ತರಕಾರಿ ವ್ಯಾಪಾರಸ್ಥರ ಸ್ಥಳಾಂತರಕ್ಕೆ ಮಾ.31ರವರೆಗೆ ಅವಕಾಶ

ಧಾರವಾಡ : ಹಳೆ ಎಪಿಎಂಸಿ ಬಳಿಯ ತರಕಾರಿ ವ್ಯಾಪಾರಸ್ಥರು ಮಾ.31ರೊಳಗೆ ನೂತನ ಎಪಿಎಂಸಿಗೆ ಸ್ಥಳಾಂತರಗೊಳ್ಳದಿದ್ದರೆ ಅವರ ಅಂಗಡಿಗಳನ್ನು ಮುಟ್ಟುಗೋಲು ಹಾಕುವುದಾಗಿ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿ ಅಧ್ಯಕ್ಷ ಮಹಾವೀರ ಜೈನರ್‌ ಎಚ್ಚರಿಕೆ ನೀಡಿದರು.

ನಗರದಲ್ಲಿ ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ನೂತನ ಎಪಿಎಂಸಿಯಲ್ಲಿ ವ್ಯಾಪಾರಸ್ಥರಿಗೆ 93 ಅಂಗಡಿ ನೀಡಲಾಗಿದೆ. ಈಗಾಗಲೇ ಸ್ಥಳಾಂತರವಾಗುವಂತೆ ನೋಟಿಸ್‌ ನೀಡಿದರೂ ಸೂಕ್ತ ಸ್ಪಂದನೆ ನೀಡದ ಕಾರಣ ಕೆಲವರ ಪರವಾನಗಿ ಅಮಾನತ್ತಿನಲ್ಲಿಡಲಾಗಿತ್ತು. ಫೆ.5ರಂದು 5ಜನರ ಎಪಿಎಂಸಿ ಲೈಸನ್ಸ್‌ ರದ್ದು ಮಾಡಲಾಗಿದೆ ಎಂದು ತಿಳಿಸಿದರು.

ಕಳೆದ 2 ದಿನಗಳ ಹಿಂದೆ ನಡೆದ ಸಭೆಯಲ್ಲಿ ವ್ಯಾಪಾರಸ್ಥರು ಸ್ಥಳಾಂತರಕ್ಕೆ 6 ತಿಂಗಳು ಅವಕಾಶ ಕೇಳಿದ್ದರು. ಆದರೆ, ಇದಕ್ಕೆ ಒಪ್ಪಿಗೆ ನೀಡದೆ ಮಾ.31ರವರೆಗೆ ಅವಕಾಶ ನೀಡಲಾಗಿದೆ. ಒಂದು ವೇಳೆ ನಿಗದಿತ ದಿನಾಂಕದಂದು ಬರದಿದ್ದರೆ ಎಪಿಎಂಸಿ ಕಾಯ್ದೆ ಪ್ರಕಾರ ಅಂಗಡಿ ಮುಟ್ಟುಗೋಲು ಹಾಕಲು ನಿರ್ಧರಿಸಲಾಗಿದೆ ಎಂದರು.

ವ್ಯಾಪಾರಸ್ಥರು ರೈತರಿಗೆ ಕೇವಲ ಬಿಳಿ ಚೀಟಿ ಮೇಲೆ ಬಿಲ್‌ ಬರೆದು ಕೊಟ್ಟರೆ ಸಾಲದು. ಪರವಾನಗಿ, ಅಂಗಡಿ ಸಂಖ್ಯೆ ಹೊಂದಿರುವ ಅಧಿಕೃತ ಬಿಲ್‌ ಮೂಲಕ ಹಣದ ವ್ಯವಹಾರ ನಡೆಸುವಂತೆ ಎಚ್ಚರಿಕೆ ನೀಡಲಾಗುವುದು ಎಂದರು.

ರೈತರಿಂದ ಅನಧಿಕೃತವಾಗಿ ಕಮೀಶನ್‌ ಪಡೆಯುವ ಕುರಿತು ಏಪ್ರಿಲ್‌ನಿಂದ ಸೂಕ್ತ ಕ್ರಮ ಕೈಗೊಳ್ಳಲು ಮುಂದಾಗುತ್ತೇವೆ. ಅಂಗಡಿಗಳ ಬಾಡಿಗೆ ನೀಡಬೇಕಿರುವ ಹಾಗೂ ಬೇರೆಯವರಿಗೆ ಅಂಗಡಿ ಬಾಡಿಗೆ ನೀಡಿರುವ ಬಗ್ಗೆ ವಿಚಾರಿಸಲು ತೀರ್ಮಾನಿಸಲಾಗಿದೆ. ಬಾಡಿಗೆ ಪಡೆದು ಬೇರೆಯವರಿಗೆ ನೀಡಿದವರ ಬಗ್ಗೆ ಸಮಗ್ರ ಪರಿಶೀಲಿಸಲಾಗುವುದು. ಒಂದು ವೇಳೆ ಅಂಗಡಿದಾರರು ಎಪಿಎಂಸಿ ಕಾಯ್ದೆಗೆ ವಿರುದ್ಧವಾಗಿ ನಡೆದುಕೊಂಡಲ್ಲಿ 15ದಿನದೊಳಗೆ ಅಂಗಡಿಗೆ ಬೀಗ ಹಾಕಲಾಗುವುದು ಎಂದರು.

ಸುದ್ದಿಗೋಷ್ಠಿಯಲ್ಲಿ ಮಾಜಿ ಅಧ್ಯಕ್ಷ ಸಿದ್ದಪ್ಪ ಪ್ಯಾಟಿ, ಉಪಾಧ್ಯಕ್ಷೆ ಬಸವ್ವ ಶಿರಕೋಳ, ಸದಸ್ಯರಾದ ರೇಣುಕಾ ಕಳ್ಳಿಮನಿ, ಬಸಪ್ಪ ಮೇಗಡೆ, ಅಜ್ಜಪ್ಪಗೌಡ ಪಾಟೀಲ ಇದ್ದರು.