ಮಳೆಗಾಗಿ ಪ್ರಾರ್ಥಿಸಿ ಈಶ್ವರನಿಗೆ ಮಕ್ಕಳಿಂದ ಪೂಜೆ

ಮಲೆಬೆನ್ನೂರು : ಹರಿಹರ ತಾಲೂಕು ಧೂಳೆಹೊಳೆ ಗ್ರಾಮದ ಈಶ್ವರ ದೇವಸ್ಥಾನದಲ್ಲಿ ಮಳೆಗಾಗಿ ಪ್ರಾರ್ಥಿಸಿ, ಮಕ್ಕಳು ಹಾಗೂ ಗ್ರಾಮಸ್ಥರು ಈಶ್ವರನಿಗೆ ವಿಶೇಷ ಪೂಜೆ ಸಲ್ಲಿಸಿ, ಮಳೆ ಮಲ್ಲಪ್ಪನನ್ನು ಕರುಣಿಸುವಂತೆ ಕೋರಿದರು.

ತುಂಗಭದ್ರಾ ನದಿಯಲ್ಲಿ ಪುಣ್ಯ ಸ್ನಾನ ಮಾಡಿದ 21 ಮಕ್ಕಳು, ಬಿಂದಿಗೆಯಲ್ಲಿ ಹೊಳೆ ನೀರು ಹೊತ್ತು ತಂದು ಸಾಲಾಗಿ ಬಂದು ಕರಿಗಲ್ಲಿಗೆ ಹಾಗೂ ಈಶ್ವರನಿಗೆ ಅಭಿಷೇಕ ಮಾಡುವ ಮೂಲಕ ಮಳೆಗಾಗಿ ಕೈಮುಗಿದು ಪ್ರಾರ್ಥಿಸಿದರು.

ಪುಟ್ಟ, ಪುಟ್ಟ ಮಕ್ಕಳು ವಿಭೂತಿ ಧರಿಸಿ, ತುಂಬಿದ ಬಿಂದಿಗೆಯಿಂದ ಈಶ್ವರನಿಗೆ ಗಂಗೆಯ ಅಭಿಷೇಕ ಮಾಡುತ್ತಿದ್ದ ದೃಶ್ಯ ಈಶ್ವರನನ್ನೂ ಮೆಚ್ಚಿಸುವಂತಿತ್ತು. ಈಶ್ವರನಿಗೆ ಮಕ್ಕಳು ಅಭಿಷೇಕ ಮಾಡಿದ ಬಳಿಕ ಗ್ರಾಮಸ್ಥರು, ಈಶ್ವರನಿಗೆ ಕ್ಷೀರಾಭಿಷೇಕ, ರುದ್ರಾಭಿಷೇಕ ನೆರವೇರಿಸಿದರು. ಗಂಟೆಗಳ ಸದ್ದು ಮೊಳಗಿಸಿ, ಮಹಾಮಂಗಳಾರತಿ ನೆರವೇರಿಸಿದರು.

ಜಗತ್ತು ಪ್ರಕೃತಿ ವಿಕೋಪದಿಂದ ಮಳೆಯಿಲ್ಲದೆ, ಬರದಿಂದ ತಾಂಡವವಾಡುತ್ತಿದೆ. ಇಂತಹ ಸಂದರ್ಭ ಬಂದಾಗ, ಈಶ್ವರನಿಗೆ ಮಕ್ಕಳಿಂದ ಗಂಗಾಭಿಷೇಕ ಮಾಡಿಸಿ, ವಿಶೇಷ ಪೂಜೆ ಮಾಡುತ್ತಿದ್ದರು. ಪರಮಾತ್ಮನ ಧ್ಯಾನದಿಂದ ಸಕಲವೂ ಸಿದ್ಧಿಸುತ್ತದೆ ಎಂಬುದು ನಮ್ಮ ಹಿರಿಯರ ಮತ್ತು ನಮ್ಮ ನಂಬಿಕೆಯಾಗಿದೆ. ಈ ಪದ್ಧತಿ ನಮ್ಮೂರಿನಲ್ಲಿ ಬಹಳ ಹಿಂದಿನಿಂದಲೂ ನಮ್ಮ ಹಿರಿಯರೂ ಆಚರಣೆ ಮಾಡಿಕೊಂಡು ಬಂದಿರುವ ಸಂಪ್ರದಾಯ. ಇದೇ ಸಂಪ್ರದಾಯವನ್ನು ನಾವು ಮುಂದುವರೆಸಿಕೊಂಡು ಬಂದಿದ್ದೇವೆ ಎನ್ನುತ್ತಾರೆ ಗ್ರಾಮಸ್ಥರು.