ರೈತ ಮುಖಂಡರಿಗೆ ದಂಡ

ದಾವಣಗೆರೆ : ರಸಗೊಬ್ಬರಕ್ಕಾಗಿ ರೈಲು ತಡೆ ಚಳವಳಿ ನಡೆಸಿದ್ದ ರೈತ ಮುಖಂಡರಾದ ತೇಜಸ್ವಿ ಪಟೇಲ್‌, ಹಚ್ಚವ್ವನಹಳ್ಳಿ ಮಂಜುನಾಥ್‌ ಸೇರಿ 10 ಮಂದಿಗೆ ತಲಾ ಮೂರು ಸಾವಿರ ರೂ. ದಂಡ ವಿಧಿಸಿ ನಗರದ ಒಂದನೇ ಜೆಎಂಎಫ್‌ಸಿ ನ್ಯಾಯಾಲಯ ತೀರ್ಪು ನೀಡಿದೆ. ದಂಡ ತುಂಬದಿದ್ದರೆ ಹತ್ತು ದಿನ ಜೈಲು ಶಿಕ್ಷೆ ವಿಧಿಸಿತ್ತು. ಜತೆಗೆ ಮೇಲ್ಮನವಿ ಅವಕಾಶವೂ ನೀಡಲಾಗಿತ್ತು. ಆದರೆ ರೈತರು ಮೇಲ್ಮನವಿಗೆ ಹೋಗದೆ ದಂಡ ಕಟ್ಟಿ ತೀರ್ಪು ಪಾಲಿಸಿದರು.

2008ರಲ್ಲಿ ಯಡಿಯೂರಪ್ಪ ಸಿಎಂ ಆಗಿದ್ದ ವೇಳೆ ರಾಜ್ಯದಲ್ಲಿ ರಸಗೊಬ್ಬರ ಕೊರತೆ ಕಂಡು ಬಂದಿತ್ತು. ಈ ವೇಳೆ ಹಾವೇರಿಯಲ್ಲಿ ಗೋಲಿಬಾರ್‌ ಕೂಡ ನಡೆದಿತ್ತು. ಎಲ್ಲ ಜಿಲ್ಲೆಗಳಲ್ಲೂ ರೈತರು ಹೋರಾಟ ನಡೆಸಿದ್ದರು. ಈ ವೇಳೆ ದಾವಣಗೆರೆಯಲ್ಲೂ ರೈಲು ತಡೆ ಚಳವಳಿ ಮಾಡಿದ್ದರು. ಈ ಪ್ರಕರಣ ಸಂಬಂಧ ಹತ್ತು ವರ್ಷದ ನಂತರ ನ್ಯಾಯಾಲಯ ತೀರ್ಪು ನೀಡಿದೆ.