ಸಾಕ್ಷರತೆಯಿಂದ ಆರ್ಥಿಕ ಸಾಧನೆ ಸಾಧ್ಯ

ಧಾರವಾಡ : ಪ್ರಸ್ತುತ ದಿನಗಳಲ್ಲಿ ವಿದ್ಯಾರ್ಥಿಗಳು ಆರ್ಥಿಕ ಸಾಕ್ಷ ರತೆ ಹೊಂದಿದ್ದರೆ ಹಣಕಾಸಿನ ವಿಚಾರದಲ್ಲಿ ಮೆಲುಗೈ ಸಾಧಿಸಲು ಸಾಧ್ಯ ಎಂದು ನಿಟ್‌ ಫೌಂಡೇಶನ್‌ನ ಯೋಜನಾ ಸಂಯೋಜಕ ಸುನೀಲಕುಮಾರ ಹೇಳಿದರು.

ನಗರದ ವಿದ್ಯಾಗಿರಿಯ ಜೆಎಸ್‌ಎಸ್‌ ಶ್ರೀ ಮಂಜುನಾಥೇಶ್ವರ ಐಟಿಐ ಕಾಲೇಜಿನಲ್ಲಿ ನಡೆದ ಆರ್ಥಿಕ ಸಾಕ್ಷ ರತೆ ವಿಷಯದ ಮೇಲೆ ಅತಿಥಿ ಉಪನ್ಯಾಸ ನೀಡಿ ಅವರು ಸೋಮವಾರ ಮಾತನಾಡಿದರು.

ವಿದ್ಯಾರ್ಥಿಗಳು ಆರ್ಥಿಕ ದಿನಚರಿಯನ್ನು ರೂಢಿಯಲ್ಲಿ ಇರಿಸಿಕೊಂಡರೆ ಯಾವುದೇ ಹಣಕಾಸಿನ ತೊಂದರೆ ಆಗದ ರೀತಿಯಲ್ಲಿ ತಮ್ಮ ಜೀವನ ಸಾಗಿಸಬಹುದು. ಪ್ರತಿ ವಿದ್ಯಾರ್ಥಿಗಳು ತಮ್ಮ ಆದಾಯ, ಖರ್ಚು, ವೆಚ್ಚಗಳ ಕುರಿತು ಸರಿಯಾದ ದಾಖಲೆಗಳನ್ನು ನಿರ್ವಹಣೆ ಮಾಡಬೇಕು ಎಂದರು.

ಅಲ್ಲದೇ ನಾಗರಿಕರಿಗೆ ಬ್ಯಾಂಕ್‌ಗಳಲ್ಲಿ ಸಿಗುವ ಸೌಲಭ್ಯಗಳು, ನಗದು ರಹಿತ ಮತ್ತು ಸಹಿತ ವ್ಯವಹಾರಗಳು, ಅಂಚೆ ಇಲಾಖೆಯ ನೂತನ ಯೋಜನೆಗಳು ಹಾಗೂ ವಿವಿಧ ರೀತಿಯ ವಿಮಾ ಯೋಜನೆಗಳ ಮಾಹಿತಿಯನ್ನು ನೀಡಿದರು.

ಇದೇ ವೇಳೆ ಕಾರ್ಯಾಗಾರದಲ್ಲಿ ಐಟಿಐ ನಂತರ ಸ್ವ-ಉದ್ಯೋಗಕ್ಕೆ ಬ್ಯಾಂಕ್‌ಗಳಲ್ಲಿ ದೊರೆಯುವ ಸಾಲ ಸೌಲಭ್ಯ ಮತ್ತು ಮರು ಪಾವತಿಗೆ ಸಿಗುವ ರಿಯಾಯತಿ ಹಾಗೂ ವಿವಿಧ ವಿಚಾರಗಳ ಮಾಹಿತಿ ನೀಡಿದರು.

ಮಹೇಶ ಬಡಿಗೇರ, ಸಿದ್ಧಲಿಂಗಯ್ಯಾ ಹಿರೇಮಠ, ವಿನಾಯಕ ಗವಳಿ, ಶೋಭಾ ಕಮ್ಮಾರ, ವಿಶಾಲಕುಮಾರ ಭಜಂತ್ರಿ ಸೇರಿದಂತೆ ಕಾಲೇಜಿನ 50ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಭಾಗವಹಿಸಿದ್ದರು. ಅಶೋಕ ಜಿಗಳೂರ ನಿರೂಪಿಸಿ, ವಂದಿಸಿದರು.