ಫೇಸ್‌ಬುಕ್‌ನಲ್ಲಿ ಪರಿಚಯ, 15.95 ಲಕ್ಷ ರೂ. ವಂಚನೆ

ಹುಬ್ಬಳ್ಳಿ: ಫೇಸಬುಕ್‌ನಲ್ಲಿ ಪರಿಚಯವಾದ ಮಹಿಳೆಗೆ ಮದುವೆಯಾಗುವುದಾಗಿ ನಂಬಿಸಿ ಹಾಗೂ ಅವರಿಗೆ ಇರುವ ಕ್ಯಾನ್ಸರ್‌ ಕಾಯಿಲೆಗೆ ಹಣಕಾಸಿನ ಸಹಾಯ ಮಾಡುವುದಾಗಿ ಹೇಳಿ 15.95 ಲಕ್ಷ ರೂ. ವಂಚಿಸಿರುವ ಘಟನೆ ನಗರದ ಗದಗ ರೋಡ್‌ ಪ್ರದೇಶದಲ್ಲಿ ನಡೆದಿದೆ.

ಕೆನ್ನತ್‌ ಜೆಫ್‌ ಎಂಬುವರೇ ವಂಚನೆ ಮಾಡಿದ್ದು, ಇವರು ಹುಬ್ಬಳ್ಳಿ ಮಹಿಳೆಗೆ ಫೇಸಬುಕ್‌ನಲ್ಲಿ ಪರಿಚಯವಾಗಿದ್ದರು. ಅಲ್ಲದೇ ಮಹಿಳೆಗೆ ಇರುವ ಕ್ಯಾನ್ಸರ್‌ಗೆ ಹಣ ನೀಡುವುದಾಗಿ ಹೇಳಿದ್ದಾರೆ. ಅಲ್ಲದೇ ಅವರ ವಿಳಾಸದ ಮಾಹಿತಿ ಪಡೆದು ಗಿಫ್ಟ್‌ ಕಳುಹಿಸಿದ್ದೇನೆ. ಅದನ್ನು ಪಡೆದುಕೊಳ್ಳಲು ತಿಳಿಸಿದ್ದಾರೆ.

ಅದಾದ ನಂತರ ಮೊಬೈಲ್‌ ಮೂಲಕ ಇನ್ನೊಬ್ಬ ವ್ಯಕ್ತಿ ಸಂಪರ್ಕ ಮಾಡಿ ದೆಹಲಿ ಏರ್‌ಫೋರ್ಟ್‌ ಕಸ್ಟಮ್ಸ್‌ ಅಧಿಕಾರಿ ಎಂದು ಪರಿಚಯ ಮಾಡಿಕೊಂಡು, ಗಿಫ್ಟ್‌ನ್ನು ಮನೆ ವಿಳಾಸಕ್ಕೆ ಕಳುಹಿಸಿ ಕೊಡಲು ಕಸ್ಟಮ್ಸ್‌ ಚಾರ್ಚ್ ಹಾಗೂ ಬೇರೆ ರೀತಿಯ ಚಾರ್ಚ್‌ ಅಂತ ಹೇಳಿ ಬೇರೆ ಬೇರೆ ಖಾತೆಗಳ ನಂಬರ್‌ ನೀಡಿ 15.95 ಲಕ್ಷ ರೂ. ಜಮಾ ಮಾಡಿಸಿಕೊಂಡಿದ್ದಾರೆ. ಮರಳಿ ಯಾವುದೇ ಗಿಫ್ಟ್‌ ಅನ್ನು ನೀಡದೇ, ಹಣವನ್ನು ವಾಪಸ್‌ ನೀಡದೇ ವಂಚನೆ ಮಾಡಿದ್ದಾರೆ ಎಂದು ಮಹಿಳೆ ದೂರಿನಲ್ಲಿ ತಿಳಿಸಿದ್ದಾರೆ. ಸೈಬರ್‌ ಕ್ರೈಂ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿದೆ.

ಅಂಗಡಿ ಕಳ್ಳತನ: ನಗರದ ಟೆಕ್ನೋ ಟ್ರೇಡಿಂಗ್‌ ಕಂಪನಿ ಅಂಗಡಿ ಕೀಲಿ ಮುರಿದು 77 ಸಾವಿರ ರೂ. ಮೌಲ್ಯದ ವಾಸಿಂಗ್‌ ಮಶೀನ್‌, ಏರ್‌ ಕಾಂಪ್ರೆಸ್ಸರ್‌ ಸೇರಿದಂತೆ ವಿವಿಧ ವಸ್ತುಗಳ ಕಳ್ಳತನ ಮಾಡಿರುವ ಘಟನೆ ಎಚ್‌ಡಿಎಂಸಿ ಎದುರಿನ ನರಪಾಲ್‌ ಬಿಲ್ಡಿಂಗ್‌ನಲ್ಲಿ ನಡೆದಿದೆ. ಮಯೂರಿ ಗಾರ್ಡನ್‌ನ ಚಂದ್ರಶೇಖರ ಮಟ್ಟಿ ಎಂಬುವರ ಅಂಗಡಿ ಕಳ್ಳತನವಾಗಿದೆ. ಉಪನಗರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.