ಹಂದಿ ದಾಳಿ: ಬಾಲಕನಿಗೆ ತೀವ್ರ ಗಾಯ

ದಾವಣಗೆರೆ: ಸ್ನೇಹಿತರೊಂದಿಗೆ ಕ್ರಿಕೆಟ್‌ ಆಟವಾಡುತ್ತಿದ್ದ ವೇಳೆ ಹಂದಿ ಹಿಂಡಿನ ಬಳಿ ಹೋದ ಚೆಂಡು ತೆಗೆದುಕೊಳ್ಳಲು ಹೋಗಿದ್ದ ಬಾಲಕನ ಮೇಲೆ ಹಂದಿ ದಾಳಿ ಮಾಡಿ ಗಾಯಗೊಳಿಸಿರುವ ಘಟನೆ ನಗರದ ಶಿವಕುಮಾರ್‌ ಬಡಾವಣೆಯಲ್ಲಿ ಶುಕ್ರವಾರ ಬೆಳಗ್ಗೆ ನಡೆದಿದೆ.

ವೇದಾಂತ ಗೌಡ (10) ಗಾಯಗೊಂಡಿರುವ ಬಾಲಕ. ಬಾಲಕನ ಬಲಗೈ ಕಚ್ಚಿಕೊಂಡು ಅರ್ಧ ಕಿಮೀವರೆಗೂ ಹಂದಿ ಎಳೆದುಕೊಂಡು ಹೋದ ಪರಿಣಾಮ, ಬಲಗೈ ಮೂಳೆ ಮುರಿದು, ಎಡಗೈಗೂ ಗಾಯಗಳಾಗಿವೆ. ಚಿಕಿತ್ಸೆಗಾಗಿ ಬಾಲಕನನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಈ ಬಡಾವಣೆಯಲ್ಲಿ ಹಂದಿ ಮತ್ತು ನಾಯಿಗಳ ಕಾಟ ವಿಪರೀತವಾಗಿದ್ದು, ಅವುಗಳನ್ನು ಹಿಡಿಯುವಲ್ಲಿ ಮಹಾನಗರ ಪಾಲಿಕೆ ನಿರ್ಲಕ್ಷ್ಯ ಧೋರಣೆ ಅನುಸರಿಸುತ್ತಿದೆ. ಇನ್ನಾದರೂ ಹಂದಿಗಳ ಹಿಡಿದು, ಬೇರೆ ಕಡೆ ಸಾಗಿಸಬೇಕೆಂದು ಸ್ಥಳೀಯರು ಒತ್ತಾಯಿಸಿದ್ದಾರೆ.