ದಾವಣಗೆರೆ: ಮಲಿನ ನೀರಿಗೆ ಕೊಕ್ಕೆ, ಸಾರಿಗೆ ಇಲಾಖೆಗೆ ನೋಟಿಸ್‌

ಚಳ್ಳಕೆರೆ: ಇಲ್ಲಿನ ಸಾರಿಗೆ ಡಿಪೋದಲ್ಲಿ ಮಳೆ ನೀರು ಹರಿದು ಹೋಗಲು ಚರಂಡಿ ನಿರ್ಮಿಸಲಾಗಿದೆ. ಅದರ ಮೇಲೆ ಬಸ್‌ ಮೆಕ್ಯಾನಿಕಲ್‌ಗಳಿಗಾಗಿ ಶೌಚಾಲಯ ಮತ್ತು ಸ್ನಾನದ ಗೃಹ ನಿರ್ಮಿಸಲಾಗಿದೆ. ಈ ಸ್ಥಳದ ಬಳಿಯೇ ಬಿಸಿಎಂ ಹಾಸ್ಟೆಲ್‌ನಿಂದ ಕಾಂಪೌಂಡ್‌ ತಳಪಾಯ ಕೊರೆದು ಕೋವಿಡ್‌ ಆಸ್ಪತ್ರೆಯ ಸೋಂಕಿತರು ಬಳಸಿದ ಮಲಿನ ನೀರನ್ನು ಚರಂಡಿಗೆ ಹರಿದು ಬಿಡಲಾಗಿತ್ತು. ಹೀಗಾಗಿ ಜೀವ ಭಯದಿಂದ ಸಾರಿಗೆ ಇಲಾಖೆ ಮಲೀನ ನೀರು ಬರುವುದನ್ನು ಬಂದ್‌ ಮಾಡಿತ್ತು. ಹೀಗಾಗಿ ತಹಸೀಲ್ದಾರ್‌ ಸ್ಥಳಕ್ಕೆ ಹೋಗಿ ತೆರವುಗೊಳಿಸಿ ಎಂದು ಸೂಚಿಸಿದರೂ ಸಾರಿಗೆ ಸಿಬ್ಬಂದಿ ಆರೋಗ್ಯ ದೃಷ್ಟಿಯಿಂದ ತೆರವುಗೊಳಿಸುವುದು ಕಷ್ಟವೆಂದು ಕೈಚೆಲ್ಲಿತ್ತು. ಇದಕ್ಕೆ ಸಿಟ್ಟಿಗೆದ್ದ ಜಿಲ್ಲಾಡಳಿತ ಕಾರಣ ಕೇಳಿ ಮೇ 30ರಂದು ಸಾರಿಗೆ ಇಲಾಖೆಗೆ ನೋಟಿಸ್‌ ಜಾರಿಗೊಳಿಸಿದೆ.

ಜಿಲ್ಲಾಡಳಿತಕ್ಕೆ ಪತ್ರ
ಸೋಂಕಿತರು ಸ್ನಾನ ಮತ್ತು ಶೌಚಕ್ಕೆ ಬಳಸುತ್ತಿರುವ ಮಲೀನ ನೀರು ಡಿಪೋದ ಚರಂಡಿಗೆ ಹರಿಯ ಬಿಟ್ಟಿರುವ ಕಾರಣ ಸಿಬ್ಬಂದಿ ಕರ್ತವ್ಯಕ್ಕೆ ಗೈರು ಆಗುತ್ತಿದ್ದಾರೆ. ಜತೆಗೆ ಡಿಪೋದ ಚರಂಡಿಯೊಳಗೆ ಮಲಿನ ನೀರು ಹರಿಯಲು ಅವಕಾಶ ಮಾಡಿಕೊಟ್ಟಿದೆ ಎಂದು ಜಿಲ್ಲಾಡಳಿತದ ನೋಟಿಸ್‌ಗೆ ಸಾರಿಗೆ ಇಲಾಖೆ ಮೇ31ರಂದು ಉತ್ತರ ನೀಡಿದೆ.