ಜೂನ್ 21ಕ್ಕೆ ಕಂಕಣ ಸೂರ್ಯಗ್ರಹಣ, ವೀಕ್ಷಣೆಗೆ ಅವಕಾಶ

ದಾವಣಗೆರೆ: ಕಂಕಣ ಸೂರ್ಯಗ್ರಹಣ ಜೂನ್‌ 21ಕ್ಕೆ ಸಂಭವಿಸಲಿದ್ದು, ಗ್ರಹಣ ವೀಕ್ಷಣೆಯಿಂದ ಕೆಡುಕಾಗುತ್ತದೆ ಎಂಬ ಮೌಢ್ಯದಿಂದ ಹೊರಬಂದು ಆಕಾಶದಲ್ಲಿ ನಡೆಯುವ ಈ ನೆರಳು ಬೆಳಕಿನ ಆಟದ ಕೌತುಕ ವೀಕ್ಷಿಸಬೇಕು ಎಂದು ವಿಜ್ಞಾನ ಪರಿಷತ್‌ ಸದಸ್ಯ ಎಂ. ಗುರುಸಿದ್ಧಸ್ವಾಮಿ ತಿಳಿಸಿದ್ದಾರೆ.

ಅಂದು ಬೆಳಗ್ಗೆ 10 ಗಂಟೆ 7 ನಿಮಿಷ 26 ಸೆಕೆಂಡ್‌ಗೆ ಗ್ರಹಣ ಆರಂಭಗೊಳ್ಳುತ್ತದೆ. ಮಧ್ಯಾಹ್ನ 1 ಗಂಟೆ 29 ನಿಮಿಷಕ್ಕೆ ಕೊನೆಗೊಳ್ಳಲಿದೆ. ಬೆಳಗ್ಗೆ 11 ಗಂಟೆ 42 ನಿಮಿಷ 53 ಸೆಕೆಂಡ್‌ಗೆ ಸೂರ್ಯನನ್ನು ಚಂದ್ರ ಶೇ.42.7ರಷ್ಟು ಮರೆ ಮಾಡುವನು ಎಂದು ಅವರು ಹೇಳಿದ್ದಾರೆ.

ಸೂರ್ಯ, ಭೂಮಿ ಮಧ್ಯೆ ಚಂದ್ರ ಒಂದೇ ರೇಖೆಯಲ್ಲಿ ಬಂದಾಗ ಸೂರ್ಯಗ್ರಹಣವಾಗುತ್ತದೆ. ಬರೀಗಣ್ಣಲ್ಲಿ ಗ್ರಹಣ ನೋಡಬಾರದು. ಸುರಕ್ಷಾ ಸಾಧನ ಬಳಸಿ ವೀಕ್ಷಿಸಬೇಕು ಎಂದು ಸಲಹೆ ನೀಡಿದ್ದಾರೆ.

ಕರ್ನಾಟಕ ರಾಜ್ಯ ವಿಜ್ಞಾನ ಪರಿಷತ್‌, ದಾವಣಗೆರೆ ವಿಜ್ಞಾನ ಕೇಂದ್ರ, ಕರ್ನಾಟಕ ರಾಜ್ಯ ಜ್ಞಾನ ವಿಜ್ಞಾನ ಸಮಿತಿ (ಕೆಜಿವಿಎಸ್‌), ಭಾರತ ಜ್ಞಾನ ವಿಜ್ಞಾನ ಸಮಿತಿ (ಬಿಜಿವಿಎಸ್‌) ಮನೆ ಮನೆ ವಿಜ್ಞಾನ ದಾಸೋಹ ಬಳಗದ ಆಶ್ರಯದಲ್ಲಿ ನಗರದ ಪ್ರೌಢಶಾಲಾ ಮೈದಾನದಲ್ಲಿ ಗ್ರಹಣ ವೀಕ್ಷಣೆಗೆ ವ್ಯವಸ್ಥೆ ಮಾಡಲಾಗಿದೆ. ಕೊರೊನಾ ಹಿನ್ನೆಲೆಯಲ್ಲಿ ವೀಕ್ಷಣೆಗೆ ಬರುವವರು ಕಡ್ಡಾಯವಾಗಿ ಮಾಸ್ಕ್‌ ಧರಿಸಬೇಕು. ಪರಸ್ಪರ ಅಂತರ ಕಾಪಾಡಿಕೊಳ್ಳಬೇಕು. ಸಂಪನ್ಮೂಲ ವ್ಯಕ್ತಿಗಳಾದ ಎಂ.ಟಿ. ಶರಣಪ್ಪ, ಡಾ. ಬಿ.ಇ. ರಂಗಸ್ವಾಮಿ, ಕೆ.ಸಿ. ಬಸವರಾಜ, ಕೆ. ಸಿದ್ದೇಶ್‌, ಅಂಗಡಿ ಸಂಗಪ್ಪ 'ಗ್ರಹಣ' ಕುರಿತು ಮಾಹಿತಿ ನೀಡಲಿದ್ದಾರೆ ಎಂದು ಗುರುಸಿದ್ಧಸ್ವಾಮಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.