Hubli News: ಪಡೆಯದ ಸಾಲಕ್ಕೆ ಫೈನಾನ್ಸ್ ಕಂಪನಿಯಿಂದ ಕೋರ್ಟ್ ನೋಟಿಸ್; ಕಂಪನಿ ಕಚೇರಿಯ ಮುಂದೆ ಧರಣಿ!

ಹುಬ್ಬಳ್ಳಿ: ನಗರದಲ್ಲಿರುವ ಖಾಸಗಿ ಫೈನಾನ್ಸ್ ಕಂಪನಿಯೊಂದು, ಇಲ್ಲಿನ ರೈತರೊಬ್ಬರಿಗೆ ಸಾಲದ ಹೆಸರಿನಲ್ಲಿ ವಿನಾಕಾರಣ ಕಿರುಕುಳ ನೀಡಿರುವ ಘಟನೆಯೊಂದು ನಡೆದಿದೆ. ಇದನ್ನು ಖಂಡಿಸಿ, ರೈತರ ಸಮೂಹವೊಂದು ಫೈನಾನ್ಸ್ ಕಂಪನಿಯ ಮುಂದೆ ಪ್ರತಿಭಟನೆ ನಡೆಸಿದ್ದಾರೆ. ರೈತರ ಈ ಪ್ರತಿಭಟನೆ ನಡೆದಿರುವುದು ಹುಬ್ಬಳ್ಳಿಯ ಪಿಂಟೋ ರಸ್ತೆಯಲ್ಲಿರುವ ಆ ಫೈನಾನ್ಸ್‌ ಕಂಪನಿಯ ಕಚೇರಿಯಲ್ಲಿ. ಅಷ್ಟಕ್ಕೂ ರೈತರ ಈ ಧರಣಿಯ ಹಿಂದೆ ಫೈನಾನ್ಸ್ ಕಂಪನಿಯ ಸಿಬ್ಬಂದಿಯ ಬೇಜವಾಬ್ದಾರಿತನವಿದೆ ಎಂದು ರೈತರು ಆರೋಪಿಸಿದ್ದಾರೆ.

ಸಿಂದಗಿಯ ರೈತ ಸಿದ್ದಪ್ಪ ಪಡಶೆಟ್ಟಿ ಎನ್ನುವವರು ಈ ಫೈನಾನ್ಸ್‌ನಲ್ಲಿ 2015 ರಲ್ಲಿ ಟ್ರಾಕ್ಟರ್‌ಗಾಗಿ 5 ಲಕ್ಷ ರೂ. ಲೋನ್ ತೆಗೆದುಕೊಂಡಿದ್ದರಂತೆ. ಪ್ರತಿಯಾಗಿ ಸಾಲದ ಕಂತುಗಳಲ್ಲಿ ಲೋನನ್ನು ಕೂಡ ರೈತ ಸಿದ್ದಪ್ಪ ಕ್ಲಿಯರ್ ಮಾಡಿದ್ದಾರೆ. ಇದಕ್ಕೆ ಫೈನಾನ್ಸ್ ಕಂಪನಿ ರೈತ ಸಿದ್ದಪ್ಪನಿಗೆ ನೀವು ಮತ್ತ ಲೋನ್ ತೆಗೆದುಕೊಳ್ಳಿ ಎಂದು ಒತ್ತಾಯಿಸಿದೆಯಂತೆ. ಆಗ ಸಿದ್ದಪ್ಪ ಅವರಿಗೆ ಲೋನ್ ಅವಶ್ಯಕತೆ ಇಲ್ಲದಿರುವುದರಿಂದ ಬೇಡವೆಂದು ತಿರಸ್ಕಾರ ಮಾಡಿದ್ದಾರೆ.

ಹೀಗಿದ್ದರೂ ಫೈನಾನ್ಸ್ ಕಂಪನಿ ಸಿದ್ದಪ್ಪನಿಗೆ 75 ಸಾವಿರ ರೂ.ವನ್ನು ಆತನ ಸಾಲದ 2019ರಲ್ಲಿ ಖಾತೆಗೆ ಮರು ಜಮಾ ಮಾಡಿದ್ದರು. ಈ ವಿಚಾರ ತಮಗೆ ತಿಳಿಯುತ್ತಿದ್ದಂತೆ ಅದನ್ನು ಪ್ರಶ್ನಿಸಿ ಬ್ಯಾಂಕ್ ಸಿಬ್ಬಂದಿಗಳನ್ನು ಕೇಳಿದಾಗ ಸಮಸ್ಯೆಯನ್ನು ಸರಿ ಮಾಡಿರುವುದಾಗಿ ಸಿಬ್ಬಂದಿ ಆಶ್ವಾಸನೆ ನೀಡಿದ್ದರು. ಇದಾಗಿ, ನಾಲ್ಕು ವರ್ಷಗಳು ಕಳೆದಿದ್ದು, ಈಗ ಫೈನಾನ್ಸ್ ಕಂಪನಿಯು ಸಿದ್ದಪ್ಪನಿಗೆ ಐದು ಲಕ್ಷ ರೂ.ಗಳನ್ನು ಮರುಪಾವತಿ ಮಾಡುವಂತೆ ಕೋರ್ಟ್ ನೋಟಿಸ್ ನೀಡಿದೆ.

ಸಮಾಜದ ಕೆಳಸ್ತರದ ಕುಟುಂಬಗಳನ್ನು ಮೇಲಕ್ಕೆತ್ತಿ ಮುಖ್ಯವಾಹಿನಿಗೆ ತರುವ ಕೆಲಸ ಮಾಡಬೇಕು: ಪ್ರಹ್ಲಾದ್ ಜೋಶಿ
ಇನ್ನು ರೈತ ಸಿದ್ದಪ್ಪನ ಪರಿಸ್ಥಿತಿ ನೋಡಿದ ರೈತ ಸಂಘಟನೆ ಈಗ ಫೈನಾನ್ಸ್ ಕಚೇರಿ ಮುಂದೆ ಧರಣಿಗೆ‌ ನಿರ್ಧರಿಸಿದೆ. ರೈತರ ಆಕ್ರೋಶ ಹೆಚ್ಚಾಗುತ್ತಿದ್ದಂತೆ ಎಚ್ಚೆತ್ತ ಫೈನಾನ್ಸ್ ತನ್ನ ತಪ್ಪು ಒಪ್ಪಿಕೊಂಡಿದೆ. ಆದರೆ ತನ್ನ ಭಂಡತನವನ್ನು ಮುಂದುವರೆಸಿದ್ದು, ಸೆಪ್ಟೆಂಬರ್ 26 ರಂದು ನಡೆಯುವ ಕೋರ್ಟ್ ವಿಚಾರಣೆಯಲ್ಲಿ ಕೇಸ್ ಹಿಂಪಡೆಯುವ ಭರವಸೆ ನೀಡಿದೆ.‌ ಆದರೆ ಕಂಪನಿಯ ಈ‌ ನಾಟಕವನ್ನು ಒಪ್ಪದ ರೈತರು ಈ ಕೂಡಲೇ ಕೇಸ್ ವಾಪಸು ಪಡೆಯಬೇಕೆಂದು ಒತ್ತಾಯಿಸುತ್ತಿದ್ದಾರೆ.

ಈ ಘಟನೆಯಿಂದ ರೈತರು ಎಚ್ಚೆತ್ತುಕೊಳ್ಳಬೇಕು. ಖಾಸಗಿ ಫೈನಾನ್ಸ್ ಕಂಪನಿಗಳಲ್ಲಿ ವ್ಯವಹಾರ ನಡೆಸುವಾಗ ಎಚ್ಚರಿಕೆಯಿಂದ ಇರಬೇಕು. ಸಾಲವನ್ನಾಗಲೀ, ಕಂತು ಕಟ್ಟಿದ್ದಕ್ಕಾಗಲಿ ಅಥವಾ ಸಾಲ ತೀರಿಸಿದ ಮೇಲಾಗಲೀ ಅದಕ್ಕೆ ಸಂಬಂಧಿಸಿದ ದಾಖಲೆಗಳನ್ನು ಪಡೆಯಬೇಕು ಎಂದು ರೈತ ಸಂಘಟನೆ ಕಿವಿಮಾತು ಹೇಳಿದೆ.