ಇರುವೆಗಳಿಗಿರುವ ಶಿಸ್ತು ಮನುಷ್ಯನಿಗಿಲ್ಲ

ಹರಪನಹಳ್ಳಿ : ಇರುವೆಗಳಿಗೆ ಇರುವ ಶಿಸ್ತು ಮನುಷ್ಯರಿಗಿಲ್ಲ, ಸರ್ವೆ ಪ್ರಕಾರ ಶೇ.60 ರಷ್ಟು ಅಪಘಾತಗಳು ದ್ವಿಚಕ್ರ ವಾಹನಗಳಿಂದಲೇ ಸಂಭವಿಸುತ್ತಿವೆ ಎಂದು ಹೆಚ್ಚುವರಿ ಪೊಲೀಸ್‌ ಅಧೀಕ್ಷಕ ಟಿ.ಜೆ. ಉದೇಶ ಹೇಳಿದರು.

ಪಟ್ಟಣದ ಎಡಿಬಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಪೋಲೀಸ್‌ ಇಲಾಖೆಯಿಂದ ಬುಧವಾರ ಆಯೋಜಿಸಿದ್ದ ವಿದ್ಯಾರ್ಥಿಗಳಿಗೆ ಟ್ರಾಫಿಕ್‌ ನಿಯಮಗಳ ಕುರಿತ ಜಾಗೃತಿ ಕಾರ್ಯಕ್ರಮದಲ್ಲಿ ಉಪನ್ಯಾಸ ನೀಡಿದರು.

ಅಪಘಾತಗಳಿಗೆ ಪಾದಚಾರಿಗಳ, ವಾಹನ ಚಾಲಕರ ವರ್ತನೆ, ವಾಹನಗಳಲ್ಲಿರುವ ದೋಷ, ಪರಿಸರದ ವ್ಯತಿರಿಕ್ತ ಪರಿಣಾಮ ಇವೆಲ್ಲಾ ಕಾರಣಗಳಿರುತ್ತವೆ. 2017 ರ ಸರ್ವೆ ಪ್ರಕಾರ ಶೇ.84 ರಷ್ಟು ಅಪಘಾತಗಳು ಚಾಲಕರ ಅಜಾಗರುಕತೆಯ ಚಾಲನೆಯಿಂದ ಆಗುತ್ತವೆ ಎಂದರು.

ಐಎಸ್‌ಐ ಮಾರ್ಕ್‌ನ ಹೆಲ್ಮೆಟ್‌ನ್ನು ಕಡ್ಡಾಯವಾಗಿ ದ್ವಿಚಕ್ರ ವಾಹನ ಚಾಲಕರು ಧರಿಸಬೇಕು. ರಸ್ತೆಯಲ್ಲಿ ಜಾಗಿಂಗ್‌ ಮಾಡುತ್ತಾರೆ, ಮೊಬೈಲ್‌ನಲ್ಲಿ ಮಾತನಾಡುತ್ತಾ ರಸ್ತೆಯಲ್ಲಿ ಹೋಗುತ್ತಾರೆ, ವಾಹನ ಚಾಲನೆ ಮಾಡುತ್ತಾರೆ. ಈ ಕಾರಣಗಳಿಂದ ಅಪಘಾತಗಳು ಹೆಚ್ಚಾಗುತ್ತಿವೆ. ಆದ್ದರಿಂದ ರಸ್ತೆ ಸುರಕ್ಷಾ ನಿಯಮಗಳನ್ನು ಪ್ರತಿಯೊಬ್ಬರೂ ಪಾಲಿಸಬೇಕು ಎಂದು ತಿಳಿಸಿದರು.

ಪ್ರಾಚಾರ್ಯ ಕೆ.ಮಂಜಣ್ಣ ಅಧ್ಯಕ್ಷ ತೆ ವಹಿಸಿದ್ದರು. ಡಿವೈಎಸ್ಪಿ ನಾಗೇಶ ಐತಾಳು, ಸಿಪಿಐ ಡಿ.ದುರುಗಪ್ಪ, ಪಿಎಸ್‌ಐ ಉಮೇಶ, ಪ್ರಾಧ್ಯಾಪಕ ಬಸವರಾಜ , ಉಪನ್ಯಾಸಕ ಪ್ರಭುದೇವ, ಎಂ.ಬಸವರಾಜ ಇತರರು ಇದ್ದರು.