ಚಿಕ್ಕನಗೌಡರ ತವರಿನಲ್ಲಿ ಬಿಜೆಪಿ ಶಕ್ತಿ ಪ್ರದರ್ಶನ

ಹುಬ್ಬಳ್ಳಿ : ಕುಂದಗೋಳ ವಿಧಾನಸಭೆ ಉಪಚುನಾವಣೆ ಗೆಲ್ಲಲು ಬಿಜೆಪಿ ಅಭ್ಯರ್ಥಿ ಎಸ್‌.ಐ.ಚಿಕ್ಕನಗೌಡ್ರ ಸ್ವಗ್ರಾಮ ಅದರಗುಂಚಿಯಲ್ಲಿ ಶನಿವಾರ ಬಿಜೆಪಿ ಶಕ್ತಿ ಪ್ರದರ್ಶನ ನಡೆಸಿತು.

ಮಾಜಿ ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ, ಮಾಜಿ ಸಿಎಂ ಜಗದೀಶ ಶೆಟ್ಟರ್‌ ಹಾಗೂ ಮಾಜಿ ಸಚಿವ ಬಿ.ಶ್ರೀರಾಮುಲು ಕ್ಷೇತ್ರದ ಆಯ್ದ ಗ್ರಾಮಗಳಲ್ಲಿ ಹಲವಾರು ರಾಜ್ಯ ಹಾಗೂ ಸ್ಥಳೀಯ ಮುಖಂಡರೊಂದಿಗೆ ರೋಡ್‌ ಶೋ ನಡೆಸಿ ಮತಯಾಚನೆ ಮುಂದುವರಿಸಿದರು. ಹುಬ್ಬಳ್ಳಿ ತಾಲೂಕಿನ ಅದರಗುಂಚಿ ಗ್ರಾಮದಲ್ಲಿ ಬಿಎಸ್‌ವೈ ರೋಡ ಶೋ ಆರಂಭಿಸಿದರು. ಹಲವಾರು ರಾಜ್ಯ ಹಾಗೂ ಸ್ಥಳೀಯ ನಾಯಕರೊಂದಿಗೆ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ತೆರೆದ ವಾಹನದಲ್ಲಿ ತೆರಳಿದ ಬಿಜೆಪಿ ಅಭ್ಯರ್ಥಿ ಎಸ್‌.ಐ. ಚಿಕ್ಕನಗೌಡ್ರ ಗೆಲ್ಲಿಸಲು ಮತದಾರರಲ್ಲಿ ಮನವಿ ಮಾಡಿಕೊಂಡರು.

ವಿಶೇಷವಾಗಿ ಬಿಜೆಪಿ ಅಭ್ಯರ್ಥಿ ಎಸ್‌.ಐ. ಚಿಕ್ಕನಗೌಡ್ರ ಸ್ವ ಗ್ರಾಮ ಅದರಗುಂಚಿ ಮೂಲಕ ಬಿಎಸ್‌ವೈ ರೋಡ ಶೋ ಆರಂಭಿಸಿರುವುದು ಗಮನ ಸೆಳೆಯಿತು. ಬಿಎಸ್‌ವೈ ಸೇರಿ ಕೆಲ ನಾಯಕರು ತೆರೆದ ವಾಹನದಲ್ಲಿದ್ದರೆ ಉಳಿದ ನಾಯಕರು, ಕಾರ್ಯಕರ್ತರು ಪಾದಯಾತ್ರೆ ಮೂಲಕ ಬಿಎಸ್‌ವೈಗೆ ಸಾಥ್‌ ನೀಡಿದರು. ನೆತ್ತಿ ಸುಡುವ ಬಿಸಿಲು ಲೆಕ್ಕಿಸಿದೆ ಗ್ರಾಮದ ತುಂಬ ಸಂಚರಿಸಿ, ಮನೆ ಮನೆಗೆ ತೆರಳಿ ಬಿಜೆಪಿ ನಾಯಕರು ಮತಯಾಚನೆ ಮಾಡಿದರು.

ಭರ್ಜರಿ ಸ್ವಾಗತ..

ಅದರಗುಂಚಿ ಗ್ರಾಮಕ್ಕೆ ಬಿಎಸ್‌ವೈ ಆಗಮಿಸುತ್ತಿದ್ದಂತೆ ಬಿಜೆಪಿ ಕಾರ್ಯಕರ್ತರು, ಮುಖಂಡರು ಭರ್ಜರಿ ಸ್ವಾಗತ ನೀಡಿದರು. ರೋಡ್‌ ಶೋಗಾಗಿ ಕಾದಿದ್ದ ಮಕ್ಕಳು ಮೋದಿ ಮೋದಿ ಎಂದು ಘೋಷಣೆ ಕೂಗುತ್ತ ಬಿಎಸ್‌ವೈಗೆ ಸ್ವಾಗತ ನೀಡಿದರು. ವಾದ್ಯ ಮೇಳ, ಜಾನಪದ ಪದಗಳ ಹಾಡುಗಾರರು ರೋಡ ಶೋ ಗೆ ಸಾಥ ನೀಡಿದರು.

ಅದರಗುಂಚಿ ಹಾಗೂ ನೂಲ್ವಿ ಗ್ರಾಮಗಳಲ್ಲಿ ನಡೆದ ರೋಡ್‌ ಶೋನಲ್ಲಿ ಸಂಸದ ಪ್ರಹ್ಲಾದ ಜೋಶಿ, ವಿಧಾನಪರಿಷತ್‌ ಪ್ರತಿಪಕ್ಷ ನಾಯಕ ಕೋಟಾ ಶ್ರೀನಿವಾಸ ಪೂಜಾರಿ, ಶಂಕರಪಾಟೀಲ ಮುನೇನಕೊಪ್ಪ, ಮಂಜುನಾಥ ಕುನ್ನೂರ, ಬಿಜೆಪಿ ಅಭ್ಯರ್ಥಿ ಎಸ್‌.ಐ. ಚಿಕ್ಕನಗೌಡ್ರ, ಎಂ.ಆರ್‌. ಪಾಟೀಲ, ಕಟ್ಟಾ ಸುಬ್ರಹ್ಮಣ್ಯ ನಾಯ್ಡು, ಸೀಮಾ ಮಸೂತಿ, ಪಾಲಾಕ್ಷಗೌಡ ಪಾಟೀಲ ಇತರರು ಬಿಎಸ್‌ವೈಗೆ ಸಾಥ್‌ ನೀಡಿದರು.

ನಂತರ ಬಿ.ಎಸ್‌. ಯಡಿಯೂರಪ್ಪ ಹಾಗೂ ಬಿಜೆಪಿ ನಾಯಕರು ನೂಲ್ವಿ, ಶೆರೆವಾಡ, ಬೆಟದೂರು, ಕುಬಿಹಾಳ, ಇಂಗಳಗಿ, ಮತ್ತಿಗಟ್ಟಿ ಗ್ರಾಮಗಳಲ್ಲಿ ರೋಡ ಶೋ ನಡೆಸಿದರು.