ಎನ್‌ಸಿಸಿಯಿಂದ ಜೀವನದಲ್ಲಿ ಶಿಸ್ತು, ಸಂಯಮ

ಹುಬ್ಬಳ್ಳಿ : ಎನ್‌ಸಿಸಿ ಭಾರತೀಯ ಸೈನ್ಯದ ಒಂದು ಭಾಗವಾಗಿ ಕಾರ್ಯ ನಿರ್ವಹಿಸುತ್ತದೆ. ವಿದ್ಯಾರ್ಥಿಗಳಿಗೆ ಸಮಯಪಾಲನೆ, ಶಿಸ್ತು, ದೇಶಪ್ರೇಮ ಮೂಡಿಸುವ ಮಹತ್ವದ ಕೆಲಸವನ್ನು ಎನ್‌ಸಿಸಿಯಲ್ಲಿ ಮಾಡಲಾಗುತ್ತದೆ ಎಂದು ಸಂಪನ್ಮೂಲ ವ್ಯಕ್ತಿ ಪ್ರವೀಣ ಗುಡಿ ಹೇಳಿದರು.

ವಿದ್ಯಾನಗರದ ಬಿವಿಬಿ ಕಾಲೇಜಿನಲ್ಲಿ 28 ಕರ್ನಾಟಕ ಬಟಾಲಿಯನ್‌ ಎನ್‌ಸಿಸಿ ಕ್ಯಾಂಪ್‌ನ ಶಿಬಿರಾರ್ಥಿಗಳಿಗಾಗಿ ಶನಿವಾರ ಹಮ್ಮಿಕೊಂಡಿದ್ದ ರಾಜ್ಯಮಟ್ಟದ ನಾಯಕತ್ವ ಶಿಬಿರ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಅವರು ಎನ್‌ಸಿಸಿ ಕುರಿತು ಮಾಹಿತಿ ನೀಡಿದರು.

ಸತತ ಪ್ರಯತ್ನದಿಂದ ಮಾತ್ರ ಸಾಧನೆ ಮಾಡಲು ಸಾಧ್ಯ. ಯಾವುದೇ ಸಾಧನೆ ಮಾಡಲು ತಾಳ್ಮೆ ಮತ್ತು ಪ್ರಯತ್ನ ಬೇಕು. ದೇಶಕ್ಕಾಗಿ ಏನಾದರೂ ಕೊಡುಗೆ ನೀಡಬೇಕು ಎಂಬುವವರು ಎನ್‌ಸಿಸಿಯಲ್ಲಿರುವ ಪ್ರತಿ ಹಂತವನ್ನು ತಿಳಿದುಕೊಳ್ಳಬೇಕು. ಸೈನ್ಯಕ್ಕೆ ಸೇರಬೇಕು ಎಂಬುವವರಿಗೆ ಎನ್‌ಸಿಸಿ ಸಹಕಾರಿಯಾಗುವುದು ಎಂದರು.

ಕಾರ್ಪೋರೇಟ್‌ ಕಂಪನಿಯಲ್ಲಿ ಕೆಲಸಮಾಡಬೇಕು. ಆಸ್ತಿ ಗಳಿಸಬೇಕು, ಸರಕಾರಿ ಹುದ್ದೆಯಲ್ಲಿರಬೇಕು ಎಂಬುವುದನ್ನು ಮರೆತು. ಎನ್‌ಸಿಸಿಯಲ್ಲಿ ನೀಡು ತರಬೇತಿಯನ್ನು ಶಿಸ್ತಿನಿಂದ ಕಲಿತರೆ ಮುಂದೊಂದು ದಿನ ನೀವು ದೇಶದ ಆಸ್ತಿಯಾಗುತ್ತೀರಿ. ನಿಮ್ಮ ಕುಟುಂಬ ಅಷ್ಟೇ ಅಲ್ಲದೇ ಸಮಾಜ ನಿಮ್ಮನ್ನು ಗೌರವಿಸುವ ಹುದ್ದೆಯನ್ನು ನೀವು ಅಲಂಕರಿಸುತ್ತಿರಿ ಎಂದು ಆತ್ಮವಿಶ್ವಾಸ ತುಂಬಿದರು.

ಎನ್‌ಸಿಸಿಯಲ್ಲಿ ನೀಡುವ ಡ್ರೆಸ್‌, ಕ್ಯಾಪ್‌, ಬೆಲ್ಟ್‌, ಬ್ಯಾಡ್ಜ್‌ ಎಲ್ಲರಿಗೂ ದೊರೆಯುವುದಿಲ್ಲ. ಅದನ್ನು ಪಡೆದುಕೊಳ್ಳಬೇಕಾದರೆ ಶ್ರಮ ಪಡಬೇಕು. ಅರ್ಹತೆ ಇರಬೇಕು. ನಿಮಗೆ ಅರ್ಹತೆ ಇದಿದ್ದರಿಂದಲೇ ಎನ್‌ಸಿಸಿ ಕ್ಯಾಂಪ್‌ನಲ್ಲಿ ತರಬೇತಿ ಪಡೆಯಲು ಸಾಧ್ಯವಾಗಿದೆ. ಈ ಅವಕಾಶವನ್ನು ಸದುಪಯೋಗ ಪಡೆದುಕೊಳ್ಳಬೇಕು ಎಂದು ಸಲಹೆ ನೀಡಿದರು.

ಮುಖ್ಯ ಅತಿಥಿಗಳಾಗಿ ಬೆಳಗಾವಿ ಗ್ರುಪ್‌ ಕಮಾಂಡರ್‌ ಕರ್ನ್‌ಲ್‌ ಜೆ.ಜೆ. ಅಬ್ರಾಹಂ ಆಗಮಿಸಿದ್ದರು. ಕರ್ನಲ್‌ ಎ.ವಿವೇಕಾನಂದ, ಡಾನಿಲ್‌ ಅಬ್ರಾಹಂ ಸೇರಿದಂತೆ 270 ಕ್ಕೂ ಹೆಚ್ಚು ಎನ್‌ಸಿಸಿ ಶಿಬಿರಾರ್ಥಿಗಳು ಶಿಬಿರದಲ್ಲಿ ಭಾಗವಹಿಸಿದ್ದರು.