ಪಡಿತರ ಅಕ್ಕಿ ವಶ: ಮೂವರ ಬಂಧನ

ಹೊನ್ನಾಳಿ: ಸ್ಥಳೀಯ ಪೊಲೀಸರು ಹಾಗೂ ಆಹಾರ ಇಲಾಖೆ ಅಧಿಕಾರಿಗಳು ಶುಕ್ರವಾರ ಜಂಟಿ ದಾಳಿ ನಡೆಸಿ ತಾಲೂಕಿನ ದಿಡಗೂರು ಗ್ರಾಮದ ಸಮೀಪದ ಕೃಷ್ಣಪ್ಪ ನಗರದ ಮನೆಯೊಂದರಲ್ಲಿ ಸಂಗ್ರಹಿಸಿದ್ದ 46 ಕ್ವಿಂಟಾಲ್‌ ಪಡಿತರ ಅಕ್ಕಿ, ಬುಲೆರೊ ಪಿಕ್‌ಅಪ್‌ ವಾಹನ ವಶಪಡಿಸಿಕೊಂಡಿದ್ದಾರೆ. ಜತೆಗೆ ಮೂವರು ಆರೋಪಿಗಳನ್ನು ಬಂಧಿಸಲಾಗಿದೆ.

ಖಚಿತ ಮಾಹಿತಿ ಪಡೆದ ಪೊಲೀಸರು ಹಾಗೂ ಆಹಾರ ಇಲಾಖೆ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ದಾಳಿ ವೇಳೆಪಡಿತರ ಅಕ್ಕಿ ಹಾಗೂ ಇತರ ಅಕ್ಕಿಯನ್ನು ಸಂಗ್ರಹಿಸುತ್ತಿದ್ದು, ಪತ್ತೆಯಾಗಿದೆ. 'ಪಡಿತರ ಅಕ್ಕಿ ಚೀಲದ ಮೇಲೆ ಎಫ್‌ಸಿಐ ಗವರ್ನಂಟ್‌ ಆಫ್‌ ಪಂಜಾಬ್‌ ಎಂದು ಪ್ರಿಂಟ್‌ ಆಗಿರುವ 50 ಕೆಜಿ ತೂಕದ 39 ಗೋಣಿ ಚೀಲಗಳು ಕೂಡ ಪತ್ತೆಯಾಗಿವೆ. ಆರೋಪಿಗಳಾದ ವಾಹನ ಚಾಲಕ ರವಿ, ಕಮ್ಮಾರಗಟ್ಟೆಯ ಸಂತೋಷ್‌ ಹಾಗೂ ಈಶ್ವರಪ್ಪರನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ. ವಶಪಡಿಸಿಕೊಂಡ ಅಕ್ಕಿಯನ್ನು ಎಪಿಎಂಸಿ ಸುಪರ್ದಿಗೆ ನೀಡಲಾಗಿದೆ' ಎಂದು ಸಿಪಿಐ ಬ್ರಿಜೇಶ್‌ ಮ್ಯಾಥ್ಯೂ ತಿಳಿಸಿದ್ದಾರೆ. ಹೊನ್ನಾಳಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.