ಅಲ್ಲಾಪುರ: ಮನೆಗಳಿಗೆ ನುಗ್ಗಿದ ನೀರು

ಕುಂದಗೋಳ : ತಾಲೂಕಿನ ಅಲ್ಲಾಪುರ ಗ್ರಾಮದಲ್ಲಿ ಶನಿವಾರ ಹಾಗೂ ಭಾನುವಾರ ಸುರಿದ ಮಳೆ ನೀರು ಗಟಾರ್‌ ಇಲ್ಲದೆ ರಸ್ತೆ ಮಧ್ಯೆಯೇ ಹರಿದು 10ಕ್ಕೂ ಹೆಚ್ಚು ಮನೆಗಳಿಗೆ ನುಗ್ಗಿದೆ.

ಗ್ರಾಮದ ನಿಂಗಪ್ಪ ಹೊರಟ್ಟಿ, ಸಿದ್ದು ಯಲಿವಾಳ, ನಿಂಗಪ್ಪ ಯಲಿವಾಳ, ರಾಜು ನದಾಫ್‌, ಈರಪ್ಪ ದಳವಾಯಿ, ಗುರುಸಿದ್ದಪ್ಪ ಕಟವಿ ಅವರ ಮನೆಗಳು ಸೇರಿದಂತೆ 10ಕ್ಕೂ ಹೆಚ್ಚು ಮನೆಗಳಿಗೆ ನೀರು ನುಗ್ಗಿದೆ.

ಗ್ರಾಮ ಚಿಕ್ಕದಾಗಿದ್ದರೂ ಕಾಂಕ್ರೀಟ್‌ ರಸ್ತೆ ಇದೆ. ಆದರೆ ಪಕ್ಕದಲ್ಲೇ ಗಟಾರ್‌ ಇಲ್ಲದ್ದರಿಂದ ಮಳೆ ನೀರು ಮನೆಗೆ ನುಗ್ಗಿ, ಸಾಕಷ್ಟು ಅವಾಂತರ ಸೃಷ್ಟಿಸಿದೆ. ಮನೆಯಲ್ಲಿನ ನೀರು ಹೊರ ಹಾಕಲು ಪರದಾಡುವಂತಾಗಿ, ಯುವಕರು ನೀರನ್ನು ಬೇರೆಡೆಗೆ ಸಾಗಿಸಲು ಯತ್ನಿಸಿದರು. ಇದರಿಂದ ಸಂಚಾರಕ್ಕೆ ತೊಂದರೆಯಾಗಿದ್ದು, ಸಂಬಂಧಿಸಿದ ಅಧಿಕಾರಿಗಳು ಇತ್ತ ಗಮನ ಹರಿಸದಿರುವುದು ಸೋಚನೀಯ.