತಿ ತಪ್ಪು ಉತ್ತರಕ್ಕೆ 1 ಅಂಕವನ್ನು ಕಡಿತಗೊಳಿಸಲಾಗುತ್ತದೆ. ರಾಷ್ಟ್ರಾದ್ಯಂತ ಲಭ್ಯವಿರುವ 66,671 ವೈದ್ಯಕೀಯ ಮತ್ತು 27,148 ಡೆಂಟಲ್‌ ಸೀಟುಗಳ ಭರ್ತಿಗೆ ಪರೀಕ್ಷೆ ನಡೆಯಿತು.

ಪರೀಕ್ಷಾ ಅಕ್ರಮ ತಡೆಗಟ್ಟುವ ಸಲುವಾಗಿ ಪರೀಕ್ಷಾರ್ಥಿಗಳಿಗೆ ಉಡುಪು ಹಾಗೂ ಇತರೆ ವಿಷಯಗಳಿಗೆ ಸಂಬಂಧಿಸಿದಂತೆ ಎನ್‌ಟಿಎ ಹಲವು ನಿರ್ಬಂಧ ವಿಧಿಸಿತ್ತು. ಮಧ್ಯಾಹ್ನ 12 ಗಂಟೆಯ ವೇಳೆಗೆ ಎಲ್ಲ ವಿದ್ಯಾರ್ಥಿಗಳು ಪರೀಕ್ಷಾ ಕೇಂದ್ರದಲ್ಲಿ ಹಾಜರಿರುವಂತೆ ಸೂಚಿಸಲಾಗಿತ್ತು.

ನಿರ್ಬಂಧಿತ ವಸ್ತುಗಳು:
ಲೋಹದ ವಸ್ತುಗಳು, ಜಾಮೆಟ್ರಿ ಬಾಕ್ಸ್‌, ಪೆನ್ಸಿಲ್‌ ಬಾಕ್ಸ್‌, ಹ್ಯಾಂಡ್‌ ಬ್ಯಾಗ್‌, ಪರ್ಸ್‌, ನೀರು, ತಿಂಡಿ ತಿನಿಸುಗಳು, ಪೇಪರ್‌ , ಮೊಬೈಲ್‌ ಫೋನ್‌, ಪೇಜರ್‌, ಕ್ಯಾಲ್ಕುಲೇಟರ್‌, ಕ್ಯಾಮೆರಾ, ಕೈಗಡಿಯಾರ ನಿರ್ಬಂಧಿಸಲಾಗಿತ್ತು.

ಉಡುಪುಗಳು:
ಅಭ್ಯರ್ಥಿಗಳು ಅರ್ಧ ತೋಳಿನ ಟಾಪ್‌ ಅಥವಾ ಅಂಗಿ ಸೇರಿದಂತೆ ಸಾಧಾರಣ ಉಡುಪುಗಳನ್ನು ಧರಿಸಿ ಪರೀಕ್ಷಾ ಕೇಂದ್ರಕ್ಕೆ ಬರುವುದನ್ನು ನಿಷೇಧಿಸಲಾಗಿತ್ತು. ಅಲ್ಲದೇ ಉದ್ದ ತೋಳಿನ ಅಂಗಿ ಧರಿಸಿ ಬರುವುದನ್ನು ನಿಷೇಧಿಸಲಾಗಿತ್ತು. ಕಿವಿಯೋಲೆ, ರಿಂಗ್‌, ಮೂಗುತಿ, ಆಭರಣಗಳು, ಪೆಂಡೆಂಟ್‌, ಬ್ಯಾಡ್ಜ್‌ ಧರಿಸುವಂತಿರಲಿಲ್ಲ. ದೊಡ್ಡ ಹೀಲ್ಸ್‌ ಇಲ್ಲದ ಸಾಮಾನ್ಯ ಚಪ್ಪಲಿ ಮತ್ತು ಸ್ಯಾಂಡಲ್‌ಗಳನ್ನು ಧರಿಸಿರಬೇಕು ಎಂದು ಎನ್‌ಟಿಎ ಸೂಚಿಸಿದ ಹಿನ್ನೆಲೆಯಲ್ಲಿ ಸಿಬ್ಬಂದಿ ಪ್ರತಿಯೊಬ್ಬರನ್ನು ತಪಾಸಣೆ ನಡೆಸಿದರು.