ಎತ್ತುಗಳ ರಕ್ಷಿಸಿ ಮಾಲೀಕರಿಗೆ ಹಸ್ತಾಂತರಿಸಿದ ಪೊಲೀಸರು

ಹುಬ್ಬಳ್ಳಿ: ಗೋವುಗಳ ಸಾಗಣೆ ಮಾಡಲಾಗುತ್ತಿದೆ ಎಂಬ ಮಾಹಿತಿ ಮೇರೆ ದಾಳಿ ನಡೆಸಿದ ಪೊಲೀಸರು ಎತ್ತುಗಳನ್ನು ರಕ್ಷಿಸಿ ಮಾಲೀಕರಿಗೆ ಹಸ್ತಾಂತರಿಸಿದ ಘಟನೆ ಇಲ್ಲಿಯ ಹು-ಧಾ ಬೈಪಾಸ್‌ನಲ್ಲಿ ಶುಕ್ರವಾರ ನಡೆದಿದೆ.

ತಾರಿಹಾಳ ಗ್ರಾಮದ ರೈತ ಉಳವಪ್ಪ ಮುರಗೋಡ ಎಂಬುವರಿಗೆ ಸೇರಿದ ಎರಡು ಎತ್ತುಗಳನ್ನು ಗೂಡ್ಸ್‌ ವಾಹನದಲ್ಲಿ ಸಾಗಿಸಲಾಗುತ್ತಿತ್ತು. ಎತ್ತುಗಳನ್ನು ರೈತರು ತಾರಿಹಾಳ ಗ್ರಾಮದಿಂದ ರೇವಡಿಹಾಳ ಗ್ರಾಮಕ್ಕೆ ಸಾಗಿಸುತ್ತಿದ್ದರು. ಈ ವೇಳೆ ಗೋವುಗಳ ಸಾಗಾಟ ಮಾಡಲಾಗುತ್ತಿದೆ ಎಂದು ಹಿಂದೂ ಸಂಘಟನೆಯೊಂದರ ಸದಸ್ಯರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಈ ಮಾಹಿತಿ ಆಧರಿಸಿ ದಾಳಿ ನಡೆಸಿದ ಗೋಕುಲ್‌ರೋಡ್‌ ಠಾಣೆ ಪಿಐ ಡಿ.ಪಿ. ನಿಂಬಾಳ್ಕರ ನೇತೃತ್ವದ ತಂಡ ವಾಹನ ತಡೆದು ವಿಚಾರಿಸಿದಾಗ ರೈತರಿಗೆ ನೀಡಲಾಗುತ್ತಿದೆ ಎಂದು ತಿಳಿದು ಬಂದಿದೆ. ಹೀಗಿದ್ದಾಗ್ಯೂ ತಾರಿಹಾಳ ಗ್ರಾಮದ ರೈತ ಉಳವಪ್ಪ ಅವರನ್ನು ಸ್ಥಳಕ್ಕೆ ಕರೆಯಿಸಿ ಪಿಐ ನಿಂಬಾಳ್ಕರ, ಈ ಕುರಿತು ಹೆಚ್ಚಿನ ಮಾಹಿತಿ ಸಂಗ್ರಹಿಸಿದ್ದಾರೆ. ನಂತರ ಎರಡು ಎತ್ತುಗಳನ್ನು ಮರಳಿ ಉಳವಪ್ಪ ಅವರಿಗೆ ವಾಪಸ್‌ ನೀಡಿ ಕಳುಹಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.