ಮೀ ಟೂ ದುರುಪಯೋಗ ಸಲ್ಲದು: ಹರ್ಷಿಕಾ ಪೂಣಚ್ಚ

ಹುಬ್ಬಳ್ಳಿ : ಮೀ ಟೂ ಅಭಿಯಾನ ಕಷ್ಟದಲ್ಲಿರುವ ಮಹಿಳೆಯರಿಗೆ ಸಹಕಾರಿಯಾಗಬೇಕಿದೆ. ಆದರೆ ಅದು ಯಾವತ್ತೂ ಪಬ್ಲಿಸಿಟಿ ಪಡೆಯುವ ಕ್ಯಾಂಪೇನ್‌ ಆಗಿ ದುರುಪಯೋಗ ಆಗಬಾರದು ಎಂದು ಚಿತ್ರನಟಿ ಹರ್ಷಿಕಾ ಪೂಣಚ್ಚ ಹೇಳಿದರು.

ಗೇಟ್‌ವೇ ಹೇರ್‌ ಫಿಕ್ಸಿಂಗ್‌ನ 25ನೇ ಶಾಖೆಯನ್ನು ಹುಬ್ಬಳ್ಳಿಯ ಗೋಕುಲ ರಸ್ತೆಯ ಮಂಜುನಾಥ ನಗರದಲ್ಲಿ ಶನಿವಾರ ಉದ್ಘಾಟಿಸಿದ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ''ಫಿಲ್ಮ್‌ ಇಂಡಸ್ಟ್ರಿಯಲ್ಲಿ ದೊಡ್ಡ ಹೆಸರು ಗಳಿಸಲು ಹಲವಾರು ವರ್ಷ ಶ್ರಮ ಪಡಬೇಕಾಗುತ್ತದೆ. ಆದರೆ ಕೆಲವರು ಪಬ್ಲಿಸಿಟಿಗಾಗಿ ಮಾತ್ರ ದೊಡ್ಡ ದೊಡ್ಡ ನಟರ ಹೆಸರನ್ನು ತೆಗೆದುಕೊಂಡು ಮೀ ಟೂ ಆರೋಪ ಮಾಡುತ್ತಿರುವುದು ಸರಿಯಲ್ಲ'' ಎಂದರು.

''ಕೆಲವರು ಮಾಡಿದ ತಪ್ಪಿಗೆ ಇಡೀ ಗಂಡು ಕುಲವೇ ತಪ್ಪು ಎಂಬಂತೆ ನೋಡಬಾರದು. ಕಷ್ಟ ಅನುಭವಿಸಿದವರು ಕೂಡಲೇ ಫಿಲ್ಮ್‌ ಚೇಂಬರ್‌ಗೆ ಅಥವಾ ಮಹಿಳಾ ಆಯೋಗಕ್ಕೆ ಹೋಗಿ ನ್ಯಾಯ ಪಡೆಯಬಹುದು. ಅದನ್ನು ಬಿಟ್ಟು ನೇರವಾಗಿ ಮಾಧ್ಯಮಗಳ ಎದುರು ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಆರೋಪ ಮಾಡುವುದು ಸರಿಯಲ್ಲ'' ಎಂದು ತಿಳಿಸಿದರು.

''ನನಗೂ ಸಹ ಬಾಲಿವುಡ್‌ ಚಿತ್ರವೊಂದರ ಚಿತ್ರೀಕರಣದ ವೇಳೆ ಮೀ ಟೂ ಅನುಭವ ಆಗಿದೆ. ಆ ಕಾರಣಕ್ಕೆ ಆ ಚಿತ್ರವನ್ನೇ ಬಿಟ್ಟು ಬಂದಿದ್ದೇನೆ. ಆದರೆ ಕೆಲವರು ಸಿನಿಮಾದಲ್ಲಿ ನಟಿಸಿ, ಪ್ರಚಾರ ಮಾಡಿದ ನಂತರ ಮೀ ಟೂ ಆರೋಪ ಮಾಡುವ ಮೂಲಕ ಅದರ ದುರುಪಯೋಗಕ್ಕೆ ಕಾರಣರಾಗುತ್ತಿದ್ದಾರೆ'' ಎಂದು ಆರೋಪಿಸಿದರು.