ಧಾರವಾಡ-ಬೆಳಗಾವಿ ರೈಲು ಮಾರ್ಗಕ್ಕೆ 988 ಕೋಟಿ

ಕಾಶಪ್ಪ ಕರದಿನ
ಹುಬ್ಬಳ್ಳಿ: ದಶಕಗಳ ಬೇಡಿಕೆಯಾಗಿರುವ ಧಾರವಾಡ-ಬೆಳಗಾವಿ ನೇರ ರೈಲು ಮಾರ್ಗ ನಿರ್ಮಾಣಕ್ಕೆ ಡಿಪಿಆರ್‌ ಸಿದ್ಧಪಡಿಸಿರುವ ನೈರುತ್ಯ ರೈಲ್ವೆ ವಲಯ, ಒಟ್ಟು 988 ಕೋಟಿ ರೂ. ವೆಚ್ಚದ ಅಂದಾಜು ಪಟ್ಟಿ ತಯಾರಿಸಿ ಕೇಂದ್ರ ಕಚೇರಿಗೆ ಕಳುಹಿಸಿದೆ.

ನೈರುತ್ಯ ರೈಲ್ವೆ ವಲಯವು ರೈಲ್ವೆ ಮಂಡಳಿಗೆ ಯೋಜನಾ ವರದಿ ರವಾನಿಸಿದ್ದು, ಮಂಡಳಿಯು ಪರಿಶೀಲನೆ ನಡೆಸಿ ಕಡತವನ್ನು ರೈಲ್ವೆ ಇಲಾಖೆಗೆ ಕಳುಹಿಸಿದೆ. ಹೀಗಾಗಿ 2020-21ನೇ ಸಾಲಿನ ಕೇಂದ್ರ ಬಜೆಟ್‌ದಲ್ಲಿಈ ಯೋಜನೆ ಸೇರ್ಪಡೆಗೊಳ್ಳುವ ಬಹಳಷ್ಟು ನಿರೀಕ್ಷೆಗಳನ್ನು ಹುಟ್ಟು ಹಾಕಿದೆ ಎಂದು ಮೂಲಗಳು ತಿಳಿಸಿವೆ.

ರೈಲ್ವೆ ಮಾರ್ಗ ನಿರ್ಮಾಣಕ್ಕೆ ಸಂಬಂಧಿಸಿ ಕರ್ನಾಟಕ ರೈಲ್ವೆ ಮೂಲ ಸೌಕರ್ಯ ಅಭಿವೃದ್ಧಿ ಕಂಪನಿ(ಕೆ-ರೈಡ್‌)ಯು ಕಳೆದ ಅಕ್ಟೋಬರ್‌-ನವೆಂಬರ್‌ ತಿಂಗಳಲ್ಲಿಅಂತಿಮ ಸ್ಥಳ ಸಮೀಕ್ಷೆ ನಡೆಸಿತ್ತು.

ಸಮೀಕ್ಷೆಯಲ್ಲಿಧಾರವಾಡ-ಬೆಳಗಾವಿ ರೈಲು ಮಾರ್ಗಕ್ಕೆ ಒಟ್ಟು 90 ಕಿ.ಮೀ. ಅಂತರ ಗುರುತಿಸಿದ್ದು, 988 ಕೋಟಿ ರೂ. ವೆಚ್ಚದಲ್ಲಿಈ ರೈಲು ಮಾರ್ಗ ಮತ್ತು ಸೇತುವೆಗಳನ್ನು ನಿರ್ಮಿಸಬಹುದಾಗಿದೆ ಎಂದು ಕೆ-ರೈಡ್‌ ಅಂದಾಜಿಸಿದೆ.

ಒಂದೊಮ್ಮೆ ಈ ಮಾರ್ಗ ನಿರ್ಮಾಣವಾದರೆ ಧಾರವಾಡ, ಕ್ಯಾರಕೊಪ್ಪ, ಕಿತ್ತೂರ, ಬಾಗೇವಾಡಿ, ಎಂ.ಕೆ. ಹುಬ್ಬಳ್ಳಿ, ಕೆ.ಕೆ. ಕೊಪ್ಪ, ಯಳ್ಳೂರ ಮಾರ್ಗವಾಗಿ ರೈಲು ಬೆಳಗಾವಿ ತಲಪುವುದು.

ರೈಲ್ವೆ ಖಾತೆ ರಾಜ್ಯ ಸಚಿವ ಸುರೇಶ ಅಂಗಡಿ ವಿಶೇಷ ಮುತುವರ್ಜಿ ವಹಿಸಿದ ಹಿನ್ನೆಲೆಯಲ್ಲಿತ್ವರಿತ ಗತಿಯಲ್ಲಿಸಮೀಕ್ಷೆ ಮತ್ತು ವಿಸ್ತೃತ ವರದಿ ಸಲ್ಲಿಕೆಯಾಗಿದೆ. ಅನುಮೋದನೆಗೆ ಬೇಕಾಗುವ ಪ್ರಕ್ರಿಯೆಗಳನ್ನು ಪೂರೈಸಲಾಗಿದೆ. ಹೀಗಾಗಿ ಕಡಿಮೆ ಅವಧಿಯಲ್ಲೂಈ ಯೋಜನೆ ಕಾರ್ಯಗತಗೊಳಿಸುವ ಇರಾದೆಯನ್ನು ಸಚಿವರು ಹೊಂದಿದ್ದಾರೆ ಎಂದು ವಲಯದ ಅಧಿಕಾರಿಗಳು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಈ ಮೊದಲು 2013-14ನೇ ಸಾಲಿನಲ್ಲಿಬೆಳಗಾವಿ-ಧಾರವಾಡ ಮಾರ್ಗ ಸಮೀಕ್ಷೆ ನಡೆಸಲಾಗಿತ್ತಾದರೂ ಅದರ ವರದಿ ಕಾರ್ಯಗತಗೊಳಿಸುವುದು ಇರಲಿ, ಅದರ ಬಗ್ಗೆ ಹೆಚ್ಚು ಚರ್ಚೆ ನಡೆಯಲೇ ಇಲ್ಲ. ಅಲ್ಲದೇ ಖರ್ಚು ವೆಚ್ಚದ ಕುರಿತ ಮಾಹಿತಿಯೂ ದೊರೆತಿರಲಿಲ್ಲ.

140 ಸೇತುವೆ, 11 ನಿಲ್ದಾಣ
ಈ ರೈಲು ಮಾರ್ಗದಲ್ಲಿಒಟ್ಟು 140 ಬ್ರಿಜ್ಡ್‌ಗಳನ್ನು ನಿರ್ಮಿಸಲಾಗುತ್ತದೆ. ಇದರಲ್ಲಿ11 ಬೃಹತ್‌ ಬ್ರಿಜ್ಡ್‌ಗಳು, 15 ರಸ್ತೆ ಮೇಲ್ಸೇತುವೆಗಳು ಸೇರಿವೆ. ಮೇಲ್ಸೇತುವೆ ನಿರ್ಮಾಣದಿಂದ ಲೆವೆಲ್‌ ಕ್ರಾಸಿಂಗ್‌ ಗೇಟ್‌ಗಳ ನಿರ್ಮಾಣದ ಅವಶ್ಯಕತೆ ಬರುವುದಿಲ್ಲಎಂಬ ಅಭಿಪ್ರಾಯ ವ್ಯಕ್ತವಾಗಿದೆ. ಈ ಮಾರ್ಗದಲ್ಲಿಪ್ರಮುಖ 11 ರೈಲ್ವೆ ನಿಲ್ದಾಣಗಳನ್ನು ನಿರ್ಮಿಸಲು ಸ್ಥಳ ಗುರುತಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.