ಶುದ್ಧ ಕುಡಿಯುವ ನೀರು ಪೂರೈಕೆಗೆ ಆಗ್ರಹ

ಧಾರವಾಡ: ನವಲಗುಂದ ತಾಲೂಕಿನ ಮೊರಬ, ಶಿರಕೋಳ ಗ್ರಾಮ ಪಂಚಾಯಿತ ವ್ಯಾಪ್ತಿಯ ಎಲ್ಲಗ್ರಾಮಗಳಿಗೆ ಶುದ್ಧ ಕುಡಿಯುವ ನೀರು ಪೂರೈಕೆ ಮಾಡಬೇಕು ಎಂದು ಮಾಜಿ ಶಾಸಕ ಎನ್‌.ಎಚ್‌. ಕೋನರಡ್ಡಿ ಜಿಲ್ಲಾಧಿಕಾರಿಗಳನ್ನು ಆಗ್ರಹಿಸಿದ್ದಾರೆ.

ನಗರದ ಡಿಸಿ ಕಚೇರಿಗೆ ಬುಧವಾರ ಗ್ರಾಮಸ್ಥರೊಂದಿಗೆ ಆಗಮಿಸಿದ ಕೋನರಡ್ಡಿ, ಈ ಕುರಿತು ಮನವಿ ಪತ್ರ ಸಲ್ಲಿಸಿದರು. ಪ್ರತಿ ವರ್ಷ ಬೇಸಿಗೆಯಲ್ಲಿಈ ಗ್ರಾಮಗಳಲ್ಲಿಕುಡಿಯುವ ನೀರಿನ ಸಮಸ್ಯೆ ಎದುರಾಗಿತ್ತಿದೆ ಎಂದು ಮನವಿಯಲ್ಲಿತಿಳಿಸಿದ್ದಾರೆ.

ಇಲ್ಲಿನ ಕೆರೆಗಳಲ್ಲಿನೀರಿನ ಸಂಗ್ರಹವು ಅಲ್ಪಮಟ್ಟಕ್ಕೆ ಕುಸಿದಿದೆ. ಶಿರಕೋಳದಲ್ಲಿಕೇವಲ 8 ರಿಂದ 10 ದಿನಗಳಿಗೆ ಆಗುವಷ್ಟು ಮಾತ್ರ ನೀರು ಸಂಗ್ರಹ ಇದ್ದು, ಅಲ್ಲಿನ ನೀರು ಕುಡಿದರೆ ಹೊಟ್ಟೆನೋವು ಹಾಗೂ ಇತರೆ ಕಾಯಿಲೆಗಳು ಹರಡುತ್ತಿವೆ. ಮೊರಬ ಗ್ರಾಮದವರು ಶುದ್ಧ ಕುಡಿಯುವ ನೀರನ್ನು ಗುಮ್ಮಗೋಳ ಗ್ರಾಮದಿಂದ ತಂದು ಕುಡಿಯುತ್ತಿದ್ದಾರೆ.

ಈ ಕುರಿತು ಸಂಬಂಧಿಸಿದ ಅಧಿಕಾರಿಗಳನ್ನು ವಿಚಾರಿಸಿದರೆ ಕೊರೋನಾ ಕರ್ತವ್ಯಕ್ಕೆ ನಮ್ಮನ್ನು ನಿಯೋಜಿಸಿದ ಕಾರಣ ನೀರು ಪೂರೈಕೆ ಮಾಡಲು ಸಾಧ್ಯವಾಗಿಲ್ಲಎಂದು ಸಬೂಬು ಹೇಳುತ್ತಿದ್ದಾರೆ. ಶೀಘ್ರವಾಗಿ ಗ್ರಾಮಸ್ಥರಿಗೆ ಶುದ್ಧ ಕುಡಿಯುವ ನೀರು ಪೂರೈಕೆ ಮಾಡಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.

ಮೊರಬ ಗ್ರಾಪಂ ಅಧ್ಯಕ್ಷ ಕಗದಾಳ, ಶಿರಕೋಳ ಗ್ರಾಪಂ ಅಧ್ಯಕ್ಷ ಪರಪ್ಪ ಗಾಣಿಗೇರ, ಎಂ.ಎಸ್‌.ರೋಣದ, ಅಡಿವೆಪ್ಪ ಗಾಣಿಗೇರ, ಸಂಗನಗೌಡ ಹಣಸಿ, ಚಂದ್ರು ಗಾಣಿಗೇರ, ಕುಮಾರ ಮಂಕಣಿ, ಗಿರೀಶ ಮಾಸ್ತಿ, ಕಲ್ಲಪ್ಪ ಬಸಿಡೋಣಿ ಮತ್ತಿತರರು ಮನವಿ ಸಲ್ಲಿಸುವ ನಿಯೋಗದಲ್ಲಿ ಇದ್ದರು.