ಶಿಥಿಲಗೊಂಡ ಕೊಠಡಿ ಪರಿಶೀಲನೆ

ಕುಂದಗೋಳ : ಕಳೆದ ವರ್ಷ ಆರಂಭವಾದ ತಾಲೂಕಿನ ಗುಡಗೇರಿ ಕರ್ನಾಟಕ ಪಬ್ಲಿಕ್‌ ಶಾಲೆಗೆ ಮೂಲ ಸೌಲಭ್ಯಕ್ಕಾಗಿ 1 ಕೋಟಿ 52 ಲಕ್ಷ ರೂ. ಹಣ ಮಂಜೂರಾಗಿದ್ದು, ಇದರಲ್ಲಿ ಒಟ್ಟು 9 ಕೊಠಡಿ ನಿರ್ಮಿಸಲು ಅಧಿಕಾರಿಗಳು ಸ್ಥಳ ಪರಿಶೀಲಿಸಿದರು.

ಶಾಲಾ ಆವರಣದಲ್ಲಿನ 7 ಕೊಠಡಿಗಳು ದುರಸ್ತಿ ಹಂತ ತಲುಪಿದ್ದು, ಇದರಲ್ಲಿ ವಿದ್ಯಾರ್ಥಿಗಳು ಕುಳಿತುಕೊಳ್ಳಲು ಆಗುತ್ತಿಲ್ಲ. ಕಾರಣ ಇದನ್ನು ಕೋಡಲೇ ತೆರವುಗೊಳಿಸಿ ಇಲ್ಲಿ ಹೊಸ ಕೊಠಡಿಗಳನ್ನು ನಿರ್ಮಿಸಲು ಶಾಲಾ ಸಮಿತಿಯು ಆಗಮಿಸಿದ ಅಧಿಕಾರಿಗಳಿಗೆ ಸೂಚಿಸಿದರು.

ಲೋಕೋಪಯೋಗಿ ಇಲಾಖಾಧಿಕಾರಿ ಕೆ.ಮಾಂತೇಶ, ಸಹಾಯಕ ಅಧಿಕಾರಿ ಎಂ.ಎಸ್‌.ಅಕ್ಕೂರ, ಬಿಇಓ ಜಿ.ಎನ್‌.ಮಠಪತಿ ಕೊಠಡಿಗಳನ್ನು ವೀಕ್ಷಿಸಿ ನೆಲಸಮಗೊಳಿಸಲು ಚರ್ಚಿಸುವದಾಗಿ ಹೇಳಿದರು. ಸಮಿತಿಯ ವಿ.ಡಿ.ಹಿರೇಗೌಡ್ರ, ದಯಾನಂದ ಕುಂದೂರ, ವಿಜಯಕುಮಾರ ಹಾಲಿ, ಪೂರ್ವಾಚಾರಿ ಸುತಾರ, ರಾಜು ಪಾಟೀಲ, ಬಾಬು ಹಾಜೇಸಾಬನವರ, ಸುವರ್ಣಮ್ಮ ನಿಂಗೊಡ್ತಿ, ಪ್ರಾಚಾರ್ಯ ಪಿ.ಕೆ.ಕಮ್ಮಾರ ಮತ್ತಿತರರಿದ್ದರು.