ಬಿಹಾರ ಮೂಲದವರಿಗೆ ಟೆಂಡರ್‌ ಬೇಡ

ಹುಬ್ಬಳ್ಳಿ : ಹು-ಧಾ ಮಹಾನಗರ ಪಾಲಿಕೆ ಬಿಹಾರ ಮೂಲದವರಿಗೆ ಟೆಂಡರ್‌ ನೀಡುತ್ತಿರುವುದನ್ನು ವಿರೋಧಿಸಿ ಉತ್ತರ ಕರ್ನಾಟಕ ಅಭಿವೃದ್ಧಿ ಹೋರಾಟ ಸೇನೆ ಸೋಮವಾರ ಪ್ರತಿಭಟನೆ ನಡೆಸಿತು.

ಇಲ್ಲಿಯ ಪಾಲಿಕೆ ಆವರಣದಲ್ಲಿ ಪ್ರತಿಭಟನೆ ನಡೆಸಿದ ಸೇನೆ ಪದಾಧಿಕಾರಿಗಳು, ಪಾಲಿಕೆ ಅಧಿಕಾರಿ ವರ್ಗದ ವಿರುದ್ಧ ಘೋಷಣೆ ಕೂಗಿ ಆಡಳಿತ ವ್ಯವಸ್ಥೆ ವಿರುದ್ಧ ಕಿಡಿಕಾರಿದರು. ನಂತರ ಪಾಲಿಕೆ ಆಯುಕ್ತರು ಮನವಿ ಸಲ್ಲಿಸಿದರು.

ಪಾಲಿಕೆ ವತಿಯಿಂದ ಪ್ಯಾಕೇಜ್‌ ಮಾದರಿಯಲ್ಲಿ ಟೆಂಡರ್‌ ಆಗಿದ್ದರೂ, ಅವುಗಳನ್ನು ತೆಗೆದು ಹಾಕಿ ಬಿಹಾರ ಮೂಲದವರಿಗೆ ಕಸ ವಿಲೇವಾರಿ ಮತ್ತು ಘನತಾಜ್ಯ ವಿಭಾಗದ ಅಧಿಕಾರಿಗಳು ಟೆಂಡರ್‌ ನೀಡಿದ್ದಾರೆ. ಅವರಿಂದ ಹಣ ಪಡೆದು ಸ್ಥಳೀಯ ಗುತ್ತಿಗೆದಾರರಿಗೆ ಅನ್ಯಾಯ ಮಾಡಲಾಗುತ್ತಿದೆ. ಅಲ್ಲದೆ, ಪ್ಯಾಕೇಜ್‌ ಟೆಂಡರ್‌ ಆದೇಶವನ್ನು ನೀಡದೇ ಸತಾಯಿಸುತ್ತಿದ್ದಾರೆ. ಅಲ್ಲದೆ ಟೆಂಡರ್‌ ನಿಯಮಾವಳಿ ಪ್ರಕಾರ ಶೌಚಾಲಯಗಳನ್ನು ನಿರ್ಮಿಸಿದರೂ ಹಸ್ತಾಂತರ ಮಾಡುತ್ತಿಲ್ಲ ಎಂದು ದೂರಿದರು.

ವಿಶೇಷವಾಗಿ ಶೌಚಾಲಯ ನಿರ್ವಹಣೆಯನ್ನು ಸ್ಥಳೀಯರು ಹಲವು ವರ್ಷಗಳಿಂದ ನಿರ್ವಹಣೆ ಮಾಡುತ್ತಿದ್ದಾರೆ. ಆದರೀಗ ಎಲ್ಲವನ್ನು ಬಿಹಾರದವರಿಗೆ ನೀಡಲಾಗುತ್ತಿದೆ. ಇದನ್ನೇ ನಂಬಿಕೊಂಡು ಉಪಜೀವನ ನಡೆಸುತ್ತಿದ್ದ ಸ್ಥಳೀಯರಿಗೆ ಅನ್ಯಾಯ ಮಾಡಲಾಗುತ್ತಿದೆ.ಆದ್ದರಿಂದ ಟೆಂಡರ್‌ನಲ್ಲಿ ಇದ್ದಂತ ಒಪ್ಪಂದಂತೆ ಶೌಚಾಲಯ ನಿರ್ವಹಣೆಯನ್ನು ಸ್ಥಳೀಯ ಸಂಸ್ಥೆಗಳಿಗೆ ನೀಡಬೇಕು ಎಂದು ಆಗ್ರಹಿಸಿದರು.

ಪ್ರತಿಭಟನೆಯಲ್ಲಿ ಸೇನೆ ಅಧ್ಯಕ್ಷ ಗಂಗಾಧರ ಪೇರೂರ ಸೇರಿದಂತೆ ಇತರರು ಇದ್ದರು.