ರೈತರ ಮೇಲಿನ ಕೇಸ್‌ ವಾಪಸ್‌ ಘೋಷಣೆಗೆ ಹರ್ಷ

ಧಾರವಾಡ : ರೈತರ ಮೇಲೆ ದಾಖಲಾದ ಪ್ರಕರಣಗಳನ್ನು ವಾಪಸ್‌ ಪಡೆಯುವುದಾಗಿ ಘೋಷಿಸಿರುವ ಮುಖ್ಯಮಂತ್ರಿ ಬಿ.ಎಸ್‌.ಯಡಿಯೂರಪ್ಪ ನಿರ್ಧಾರವನ್ನು ಸ್ವಾಗತಿಸಿದ ಬಿಜೆಪಿ ರೈತಮೋರ್ಚಾ ಮುಖಂಡರು ಹಾಗೂ ಕಾರ್ಯಕರ್ತರು ನಗರದ ವಿವೇಕಾನಂದ ವೃತ್ತದಲ್ಲಿ ಸೋಮವಾರ ವಿಜಯೋತ್ಸವ ಆಚರಿಸಿದರು.

ಈ ವೇಳೆ ರೈತಮೋರ್ಚಾ ಜಿಲ್ಲಾಧ್ಯಕ್ಷ ಅರವಿಂದ ಏಗನಗೌಡರ ಮಾತನಾಡಿ,ರೈತರು ತಮ್ಮ ಹಕ್ಕಿಗಾಗಿ ಹೋರಾಟ ಮಾಡಿ ಹಲವಾರು ಪ್ರಕರಣಗಳನ್ನು ಎದುರಿಸುತ್ತಿದ್ದರು. ನ್ಯಾಯಾಲಯ, ಪೋಲೀಸ ಠಾಣೆಗೆ ಅಲೆದಾಡಿ ಹೈರಾಣಾಗಿ ಹೋಗಿದ್ದರು. ಇಂತಹದರಲ್ಲಿ ಮುಖ್ಯಮಂತ್ರಿಗಳು ತೆಗೆದುಕೊಂಡ ನಿರ್ಣಯ ಅಭಿನಂದನೀಯ ಎಂದರು.

ಒಂದೆಡೆ ಬರ ಇನ್ನೊಂದೆಡೆ ನೆರೆಹಾವಳಿಯಿಂದ ತತ್ತರಿಸಿದ್ದ ರೈತ ದಿಕ್ಕು ತೋಚದಂತಿರುವಾಗ ದಾಖಲಾದ ಕೇಸಿಗಾಗಿ ಎಲ್ಲ ಕೆಲಸ ಕಾರ್ಯಗಳನ್ನು ಬಿಟ್ಟು ಅಲೆಯುವುದೇ ಕೆಲಸವಾಗಿತ್ತು ಎಂದು ತಿಳಿಸಿದರು.

ಈ ಹಿಂದಿನ ಸರಕಾರಕ್ಕೂ ರೈತ ನಾಯಕರು ಕೇಸ್‌ ವಾಪಸ್‌ ಪಡೆಯುವಂತೆ ಮನವಿ ಮಾಡಿದರು ಯಾವುದೇ ಪ್ರಯೋಜನ ಆಗಿರಲಿಲ್ಲ. ರೈತ ನಾಯಕ ಯಡಿಯೂರಪ್ಪನವರಿಗೆ ಮನವಿ ಮಾಡಿಕೊಂಡ ತಕ್ಷ ಣವೇ ಎಲ್ಲ ಕೇಸುಗಳನ್ನು ವಾಪಸ್‌ ಪಡೆಯುವಂತೆ ಸೂಚಿಸಿದ್ದು,ರೈತರ ನೋವು ಒಬ್ಬ ರೈತನಾಯಕನಿಗೇ ಗೊತ್ತು ಎಂಬುದನ್ನು ಸಾಬೀತು ಪಡಿಸಿದ್ದಾರೆ. ಈ ಹಿನ್ನೆಲೆ ಮುಖ್ಯಮಂತ್ರಿಗಳಿಗೆ ಕರ್ನಾಟಕ ರಾಜ್ಯದ ಸಮಸ್ಥ ರೈತ ಹೋರಾಟಗಾರರ ಪರವಾಗಿ ಧನ್ಯವಾದಗಳನ್ನು ಸಲ್ಲಿಸಿದರು.

ಸ್ಲಮ್‌ ಮೋರ್ಚಾ ರಾಜ್ಯ ಉಪಾಧ್ಯಕ್ಷ ಈರೇಶ ಅಂಚಟಗೇರಿ,ಮುಖಂಡ ಪ್ರಕಾಶ ಗೋಡಬೋಲೆ ಮಾತನಾಡಿದರು. ಮೋಹನ ರಾಮದುರ್ಗ, ನಿಂಗನಗೌಡ ಪಾಟೀಲ, ಬಸವರಾಜ ಬಾಳಗಿ, ಲಲಿತ ಭಂಡಾರಿ, ರಾಖೇಶ ನಾಜರೆ, ಶಕ್ತಿ ಹಿರೇಮಠ, ರಾಜೇಶ ಚಾಂದಗುಡೆ, ರಮೇಶ ದೊಡವಾಡ, ಶಂಕರ ಶೆಳಕೆ, ಮಂಜು ನಡಟ್ಟಿ, ಸುನೀಲ ಮೋರೆ, ತಾನಾಜಿ ರೋಕಡೆ, ಗುರುನಾಥ ಗೌಡರ, ರವಿ ರಾಮದುರ್ಗ, ಸುನೀಲ ಸುತಗಟ್ಟಿ, ಬಸನಗೌಡ ಪಾಟೀಲ ಸೇರಿದಂತೆ ಇತರರು ಇದ್ದರು.