ಜಿಲ್ಲೆ ಕೆಲವೆಡೆ ಹನಿದ ಮಳೆ

ದಾವಣಗೆರೆ : ಜಿಲ್ಲೆಯ ಕೆಲವೆಡೆ ಗುರುವಾರ ಮಳೆಯಾಗಿದೆ. ಚನ್ನಗಿರಿ, ಹೊನ್ನಾಳಿ, ನ್ಯಾಮತಿ ಭಾಗದಲ್ಲಿ ಸುಮಾರು ಒಂದು ಗಂಟೆಗೂ ಹೆಚ್ಚು ಕಾಲ ಉತ್ತಮ ಮಳೆ ಸುರಿದಿದೆ. ಎರಡು ದಿನದ ಹಿಂದೆ ಸುರಿದ ಮಳೆ ಈಗ ಮತ್ತೆ ಮುಂದುವರಿದಂತಾಗಿದೆ.

ದಾವಣಗೆರೆ ನಗರದಲ್ಲಿ ಸಂಜೆ ಮಳೆ ಸುರಿಯಿತು. ಮಳೆಗಿಂತ ಗಾಳಿಯ ವೇಗ ಜೋರಿತ್ತು. ಗಾಳಿ ತಣ್ಣಗಾದ ನಂತರ ಕೆಲಕಾಲ ತುಂತುರು ಮಳೆ ಸುರಿಯಿತು. ತಾಲೂಕಿನ ಕೆಲವೆಡೆ ಕೂಡ ಮಳೆಯಾಗಿದೆ. ಗಾಳಿಯಿಂದ ಭತ್ತದ ಬೆಳೆಗೆ ಕೊಂಚ ಹಾನಿಯಾಗಬಹುದು ಎಂದು ಅಂದಾಜಿಸಲಾಗಿದೆ.

ಚನ್ನಗಿರಿ ಪಟ್ಟಣ ಸೇರಿ ಸುತ್ತಮುತ್ತ ಉತ್ತಮ ಮಳೆಯಾಗಿದೆ. ಗಾಳಿ ಮಳೆಗೆ ಪಟ್ಟಣದಲ್ಲಿ ಸುಮಾರು ಎರಡು ಗಂಟೆಗೂ ಹೆಚ್ಚಿನ ಕಾಲ ವಿದ್ಯುತ್‌ ಕೈ ಕೊಟ್ಟಿತ್ತು. ಹೊನ್ನಾಳಿ ಸೇರಿ ನ್ಯಾಮತಿ ಸುತ್ತುಮುತ್ತಾ ಒಂದು ತಾಸಿಗೂ ಹೆಚ್ಚು ಕಾಲ ಬಿರು ಮಳೆ ಸುರಿದಿದೆ. ಉಳಿದಂತೆ ಜಿಲ್ಲೆಯ ನಾನಾ ಕಡೆ ಚದುರಿದಂತೆ ಮಳೆಯಾಗಿದೆ.