ಬ್ರೇಕ್‌ ಫೇಲ್‌: ಚಿಗರಿಯಿಂದ ಮತ್ತೊಂದು ಚಿಗರಿಗೆ ಗಾಯ !

ಹುಬ್ಬಳ್ಳಿ : ಬಿಆರ್‌ಟಿಎಸ್‌ ಕಾರಿಡಾರ್‌ನಲ್ಲಿ ಓಡುತ್ತಿರುವ ಚಿಗರಿ ಬಸ್‌ಗಳು ಒಂದಿಲ್ಲೊಂದು ಸುದ್ದಿ ಮಾಡುತ್ತಲೇ ಇವೆ. ಗುರುವಾರ ಆಗಿದ್ದು ಇಂಥದ್ದೇ.

ಧಾರವಾಡ ಡಿಪೋಗೆ ಸೇರಿದ್ದ ಚಿಗರಿ ಬಸ್‌ ಹಠಾತ್‌ ಆಗಿ ಬ್ರೇಕ್‌ ಫೇಲ್‌ ಆಗಿ, ಮುಂದಿದ್ದ ಮತ್ತೊಂದು ಚಿಗರಿ ಬಸ್‌ಗೆ ಡಿಕ್ಕಿ ಹೊಡೆದಿದೆ. ಇದರಿಂದ ಡಿಕ್ಕಿ ಹೊಡೆದ ಬಸ್‌ನ ಗಾಜು ಒಡೆದಿದೆ. ಅದೃಷ್ಟವಶಾತ್‌ ಪ್ರಯಾಣಿಕರಿಗೆ ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ.

ಈ ಘಟನೆ ನಡೆದಿದ್ದು ಆರ್‌ಟಿಓ ಬಿಆರ್‌ಟಿಎಸ್‌ ಬಸ್‌ ನಿಲ್ದಾಣದಲ್ಲಿ. ಹುಬ್ಬಳ್ಳಿಯಿಂದ ಧಾರವಾಡ ಕಡೆಗೆ ತೆರಳುತ್ತಿದ್ದ ಬಸ್‌ಗೆ ಹಿಂದಿನಿಂದ ಡಿಕ್ಕಿ ಹೊಡೆದಿದೆ. ಮುಂದಿದ್ದ ಬಸ್‌ನ ಹಿಂಬದಿಯ ಭಾಗ ಹಾನಿಗೊಳಗಾಗಿದೆ.

ಡಿಕ್ಕಿ ಹಿನ್ನೆಲೆಯಲ್ಲಿ ಎರಡೂ ಬಸ್‌ಗಳ ಚಾಲಕರ ಮಧ್ಯೆ ಮಾತಿನ ಚಕಮಕಿಯೇ ನಡೆದಿದ್ದು, ಪರಸ್ಪರ ತೆಗಳುತ್ತಿದ್ದರು.ಡಿಕ್ಕಿ ಹೊಡೆದ ಬಸ್‌ನ ಬ್ರೇಕ್‌ನ ಪೆಡಲ್‌ ಕೆಳಗೆ ಹೋದದ್ದು ಮೇಲಕ್ಕೆ ಬರಲೇ ಇಲ್ಲ. ಅದೃಷ್ಟಕ್ಕೆ ಬಸ್‌ ನಿಧಾನಗತಿಯಲ್ಲಿತ್ತು. ಹಾಗಾಗಿ ಅವಘಡ ತಪ್ಪಿತು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.