ವಿದ್ಯುತ್‌ ಸಂಪರ್ಕ ಕಡಿತ ಆರೋಪ: ಪ್ರತಿಭಟನೆ

ನವಲಗುಂದ: ತಾಲೂಕಿನ ಬೆಳವಟಗಿ ಗ್ರಾಮದ ದಲಿತ ಕೇರಿಯಲ್ಲಿನ ಮನೆಗಳ ವಿದ್ಯುತ್‌ ಸಂಪರ್ಕ ಸ್ಥಗಿತಗೊಳಿಸಲಾಗಿದೆ ಎಂದು ಆರೋಪಿಸಿ ತಾಲೂಕಾ ದಲಿತ ಸಂಘರ್ಷ ಸಮಿತಿ ವತಿಯಿಂದ ಪಟ್ಟಣದಲ್ಲಿನ ಹೆಸ್ಕಾಂ ಉಪ ವಿಭಾಗ ಕಚೇರಿ ಎದುರು ಬುಧವಾರ ಪ್ರತಿಭಟನೆ ನಡೆಸಲಾಯಿತು.

ಈ ಹಿಂದೆ ಸರಕಾರದ ಭಾಗ್ಯ ಜ್ಯೋತಿ ಯೋಜನೆಯಡಿ ಕೇರಿಯ ನಿವಾಸಿಗಳಿಗೆ ಉಚಿತ ವಿದ್ಯುತ್‌ ಸಂಪರ್ಕ ಕಲ್ಪಿಸಲಾಗಿತ್ತು. ಆದರೆ ಇತ್ತೀಚೆಗೆ ಆ ಸಂಪರ್ಕವನ್ನು ಸ್ಥಗಿತಗೊಳಿಸಿದ ಹೆಸ್ಕಾಂ ಸಿಬ್ಬಂದಿ ಹೊಸ ಸಂಪರ್ಕ ನೀಡಿದ್ದರಿಂದ ವಿದ್ಯುತ್‌ ಬಿಲ್‌ ಗರಿಷ್ಟ ಮಟ್ಟಕ್ಕೆ ಏರಿದೆ. ಇದರಿಂದ ಬಿಲ್‌ ಪಾವತಿಸಲಾಗಿಲ್ಲವಾದ್ದರಿಂದ ಹೆಸ್ಕಾಂ ಸಿಬ್ಬಂದಿ ದಲಿತ ಕೇರಿಯಲ್ಲಿನ ಎಲ್ಲರ ಮನೆಯ ವಿದ್ಯುತ್‌ ಸಂರ್ಪವನ್ನು ಸ್ಥಗಿತಗೊಳಿಸಿದೆ. ಈ ಕುರಿತು ಪ್ರಶ್ನಿಸಿದ ಮಹಿಳೆಯರಿಗೆ ಅವಮಾನಿಸುವಂತಹ ಮಾತುಗಳನ್ನಾಡಿದ್ದಾರೆ, ಈ ಸಂದರ್ಭದಲ್ಲಿ ಮದ್ಯ ಪ್ರವೇಶಿಸಿದ ಶಿವು ಪೂಜಾರ ಎಂಬ ದಲಿತ ಯುವಕನ ಮೇಲೆ ಹೆಸ್ಕಾಂ ಸಿಬ್ಬಂದಿ ಸುಳ್ಳು ಪ್ರಕರಣವನ್ನು ದಾಖಲು ಮಾಡಿದ್ದು, ಕೂಡಲೇ ಸುಳ್ಳು ಪ್ರಕರಣವನ್ನು ವಾಪಸ್‌ ಪಡೆಯಬೇಕು ಎಂದು ಆಗ್ರಹಿಸಿದರು. ದಲಿತ ಕುಟುಂಬಗಳ ವಿದ್ಯುತ್‌ ಬಿಲ್‌ ಮನ್ನಾ ಮಾಡಿ ಮೊದಲಿನಂತೆ ಭಾಗ್ಯಜ್ಯೋತಿ ಯೋಜನೆಯಡಿ ಉಚಿತ ವಿದ್ಯುತ್‌ ನೀಡುವಂತೆ ಆಗ್ರಹಿಸಿ ತಹಸೀಲ್ದಾರರಿಗೆ ಮನವಿ ಸಲ್ಲಿಸಿದರು.

ಡಿಎಸ್‌ಎಸ್‌ ತಾಲೂಕಾ ಸಂಚಾಲಕ ನಿಂಗಪ್ಪ ಕೆಳಗೇರಿ,ಪ್ರಭು ಮಾದರ,ರಾಮಪ್ಪ ಮಾದರ,ತಿಪ್ಪಣ್ಣ ಹುಚ್ಚಣ್ಣವರ,ಚನ್ನಪ್ಪ ಮಾದರ,ಬಸವರಾಜ ಓಲೇಕಾರ,ಬಸಪ್ಪ ಸೆಟ್ಟೆಣ್ಣವರ,ಗದಿಗೆಪ್ಪ ಪೂಜಾರ,ಮಂಜವ್ವ ಮೇಲಿನಮನಿ,ಕರಿಯವ್ವ ನಾಗಣ್ಣವರ,ಶಾಂತವ್ವ ಕೆಳಗೇರಿ ಮತ್ತಿತರರಿದ್ದರು.