ಪ್ರೇಮಿಗಳ ದಿನ: ಸಪ್ತಪದಿ ತುಳಿದ ಡಿಸಿ, ಸಿಇಒ

ದಾವಣಗೆರೆ : ದಾವಣಗೆರೆಯ ಜಿಲ್ಲಾಧಿಕಾರಿ ಡಾ.ಬಗಾದಿ ಗೌತಮ್‌ ಮತ್ತು ಜಿಪಂ ಸಿಇಒ ಎಸ್‌. ಅಶ್ವತಿ ಪ್ರೇಮಿಗಳ ದಿನವಾದ ಗುರುವಾರ ಮದುವೆಯಾಗುವ ಮೂಲಕ ದಾಂಪತ್ಯ ಬದುಕಿಗೆ ಅಡಿಯಿಟ್ಟರು.

ಸಿಇಒ ಎಸ್‌. ಅಶ್ವತಿ ಊರಾದ ಕೇರಳದ ಕೊಯಿಕ್ಕೋಡ್‌ನಲ್ಲಿನ ಟ್ಯಾಗೋರ್‌ ಶತಮಾನೋತ್ಸವ ಸಭಾಂಗಣದಲ್ಲಿ ಬೆಳಗ್ಗೆ 10.30ಕ್ಕೆ ವಿವಾಹ ಸರಳವಾಗಿ ನೆರವೇರಿತು. ವಧು ಕೇರಳದ ಸಾಂಪ್ರದಾಯಿಕ ಶೈಲಿಯಲ್ಲಿ ಕೇವಲ 30 ನಿಮಿಷದಲ್ಲಿ ವಿವಾಹ ನೆರವೇರಿತು. ಸಾಂಪ್ರದಾಯಿಕ ಉಡುಗೆ ತೊಟ್ಟು ವರ ಗೌತಮ್‌ ಮದುವೆ ಮನೆಗೆ ಆಗಮಿಸಿದರು. ನಂತರ ಕೇರಳ ಶೈಲಿಯಲ್ಲಿ 15 ನಿಮಿಷದಲ್ಲಿ ಮದುವೆಯ ಎಲ್ಲ ಸಂಪ್ರದಾಯಗಳು ಮುಗಿಸಿ ನಂತರ ವಧು-ವರರು ಹಿರಿಯರ ಆಶೀರ್ವಾದ ಪಡೆದರು. ಎಲ್ಲವೂ ಅರ್ಧ ಗಂಟೆಯಲ್ಲಿ ಮುಗಿಯಿತು. ಜಿಲ್ಲೆಯಿಂದ ಅನೇಕ ಅಧಿಕಾರಿಗಳು ಪಾಲ್ಗೊಂಡಿದ್ದರು. ಫೆ . 17ರ ಸಂಜೆ 7 ಕ್ಕೆ ಡಿಸಿ ಗೌತಮ್‌ ಬಗಾದಿ ಅವರ ಊರಾದ ಆಂಧ್ರಪ್ರದೇಶದ ವಿಶಾಖಪಟ್ಟಣದ ದಿ ಪಾರ್ಕ್‌ ಹೋಟೆಲ್‌ನಲ್ಲಿ ಅರತಕ್ಷತೆ ನಡೆಯಲಿದೆ.

ರಾಯಚೂರಿನಲ್ಲಿ ಡಿಸಿ ಆಗಿದ್ದ ಡಾ. ಬಗಾದಿ ಗೌತಮ್‌ ನಾಲ್ಕು ತಿಂಗಳ ಹಿಂದೆ ದಾವಣಗೆರೆಗೆ ಡಿಸಿಯಾಗಿ ವರ್ಗಾವಣೆ ಆಗಿದ್ದರು. ಎಸ್‌. ಅಶ್ವತಿ ಎರಡು ವರ್ಷದಿಂದ ಇಲ್ಲಿಯೇ ಸಿಇಒ ಆಗಿದ್ದರು. ತಮ್ಮ ಮದುವೆ ಬಗ್ಗೆ ಅವರು ತಿಳಿಸಿದಾಗ ನಮ್ಮ ನಡುವೆ ನಾಲ್ಕು ವರ್ಷದಿಂದ ಸ್ನೇಹವಿತ್ತು. ಈಗ ಸ್ನೇಹಿತನನ್ನು ವಿವಾಹ ಆಗುತ್ತಿರುವುದು ಖುಷಿ ಆಗಿದೆ ಎಂದಿದ್ದರು. ಪ್ರೇಮಿಗಳ ದಿನದಂದು ಸರಳವಾಗಿ ವಿವಾಹ ಆಗುವುದಾಗಿ ಇಬ್ಬರು ತಿಳಿಸಿದ್ದರು.