ಎಪಿಎಂಸಿ ಚುನಾವಣೆ ಫಲಿತಾಂಶ ಹೈಕೋರ್ಟ್‌ ಅಂಗಳಕ್ಕೆ

ಧಾರವಾಡ: ಧಾರವಾಡ ಎಪಿಎಂಸಿ ಅಧ್ಯಕ್ಷ, ಉಪಾಧ್ಯಕ್ಷರ ಆಯ್ಕೆಗೆ ಮತದಾನ ಪ್ರಕ್ರಿಯೆ ಮುಗಿದಿದೆ. ಆದರೆ ಈಗ ಫಲಿತಾಂಶ ಪ್ರಕಟಿಸಬೇಕೊ ಬೇಡವೋ ಎಂಬುದರ ಕುರಿತಂತೆ ಕಾನೂನು ಸಲಹೆ ಕೇಳಿರುವ ಚುನಾವಣಾ ಅಧಿಕಾರಿಗಳು ಸೋಮವಾರ ಹೈಕೋರ್ಟ್‌ಗೆ ಚುನಾವಣೆ ಪ್ರಕ್ರಿಯೆಯ ನಡಾವಳಿಯನ್ನು ಸಲ್ಲಿಸಿದ್ದಾರೆ.

ಧಾರವಾಡ ಎಪಿಎಂಸಿ ಅಧ್ಯಕ್ಷ ಉಪಾಧ್ಯಕ್ಷರ ಚುನಾವಣೆಯಲ್ಲಿ16 ಸದಸ್ಯರು ಶನಿವಾರ ಮತ ಚಲಾಯಿಸಿದ್ದಾರೆ. ಇಲ್ಲಿಹೈಕೋರ್ಟ್‌ ನಿರ್ದೇಶನದ ಮೇರೆಗೆ ಒಬ್ಬ ಸದಸ್ಯನಿಗೆ ಮತ ಚಲಾಯಿಸಲು ಅವಕಾಶ ಕಲ್ಪಿಸಲಾಗಿತ್ತು. ಈಗ ಫಲಿತಾಂಶ ಪ್ರಕಟಿಸುವ ಕುರಿತು ಚುನಾವಣಾ ಅಧಿಕಾರಿಗಳು ಹೈಕೋರ್ಟ್‌ನಿಂದ ಕಾನೂನು ಸಲಹೆ ಕೇಳಿದ್ದಾರೆ.

ಶ್ರೀಮೃತ್ಯುಂಜಯ ಹತ್ತಿ ಸಂಸ್ಕರಣ ಸಂಘ ನಿಯಮಿತ ಧಾರವಾಡದ ಪ್ರತಿನಿಧಿಯಾಗಿ ದೀಪಕ ಚಿಂಚೋರೆ ಎಪಿಎಂಸಿ ಸದಸ್ಯತ್ವ ಪಡೆದಿದ್ದರು. ಆದರೆ, ಸರಕಾರ ಇವರನ್ನು ಮತದಾನ ಪ್ರಕ್ರಿಯೆಯಿಂದ ಹೊರಗಿಟ್ಟು ಆದೇಶಿಸಿತ್ತು. ಆಗ ಚಿಂಚೋರೆ ಹೈಕೋರ್ಟ್‌ ಮೆಟ್ಟಿಲೇರಿದ್ದರು. ಇವರಿಗೆ ಮತ ಚಲಾಯಿಸಲು ಅವಕಾಶ ನೀಡುವಂತೆ ಕೋರ್ಟ್‌ ನಿರ್ದೇಶನ ನೀಡಿದ್ದರಿಂದ ಚುನಾವಣಾ ಅಧಿಕಾರಿಗಳು ಮತದಾನ ಮಾಡಲು ಅವಕಾಶ ಕಲ್ಪಿಸಿದ್ದರು. ಈಗ ಫಲಿತಾಂಶ ಪ್ರಕಟಿಸುವ ಕುರಿತು ಸ್ವತಃ ಚುನಾವಣಾಧಿಕಾರಿಗಳಿಗೆಯೇ ಗೊಂದಲ ಇರುವುದರಿಂದ ಫಲಿತಾಂಶ ವಿಳಂಬವಾಗಿದೆ.

ಈ ಕುರಿತು ವಿಕ ಜತೆ ಮಾತನಾಡಿದ ಚುನಾವಣಾಧಿಕಾರಿಯೂ ಆಗಿರುವ ತಹಸೀಲ್ದಾರ ಸಂತೋಷ ಬಿರಾದಾರ, ಚುನಾವಣೆ ಪ್ರಕ್ರಿಯೆಯ ನಡಾವಳಿಗಳನ್ನು ಸೋಮವಾರ ಹೈಕೋರ್ಟ್‌ಗೆ ಸಲ್ಲಿಸಿದ್ದೇವೆ. ಇನ್ನೆರಡು ದಿನಗಳಲ್ಲಿಈ ಕುರಿತು ಕೋರ್ಟ್‌ನಲ್ಲಿವಿಚಾರಣೆ ನಡೆಯಬಹುದು. ಕೋರ್ಟ್‌ ನಿರ್ದೇಶನದಂತೆ ಆ ನಂತರದಲ್ಲಿಫಲಿತಾಂಶ ಪ್ರಕಟಿಸಲಾಗುವುದು ಎಂದರು.

ಕಣದಲ್ಲಿ ಬಿಜೆಪಿ, ಕಾಂಗ್ರೆಸ್‌
ಸದ್ಯ ಅಧ್ಯಕ್ಷ ಸ್ಥಾನಕ್ಕೆ ಬಿಜೆಪಿಯಿಂದ ಬಸಪ್ಪ ಹೊಸೂರ, ಉಪಾಧ್ಯಕ್ಷ ಸ್ಥಾನಕ್ಕೆ ಕೃಷ್ಣಾ ಕೊಳ್ಳಾನಟ್ಟಿ ಮತ್ತು ಕಾಂಗ್ರೆಸ್‌ ನಿಂದ ಅಧ್ಯಕ್ಷ ಸ್ಥಾನಕ್ಕೆ ಮಹಾವೀರ ಜೈನ, ಉಪಾಧ್ಯಕ್ಷ ಸ್ಥಾನಕ್ಕೆ ಬಸವ್ವ ಶಿರಕೋಳ ಸ್ಪರ್ಧೆಯಲ್ಲಿದ್ದಾರೆ.