ಶಾಲೆಯ ಢಣ ಢಣ ಗಂಟೆ ಬಾರಿಸಿತು..

ದಾವಣಗೆರೆ : ಬೇಸಿಗೆ ರಜೆ ಮಜವಾಗಿ ಕಳೆದ ಮಕ್ಕಳಿಗೆ ಮೇ 29 ಬುಧವಾರ ಇಂದಿನಿಂದ ಢಣ ಢಣ ಗಂಟೆ ಬಾರಿಸಲಿದ್ದು ಶಾಲೆಗಳು ಪುನಾರಂಭ ಆಗಲಿವೆ. ಶೈಕ್ಷಣಿಕ ವರ್ಷ ಆರಂಭದ ಹಿನ್ನೆಲೆ ಮಂಗಳವಾರವೇ ಶಾಲೆ ಬಾಗಿಲು ತೆರೆದು ಶಿಕ್ಷಕರು, ವಿದ್ಯಾರ್ಥಿಗಳು ಸೇರಿ ಸ್ವಚ್ಛತೆ ಕೈಗೊಂಡರು.

ಬೆಳಗ್ಗೆ ಶಾಲೆಗೆ ಆಗಮಿಸಿದ ಕೆಲ ವಿದ್ಯಾರ್ಥಿಗಳು ಶಾಲಾ ಆವರಣದ ಕಸ ಗುಡಿಸಿ ಸ್ವಚ್ಚಗೊಳಿಸಿದರು. ಕೊಠಡಿಗಳ ಒಳಗೂ ಕಸ ಗುಡಿಸಿ ನಿರ್ಮಲ ಮಾಡಿದರು. ಮಕ್ಕಳಿಗೆ ಕೆಲವೆಡೆ ಶಿಕ್ಷಕರು ಕೂಡ ಸಾಥ್‌ ನೀಡಿದ್ದು ವಿಶೇಷ. ಗ್ರಾಮೀಣ ಪ್ರದೇಶದ ಕೆಲವೆಡೆ ತಳಿರು ತೋರಣ ಕಟ್ಟಿ ಹೂಗಳ ಅಲಂಕಾರ ಕೂಡ ಮಾಡಿದ್ದರು.

ಸಿಹಿ ಊಟ
ಶಾಲಾರಂಭದ ಮುನ್ನದಿನವೇ ಆವರಣ, ಕೊಠಡಿಗಳ ಸ್ವಚ್ಚತೆ ಬಗ್ಗೆ ಇಲಾಖೆ ಸೂಚನೆ ನೀಡದ ಹಿನ್ನೆಲೆ ಸ್ವಚ್ಚತೆ ಕಾರ್ಯ ನಡೆಯಿತು. ಸಿಹಿ ಊಟದೊಂದಿಗೆ ಈ ಸಾಲಿನ ಶೈಕ್ಷಣಿಕ ವರ್ಷ ಆರಂಭ ಆಗಲಿದೆ. ಮೊದಲ ದಿನವೇ ಎಲ್ಲ ಮಕ್ಕಳಿಗೂ ಮಧ್ಯಾಹ್ನದ ಬಿಸಿಯೂಟದಲ್ಲಿ ಸಿಹಿ ಊಟ ನೀಡಲಾಗುತ್ತಿದೆ. ಶಾಲೆಯಿಂದ ಹೊರಗುಳಿದ ಮಕ್ಕಳನ್ನು ಮರಳಿ ಶಾಲೆಗೆ ತರಲು ಆಂದೋಲನ ಇನ್ನಿತರೆ ಚಟುವಟಿಕೆಗಳು ಕೂಡ ನಡೆಯಲಿವೆ. ಮೊದಲ ದಿನವೇ ಮಕ್ಕಳಿಗೆ ಸಮವಸ್ತ್ರ, ಪಠ್ಯಪುಸ್ತಕ ವಿತರಣೆ ಆಗಲಿದೆ.

ಬಿಸಿಲು, ಕುಡಿವ ನೀರು ಸಮಸ್ಯೆ
ಜಿಲ್ಲೆಯ ಅನೇಕ ಹಳ್ಳಿಗಳಲ್ಲಿ ಕುಡಿವ ನೀರಿನ ಸಮಸ್ಯೆಯಿದ್ದು ಇದರ ಪರಿಣಾಮ ಶಾಲೆಗಳ ಮೇಲೂ ಬೀಳಲಿದೆ. ಮಕ್ಕಳ ಮಧ್ಯಾಹ್ನದ ಬಿಸಿಯೂಟಕ್ಕೂ ತೊಂದರೆ ಆಗಬಹುದಾದ ಹಳ್ಳಿಗಳೂ ಇವೆ. ಗ್ರಾಪಂಗಳು ಟ್ಯಾಂಕರ್‌ ಮೂಲಕ ನೀರು ಒದಗಿಸುವ ಸ್ಥಿತಿಯಲ್ಲಿ ಅನೇಕ ಹಳ್ಳಿಗಳಿದ್ದು ಶಾಲೆಗಳಿಗೂ ಟ್ಯಾಂಕರ್‌ ನೀರು ಕೊಡಬೇಕಿದೆ.

ಶಾಲೆಗಳು ಪುನಾರಂಭ ಆಗುವ ಹೊತ್ತಿಗಾಗಲೇ ಬಿಸಿಲು ಝಳ ಕಡಿಮೆ ಆಗಿ ಬಹುತೇಕ ಮುಂಗಾರಿನ ಸಿಂಚನ ಆಗುತ್ತಿತ್ತು. ಆದರೆ, ಈ ಬಾರಿ ಬಿಸಿಲ ಧಗೆ ಇನ್ನೂ ಹೆಚ್ಚಿದೆ. ಈಗಲೂ ಜಿಲ್ಲೆಯಲ್ಲಿ 36 ಡಿಗ್ರಿ ತಾಪಮಾನವಿದ್ದು ಮಕ್ಕಳ ಮೇಲೆ ಬಿಸಿಲ ಝಳದ ಪರಿಣಾಮ ಬೀರಲಿದೆ ಎಂದು ಹೇಳಲಾಗುತ್ತಿದೆ. ಒಟ್ಟಾರೆ ಶೈಕ್ಷಣಿಕ ವರ್ಷ ಇಂದಿನಿಂದ ಆರಂಭ ಆಗಲಿದ್ದು ಹಾಡಿ, ಕುಣಿದ ಮಕ್ಕಳು ತಮ್ಮ ಪಾಟಿ ಚೀಲ ಹೆಗಲಿಗೇರಿಸಿಕೊಂಡು ಶಾಲೆ ಕಡೆ ಹಜ್ಜೆ ಹಾಕಲಿದ್ದಾರೆ.