4ತಿಂಗಳಲ್ಲಿ 1399 ಬಾರಿ ದಾಳಿ !

ಧಾರವಾಡ :ಮದ್ಯ ಅಕ್ರಮ ಮಾರಾಟ ಮತ್ತು ಸರಬರಾಜು ಜಿಲ್ಲೆಯಲ್ಲಿ ಯಥೇಚ್ಚವಾಗಿ ನಡೆದಿದೆ. ಕಳೆದ ನಾಲ್ಕೇ ತಿಂಗಳಲ್ಲಿ ಅಬಕಾರಿ ಇಲಾಖೆಯು ಬರೋಬ್ಬರಿ 1,399 ಕಡೆ ದಾಳಿ ನಡೆಸಿ 27 ಸಾವಿರ ಲೀಟರ್‌ ಮದ್ಯ ವಶಪಡಿಸಿಕೊಂಡಿರುವುದು ಇದಕ್ಕೆ ಪುಷ್ಟಿ ನೀಡಿದೆ.

ಸರಕಾರದ ಮೂಲ ಆದಾಯದಲ್ಲಿ ಒಂದಾದ ಅಬಕಾರಿ ಆದಾಯ ಕೋಟಿ ಏರಿಕೆಯಲ್ಲಿದೆ. ಹಾಗೆಯೇ ಜಿಲ್ಲೆಯಲ್ಲಿ ಅಧಿಕೃತ ಬಾರ್‌ ಹಾಗೂ ರೆಸ್ಟೊರೆಂಟ್‌ಗಳಲ್ಲಿ ಮಾತ್ರವಲ್ಲ ಕಿರಾಣಿ, ಚಹಾ ಅಂಗಡಿಗಳಲ್ಲೂ ಅಕ್ರಮ ಮದ್ಯ ಸಿಗುತ್ತಿರುವುದು ಜನರ ನಿದ್ರೆಗೆಡಿಸಿದೆ.

ಜಿಲ್ಲೆಯ ಅಬಕಾರಿ ಇಲಾಖೆಯು 2015ರಿಂದ 2018-19ನೇ ಸಾಲಿನ ಜುಲೈ ತಿಂಗಳವರೆಗೆ ಅಕ್ರಮ ಮದ್ಯ ಮಾರಾಟ ಅಡ್ಡೆಗಳ ಮೇಲೆ ನಡೆಸಿದ ಅಂಕಿಸಂಖ್ಯೆ ಗಮನಿಸಿದರೆ ವರ್ಷದಿಂದ ವರ್ಷಕ್ಕೆ ಮದ್ಯ ಅಕ್ರಮ ಮಾರಾಟ ಹೆಚ್ಚುತ್ತಿರುವುದು ಸ್ಪಷ್ಟವಾಗಿದೆ. ಅಕ್ರಮ ಮದ್ಯಕ್ಕೆ ಹೆಚ್ಚಾಗಿದೆ ಎಂಬುದಕ್ಕೆ ಅಬಕಾರಿ ಇಲಾಖೆಯಲ್ಲಿ ಪ್ರಕರಣಗಳ ದಾಖಲಾತಿ ಹೆಚ್ಚುತ್ತಿರುವುದು ಪುಷ್ಟಿ ನೀಡಿದೆ.

27ವಾಹನ ವಶ

2018 ಏಪ್ರಿಲ್‌ 1ರಿಂದ ಜುಲೈ 31ರವರೆಗೆ ಅಬಕಾರಿ ಇಲಾಖೆ ಅಧಿಕಾರಿಗಳು 1399 ಸ್ಥಳಗಳಲ್ಲಿ ದಾಳಿ ನಡೆಸಿ 365 ಪ್ರಕರಣಗಳನ್ನು ದಾಖಲಿಸಿಕೊಂಡಿದ್ದಾರೆ. ಈ ವೇಳೆ ಭಾರತೀಯ ಮದ್ಯ (ಐಎಮ್‌ಎಲ್‌) 15036.625 ಲೀ, ನಕಲಿ ಮದ್ಯ 9.000 ಲೀ, ಬೀರ್‌ 3504.490 ಲೀಟರ್‌, ಫೆನ್ನಿ 7.5 ಲೀ, ಹೊರ ರಾಜ್ಯದ ಮದ್ಯ 7.13 ಲೀ, ಮದ್ಯಾಸಾರ 37.85 ಲೀ ಜತೆಗೆ 27 ವಾಹನ ವಶಪಡಿಸಿಕೊಂಡಿದ್ದಾರೆ.

2015-16 ರಲ್ಲಿ ಜಿಲ್ಲೆಯ ವ್ಯಾಪ್ತಿಯಲ್ಲಿ ಸುಮಾರು 20 ಸಾವಿರ ಅಕ್ರಮ ಮದ್ಯ ಹಾಗೂ 11 ವಾಹನಗಳನ್ನು ವಶಪಡಿಸಿಕೊಂಡರೆ 2016-17 ಹಾಗೂ 2017-18ರಲ್ಲಿ ಸಾವಿರ ಲೀಟರ್‌ ಗಡಿ ದಾಟಿಲ್ಲ. (2017ರಲ್ಲಿ 60ಸಾವಿರ ಲೀಟರ್‌ ಮದ್ಯಸಾರ ವಶಪಡಿಸಿಕೊಂಡಿರುವುದು ಬೇರೆ ವಿಚಾರ ) ಅದಾದ ಬಳಿಕ ಈಗ ಬರೀ ನಾಲ್ಕೇ ತಿಂಗಳಲ್ಲಿ 27ಸಾವಿರ ಲೀಟರ್‌ ಅಕ್ರಮ ಮದ್ಯ ವಶಪಡಿಸಿಕೊಳ್ಳಲಾಗಿದೆ. ಬಹುತೇಕ ಪ್ರಕರಣಗಳು ವಾಹನಗಳಲ್ಲಿ ಮದ್ಯ ಸಾಗಾಟ ಮಾಡುತ್ತಿರುವಾಗಲೇ ವಶಕ್ಕೆ ಪಡೆಯಲಾಗಿದೆ ಎಂಬುದು ಗಮನಾರ್ಹ.