ಹೋಳಿ ಬಂತುರೀ, ಹಲಿಗಿ...ಹೊಡೀರಿ

ಹುಬ್ಬಳ್ಳಿ : ಹುಬ್ಬಳ್ಳಿ ಹೋಳಿ ಹಬ್ಬಕ್ಕೂ ಹಲಿಗೆಗೆ ಎಲ್ಲಿಲ್ಲದ ನಂಟು. ಹೋಳಿ ಹಬ್ಬ ಬರುವ ಹದಿನೈದು ದಿನಗಳಿಂದಲೇ ಚರ್ಮದ ವಾದ್ಯಗಳಲ್ಲಿ ಒಂದಾದ ಹಲಿಗೆ ಬಾರಿಸುವುದು ವಾಡಿಕೆ. ಅದರಲ್ಲೂ ಹುಬ್ಬಳ್ಳಿ ಹೋಳಿ ರಂಗು ಉತ್ತರ ಕರ್ನಾಟಕದಲ್ಲಿಯೇ ವಿಶೇಷ.

ಹೋಳಿ ಹಬ್ಬದಲ್ಲಿ ಕಾಣಸಿಗುವ ಚರ್ಮದ ಹಲಿಗೆ ಕ್ರಮೇಣ ಕಡಿಮೆಯಾಗುತ್ತಿದ್ದು, ಅದರ ಜಾಗೆಯಲ್ಲಿ ಮಹಾರಾಷ್ಟ್ರದ ಮಿರಜ್, ಬೆಂಗಳೂರು ಹಾಗೂ ದಾವಣಗೆರೆಯ ಫೈಬರ್ ಹಲಿಗೆಗಳು ದಾಂಗುಡಿ ಇಟ್ಟಿವೆ. ನೋಡಲು ಆಕರ್ಷಕ ಹಾಗೂ ಒಳ್ಳೆಯ ಸದ್ದು ಕೊಡುವ ಈ ಹಲಿಗೆಗಳು ಕಡಿಮೆ ಅವಧಿಯಲ್ಲಿ ಹೆಚ್ಚು ಜನಪ್ರಿಯಗೊಳ್ಳುತ್ತಿವೆ.

ವಾರದಿಂದ ಬೀಡು ಇಂತಹ ಹಲಿಗೆಗಳನ್ನು ಮಾರಾಟ ಮಾಡಲು ಚನ್ನದಾಸ ಸಮುದಾಯದವರು ಪ್ರಮುಖರು. ಇವರ ಮೂಲ ಕಸಬು ತಬಲಾ, ಡಗ್ಗಾ, ಮೃದಂಗ, ಡೋಲಕ್ಕ, ಹಾರ್ಮೋನಿಯಂ, ಡೊಳ್ಳು, ಡ್ರಮ್ ಹಾಗೂ ಚರ್ಮದ ಹಲಿಗೆ ದುರಸ್ತಿ ಮಾಡುವುದಾಗಿದೆ. ಈ ಕುಟುಂಬಗಳು ಗದಗ, ಮುಂಡರಗಿ, ಗುತ್ತಲ, ಹಾನಗಲ್ಲ ಸುತ್ತಮುತ್ತ ಹೆಚ್ಚು ವಾಸಿಸುತ್ತಿದ್ದು, ಹೋಳಿ ಹಬ್ಬದ ಸಂದರ್ಭದಲ್ಲಿ ಹುಬ್ಬಳ್ಳಿಯಂತಹ ಪ್ರಮುಖ ಮಾರುಕಟ್ಟೆಯಲ್ಲಿ ತಮ್ಮ ವ್ಯಾಪಾರವನ್ನು ವಿಸ್ತರಿಸಿಕೊಳ್ಳುತ್ತಾರೆ. ಪ್ರತಿ ವರ್ಷವೂ ಹೋಳಿ ಸೀಜನ್‌ಗೆ ಹುಬ್ಬಳ್ಳಿ ನಗರಕ್ಕೆ ಬರುವ ಇವರು, ಈಗಾಗಲೇ ಒಂದು ವಾರದಿಂದ ಹುಬ್ಬಳ್ಳಿಯಲ್ಲಿ ಬೀಡು ಬಿಟ್ಟು ತಮ್ಮ ಹಲಿಗೆ ವ್ಯಾಪಾರ ಆರಂಭಿಸಿದ್ದಾರೆ. ಮೊದಲ ಮೊದಲು ಚರ್ಮದ ಹಲಿಗೆಗಳನ್ನು ಮಾರಾಟ ಮಾಡುತ್ತಿದ್ದ ಅವರು, ಈಗ ಚರ್ಮದ ಹಲಿಗೆ ಮಾಡುವವರು ಹಾಗೂ ಮಾರಾಟ ಮಾಡುವವರ ಸಂಖ್ಯೆ ಕಡಿಮೆ ಆಗಿದ್ದರಿಂದ ಚರ್ಮದ ಹಲಿಗೆಯನ್ನು ಹೋಲುವ ಫೈಬರ್ ಹಲಿಗೆಯನ್ನು ಮಹಾರಾಷ್ಟ್ರದ ಮೀರಜ್‌ನಿಂದ ತಂದು ಮಾರಾಟ ಮಾಡುತ್ತಾರೆ.

ಈ ಜನ ಕೇವಲ ಹುಬ್ಬಳ್ಳಿಗೆ ಮಾತ್ರ ಸೀಮಿತವಾಗದೇ ಹೋಳಿ ಹಬ್ಬದ ಸೀಜನ್‌ನಲ್ಲಿ ಬೆಂಗಳೂರ, ದಾವಣಗೆರೆ ಹಾಗೂ ರಾಣೇಬೆನ್ನೂರ, ದಾವಣಗೆರೆ ಸೇರಿದಂತೆ ಪ್ರಮುಖ ನಗರಗಳಲ್ಲಿ ತಮ್ಮ ವಹಿವಾಟು ನಡೆಸುತ್ತಾರೆ. ಈಗಾಗಲೇ ಹುಬ್ಬಳ್ಳಿ ಹಾಗೂ ಸುತ್ತಮುತ್ತಲಿನ ಊರುಗಳಾದ ಕುಂದಗೋಳ ಸೇರಿದಂತೆ ಪ್ರಮುಖ ನಗರಗಳಿಗೆ ಕುಟುಂಬ ಸಮೇತ ತೆರಳಿ ಹಲಿಗೆ ಮಾರುತ್ತಾರೆ.

ವಿಶೇಷ ಮೆರಗು ಹೋಳಿ ಹಬ್ಬದಲ್ಲಿ ಹಲಿಗೆಗೆ ವಿಶೇಷ ಸ್ಥಾನವಿದೆ. ಮಕ್ಕಳು, ಯುವಕರು ಆದಿಯಾಗಿ ವಯಸ್ಕರು ಸಹ ಹಲಿಗೆ ಬಾರಿಸಿ ಸಂತೋಷ ಪಡುತ್ತಾರೆ. ಇವರ ಸಂತೋಷ ಇಮ್ಮಡಿಗೊಳಿಸುವ ಕೆಲಸವನ್ನು ಚನ್ನದಾಸ ಸಮುದಾಯದವರು ಕಳೆದ ಹಲವಾರು ವರ್ಷಗಳಿಂದ ಮಾಡುತ್ತಾ ಬಂದಿದ್ದಾರೆ. ಆದರೆ, ಚರ್ಮದ ವಾದ್ಯದಲ್ಲಿ ಬಾರಿಸುವ ಖುಷಿ ಫೈಬರ್ ಹಲಿಗೆಗಳಲ್ಲಿ ಬರುವುದಿಲ್ಲ. ಆದರೂ ಮಾರುಕಟ್ಟೆಯಲ್ಲಿ ಜನರು ಸುಂದರವಾಗಿದ್ದನ್ನು ಬಯಸುತ್ತಾರೆ. ಅದೇ ಕಾರಣಕ್ಕೆ ನಾವು ಕೂಡಾ ಜನರ ಬಯಕೆಗೆ ತಕ್ಕಂತೆ ಫೈಬರ್ ಹಲಿಗೆ ಮಾರಾಟ ಮಾಡಲು ಮುಂದಾಗಿದ್ದೇವೆ ಎನ್ನುತ್ತಾರೆ ಹಲಿಗೆ ಮಾರಾಟಗಾರ ಹನುಮಂತಪ್ಪ. ಹುಬ್ಬಳ್ಳಿ ನಗರದ ಕೋರ್ಟ್ ವೃತ್ತ, ಜನತಾ ಬಜಾರ್ ಸೇರಿದಂತೆ ಅಲ್ಲಲ್ಲಿ ಹೋಳಿ ಹಲಿಗೆ ಮಾರಾಟ ಮಾಡುವ ಪ್ರಮುಖ ಸ್ಥಳಗಳಾಗಿವೆ. ಹೀಗೆ ಹೋಳಿ ಹಲಿಗೆ ಮಾರಲು ಬಂದ ಇವರು ಬೆಳಗ್ಗೆಯಿಂದ ಸಂಜೆವರೆಗೆ ಮಾರಾಟ ಮಾಡುತ್ತೇವೆ ಎನ್ನುತ್ತಾರೆ ಅವರು.

ಹಲಿಗೆಗಳ ದರ ಚಿಕ್ಕ ಹಲಿಗೆ ದರ 60 ರೂ., ಸ್ವಲ್ಪ ದೊಡ್ಡ ಹಲಿಗೆ ದರ 80, 100 ರೂ. ವರೆಗೆ ಇದೆ. ಇದಕ್ಕಿಂತಲೂ ದೊಡ್ಡ ಹಲಿಗೆಯ ದರವು 300 ರೂ. ವರೆಗೂ ಇದೆ. ಅತಿ ದೊಡ್ಡದಾದ ಹಲಿಗೆ ದರವು 600 ರೂ. ವರೆಗೂ ಇದೆ. ಹುಬ್ಬಳ್ಳಿ ರಂಗಿನಾಟ ರಂಗೇರಿಸಲು ಈ ಹಲಿಗೆಗಳು ಪೂರಕವಾಗುತ್ತವೆ. ಆದ್ದರಿಂದ ನಗರದ ಮಹಾ ಜನತೆ ಬಹಳಷ್ಟು ಸಂಖ್ಯೆಯಲ್ಲಿ ಹಲಿಗೆ ಖರೀದಿಸಿ ಇವರ ವ್ಯಾಪಾರ ವೃದ್ಧಿಗೆ ಕಾರಣರಾಗಿ ಆ ಮೂಲಕ ಹೋಳಿಯನ್ನು ಸೌಹಾರ್ದಯುತವಾಗಿ ಆಚರಿಸೋಣ.