ಪೊಲೀಸ್‌ ವಾಹನಕ್ಕೆ ಬೈಕ್‌ ಡಿಕ್ಕಿ: ವ್ಯಕ್ತಿಗೆ ಗಾಯ

ಹುಬ್ಬಳ್ಳಿ : ಪೊಲೀಸ್‌ ಪೆಟ್ರೋಲಿಂಗ್‌ ವಾಹನಕ್ಕೆ ಬೈಕ್‌ ಡಿಕ್ಕಿಯಾಗಿ ಬೈಕ್‌ ಸವಾರ ಗಂಭೀರವಾಗಿ ಗಾಯಗೊಂಡಿರುವ ಘಟನೆ ಇಲ್ಲಿಯ ಹು-ಧಾ ಮಾರ್ಗದ ಆರ್‌ಟಿಒ ಕಚೇರಿ ಎದುರು ಸೋಮವಾರ ಮಧ್ಯಾಹ್ನ ಸಂಭವಿಸಿದೆ.

ಹುಬ್ಬಳ್ಳಿಯಿಂದ ಧಾರವಾಡ ಕಡೆ ಹೊರಟಿದ್ದ ಪೊಲೀಸ್‌ ಪೆಟ್ರೋಲಿಂಗ್‌ ವಾಹನಕ್ಕೆ ಧಾರವಾಡ ಕಡೆಯಿಂದ ಬರುತ್ತಿದ್ದ ಬೈಕ್‌ ಡಿಕ್ಕಿಯಾಗಿದೆ. ಬೈಕ್‌ ಸವಾರನ ತಲೆ ಹಾಗೂ ಎದೆಯ ಭಾಗಕ್ಕೆ ಪೆಟ್ಟು ಬಿದ್ದಿದ್ದು, ತೀವ್ರ ರಕ್ತಸ್ರಾವ ಉಂಟಾಗಿದೆ. ಅದರಂತೆ ಪೊಲೀಸ್‌ ವಾಹನದಲ್ಲಿ ಸಿಬ್ಬಂದಿಗೆ ಯಾವುದೇ ಪೆಟ್ಟು ಆಗಿಲ್ಲ. ಬೈಕ್‌ ಸವಾರ ತನ್ನ ದಾರಿ ಬಿಟ್ಟು ತಪ್ಪು ದಾರಿಯಲ್ಲಿ ಬಂದಿದ್ದರಿಂದ ಈ ಅಪಘಾತ ಸಂಭವಿಸಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಬೈಕ್‌ ಡಿಕ್ಕಿ ಹೊಡೆದ ರಭಸಕ್ಕೆ ಪೆಟ್ರೋಲಿಂಗ್‌ ವಾಹನ ಮತ್ತು ಬೈಕ್‌ ಜಖಂಡಗೊಂಡಿದೆ. ಅಲ್ಲದೆ ಪೆಟ್ರೋಲಿಂಗ್‌ ವಾಹನದ ಎಂಜಿನ್‌ಗೆ ದೊಡ್ಡ ಹೊಡೆತ ಬಿದ್ದಿದ್ದರಿಂದ ರೇಡಿಯೇಟರ್‌ ಒಡೆದಿದೆ. ಈ ಕುರಿತು ಉತ್ತರ ಸಂಚಾರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿಲ್ಲ.