ದಲಿತರ ವಿಶ್ವಾಸ ಗಳಿಸಲಿಲ್ಲ : ಆರೋಪ

ಹುಬ್ಬಳ್ಳಿ : ಲೋಕಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿ ವಿನಯ ಕುಲಕರ್ಣಿ ಅವರು ಭಾರಿ ಅಂತರದಿಂದ ಸೋಲಲು ಜಿಲ್ಲೆಯ ದಲಿತರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳದಿರುವುದೇ ಕಾರಣ ಎಂದು ಉತ್ತರ ಕರ್ನಾಟಕ ಆದಿ ಜಾಂಬವ ಅಭಿವೃದ್ಧಿ ಕ್ರಿಯಾ ಸಮಿತಿಯ ಮುಖಂಡ ಹಾಗೂ ಮಾಜಿ ಕಾರ್ಪೋರೇಟರ್‌ ಮೋಹನ ಹಿರೇಮನಿ, ವೆಂಕಟೇಶ ಮಾದರ ಸೇರಿದಂತೆ ಹಲವರು ಆರೋಪಿಸಿದ್ದಾರೆ.

ಈ ಕುರಿತು ಜಂಟಿ ಪತ್ರಿಕಾ ಹೇಳಿಕೆ ನೀಡಿದ್ದು, ಈ ಬಾರಿಯ ಚುನಾವಣೆಯಲ್ಲಿ ಬಿಜೆಪಿಯವರು ದಲಿತರನ್ನು ವಿಶ್ವಾಸಕ್ಕೆ ತೆಗೆದುಕೊಂಡು ಪ್ರತ್ಯೇಕ ಸಮಾವೇಶ ನಡೆಸಿ ನೈತಿಕ ಸ್ಥೈರ್ಯ ತುಂಬುವ ಕೆಲಸ ಮಾಡಿದರು. ಕಾಂಗ್ರೆಸ್‌ದಲ್ಲಿ ಇದು ಆಗಲೇ ಇಲ್ಲ ಎಂದು ಆಕ್ಷೇಪಿಸಿದ್ದಾರೆ. ಹುಬ್ಬಳ್ಳಿ ಪೂರ್ವ ಶಾಸಕರು ಕೇವಲ ಹಳ್ಳಿಗಳಿಗೆ ತೆರಳಿ ತಮ್ಮ ಸಮಾಜದ ಮತಯಾಚಿಸಿ ಇತರರನ್ನು ನಿರ್ಲಕ್ಷಿಸಿದರು. ಇದು ಪಕ್ಷ ಅಭ್ಯರ್ಥಿ ವಿನಯ ಕುಲಕರ್ಣಿ ಅವರಿಗೆ ತಪ್ಪು ಸಂದೇಶ ನೀಡುವ ಮೂಲಕ ಚುನಾವಣೆ ಸೋಲು ಅನುಭಿಸಬೇಕಾಯಿತು ಎಂದು ಮೋಹನ ಹಿರೇಮನಿ, ಶಂಕರ ಹೊಸಮನಿ, ದುರಗಪ್ಪ ಪೂಜಾರ, ಪರಿಶುರಾಮ ತೇರದಾಳ, ವೆಂಕಟೇಶ ಮಾದರ ಆರೋಪಿಸಿದ್ದಾರೆ.