ಭದ್ರಾ ತೀರದಲ್ಲಿ ಮತ್ತೆ ಅಬ್ಬರಿಸಿದ ಮಳೆ

ಮಲೆಬೆನ್ನೂರು : ಭದ್ರಾ ಜಲಾನಯನ ಪ್ರದೇಶದಲ್ಲಿ ತುಸು ಬಿಡುವು ನೀಡಿದ್ದ ಮಳೆ ಶುಕ್ರವಾರ ರಾತ್ರಿ ಮತ್ತೆ ಅಬ್ಬರಿಸಿದೆ. ಭದ್ರಾ ನದಿ ಉಕ್ಕಿ ಹರಿದು ಭದ್ರಾ ಡ್ಯಾಂಗೆ ಭಾರೀ ಪ್ರಮಾಣದ ಒಳಹರಿವು ಹರಿದು ಬರುತ್ತಿದೆ.

ಶನಿವಾರ ಬೆಳಗ್ಗೆ 149.11 ಅಡಿಯಿದ್ದ ಜಲಾಶಯ ನೀರಿನ ಮಟ್ಟ ಸಂಜೆ 6 ಗಂಟೆ ವೇಳೆಗೆ 150.6 ಅಡಿಗೆ ತಲುಪಿದೆ. ಜಲಾಶಯದ ಗರಿಷ್ಟಮಟ್ಟ 186 ಅಡಿಗಳಿದ್ದು, ಡ್ಯಾಂ ಭರ್ತಿಯಾಗಲು 35.6 ಅಡಿ ಬಾಕಿ ಇದೆ. ಜಲಾನಯನ ವ್ಯಾಪ್ತಿಯ ಬಾಳೆಹೊನ್ನೂರಿನಲ್ಲಿ ಶನಿವಾರ ಬೆಳಗ್ಗೆ 3.50 ಮೀ. ಇದ್ದ ಭದ್ರಾ ನದಿ ನೀರಿನ ಮಟ್ಟ ಸಂಜೆ ವೇಳೆಗೆ 5.80 ಮೀ.ಗೆ ಏರಿಕೆಯಾಗಿದೆ. ಇದೇ ರೀತಿ ಮಳೆ ಮುಂದುವರಿದರೆ ಒಳ ಹರಿವಿನಲ್ಲಿ ಇನ್ನಷ್ಟು ಏರಿಕೆ ಆಗಿ ಭಾನುವಾರ ವೇಳೆಗೆ 20 ಕ್ಯೂಸೆಕ್‌ ಮುಟ್ಟುವ ಸಾಧ್ಯತೆಯಿದೆ. ಕಳೆದ ವರ್ಷ ಇದೇ ದಿನ ಡ್ಯಾಂ ನೀರಿನ ಮಟ್ಟ 124.3 ಅಡಿಯಿತ್ತು. ಈಗ 150 ಅಡಿಯಿದ್ದು 26 ಅಡಿ ಹೆಚ್ಚಿನ ನೀರಿದೆ.

ಎಲ್ಲಿ ಎಷ್ಟು ಮಳೆ?;

ಭದ್ರಾ ಜಲಾನಯನ ಪ್ರದೇಶವಾದ ಕುದುರೆ ಮುಖದಲ್ಲಿ ಶುಕ್ರವಾರ ರಾತ್ರಿ 76.5, ಶನಿವಾರ ಹಗಲು 184.5, ಕಳಸ ರಾತ್ರಿ 95, ಬೆಳಗ್ಗೆ 23.5, ಹೊರನಾಡು 111, ಹಗಲು 23.5, ಮೂಡಿಗೆರೆ ರಾತ್ರಿ 55, ಹಗಲು 14.5, ಎನ್‌ ಆರ್‌ ಪುರ ರಾತ್ರಿ 20, ಹಗಲು 5 ಮಿಮೀ, ಬಾಳೆಹೊನ್ನೂರು ರಾತ್ರಿ 61.5, ಹಗಲು 8.5, ಬನ್ನೂರು ರಾತ್ರಿ 65.5, ಹಗಲು 8.5, ಮಾಗುಂಡಿ ರಾತ್ರಿ 101, ಹಗಲು 16, ಬಾಳೆಹೊಳೆ ರಾತ್ರಿ 38, ಹಗಲು 11 ಮಿಮೀ ಮಳೆಯಾಗಿದೆ.