ಕಬ್ಬಿನ ಬಾಕಿ ಹಣ ನೀಡದಿದ್ದರೆ ಉಗ್ರ ಹೋರಾಟ

ಹುಬ್ಬಳ್ಳಿ : ಬೆಳಗಾವಿ ಅಧಿವೇಶನ ಪೂರ್ವದಲ್ಲಿಯೇ ಸಿಎಂ ಎಚ್‌.ಡಿ. ಕುಮಾರಸ್ವಾಮಿ ಸಕ್ಕರೆ ಕಾರ್ಖಾನೆ ಮಾಲೀಕರಿಂದ ಕಬ್ಬು ಬೆಳೆಗಾರರ 629 ಕೋಟಿ ರೂ. ಬಾಕಿ ಹಣ ಕೊಡಿಸಬೇಕು. ಇಲ್ಲದಿದ್ದರೆ ಉಗ್ರ ಸ್ವರೂಪದ ಹೋರಾಟ ಹಮ್ಮಿಕೊಳ್ಳಲಾಗವುದು ಎಂದು ರಾಜ್ಯ ಕಬ್ಬು ಬೆಳೆಗಾರರ ಸಂಘದ ಅಧ್ಯಕ್ಷ ಕುರುಬೂರ ಶಾಂತಕುಮಾರ್‌ ಎಚ್ಚರಿಸಿದರು.

ಶನಿವಾರ ರೈತರೊಂದಿಗೆ ಸಭೆ ನಡೆಸಿದ ನಂತರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ''ಈಗಾಗಲೇ ಮುಖ್ಯಮಂತ್ರಿಯವರು ಕಬ್ಬು ಬೆಳೆಗಾರರ ಜತೆ ಸಭೆ ನಡೆಸಿ ಅಧಿವೇಶನಕ್ಕೂ ಮುನ್ನ ಬಾಕಿ ಹಣ ಕೊಡಿಸುವ ಭರವಸೆ ನೀಡಿದ್ದರು. ಈ ನಿಟ್ಟಿನಲ್ಲಿ ಸಕ್ಕರೆ ಕಾರ್ಖಾನೆ ಮಾಲೀಕರೊಂದಿಗೆ ಸಭೆ ಸಹ ನಡೆಸಿ ಕಬ್ಬು ಬೆಳಗಾರರ ಬಾಕಿ ಸಂದಾಯ ಮಾಡುವಂತೆ ಸೂಚನೆ ಸಹ ನೀಡಿದ್ದಾರೆ. ಆದರೆ ಇದುವರೆಗೂ ರೈತರಿಗೆ ಹಣ ಬಂದಿಲ್ಲ'' ಎಂದು ದೂರಿದರು.

''ಅಧಿವೇಶನಕ್ಕೆ ಇನ್ನು ಕೇವಲ ಹತ್ತು ದಿನ ಮಾತ್ರ ಉಳಿದಿದ್ದು, ಕಾರ್ಖಾನೆ ಮಾಲೀಕರು ಕಬ್ಬಿನ ಬಾಕಿ ಹಣ ನೀಡುವ ಯಾವ ಲಕ್ಷಣವೂ ಕಾಣುತ್ತಿಲ್ಲ. ಡಿ. 8ರ ಒಳಗೆ ಬಾಕಿ ಹಣ ನೀಡದಿದ್ದರೆ ಡಿ. 9ರಂದು ಬೆಳಗಾವಿ ಜಿಲ್ಲಾಧಿಕಾರಿ ಕಚೇರಿ ಎದುರು ರಾಜ್ಯದ ರೈತ ಪದಾಧಿಕಾರಿಗಳು ಪ್ರತಿಭಟನೆ ನಡೆಸುವರು. ಈ ಹೋರಾಟಕ್ಕೂ ಸರಕಾರ ಮಣಿಯದಿದ್ದರೆ ಡಿ. 10ರಂದು ಉಗ್ರ ಚಳವಳಿ ನಡೆಸಲಾಗುವುದು. ಇದಕ್ಕೆ ಸರಕಾರವೇ ನೇರ ಹೊಣೆ ಆಗಲಿದೆ'' ಎಂದು ಎಚ್ಚರಿಕೆ ನೀಡಿದರು.

ಸುದ್ದಿಗೋಷ್ಠಿಯಲ್ಲಿ ವೀರನಗೌಡ ಪಾಟೀಲ, ತೇಜಸ್ವಿ ಪಟೇಲ, ಎಂ.ವಿ. ಗಾಡಿ, ಮಹಾಂತೇಶ ವಾಲಿ, ಸುರೇಶಗೌಡ ಪಾಟೀಲ, ರಮೇಶ ಹೂಗಾರ, ರಾಜು ಗುಂದಗಿ ಸೇರಿದಂತೆ ಇತರರು ಇದ್ದರು.