ಮದೀನಾ ಮಸೀದಿಯಲ್ಲಿ ಸೌಹಾರ್ದ ಇಫ್ತಿಯಾರ ಕೂಟ

ಹುಬ್ಬಳ್ಳಿ : ಇಲ್ಲಿನ ಶಬರಿನಗರದ ಮದೀನಾ ಮಸೀದಿಯಲ್ಲಿ ಶನಿವಾರ ಅನ್ಯಧರ್ಮಿಯರಿಗಾಗಿಯೇ ವಿಶೇಷ ಸೌಹಾರ್ದ ಇಫ್ತಿಯಾರ ಕೂಟ ನಡೆಯಿತು.

ರಂಜಾನ್‌ ಆಚರಣೆ, ಉಪವಾಸದ ಮಹತ್ವ, ಇಫ್ತಿಯಾರ್‌ ಕೂಟ ಎಂದರೇನು ಎಂಬುದನ್ನು ಇತರ ಧರ್ಮಿಯರಿಗೆ ತಿಳಿಸಿಕೊಡುವ ಉದ್ದೇಶದಿಂದಲೇ ಸೌಹಾರ್ದ ಇಫ್ತಿಯಾರ ಕೂಟ ಆಯೋಜಿಸಲಾಗಿತ್ತು.

ಈ ಸಂದರ್ಭದಲ್ಲಿ ಮಂಗಳೂರಿನ ಮೌಲಾನಾ ಸೂಫಿಯಾನ್‌ ಮಾತನಾಡಿ, ಎಲ್ಲ ವರ್ಗ, ಜಾತಿ, ಧರ್ಮ, ಪಂಥದ ಜನರು ಒಗ್ಗಟ್ಟಾಗಿ ಭಾವೈಕ್ಯ ಮತ್ತು ಸೌಹಾರ್ದದಿಂದ ಜೀವನ ಸಾಗಿಸುವ ಮೂಲಕ ಮುಂದಿನ ಪೀಳಿಗೆಗೆ ಮಾದರಿ ಆಗಬೇಕು ಎಂದರು.

ಮಾಜಿ ಸಿಎಂ ಜಗದೀಶ ಶೆಟ್ಟರ್‌ ಮಾತನಾಡಿ, ಸೌಹಾರ್ದಯುತ ಬದುಕು ನಮ್ಮದಾಗಿದ್ದರೆ, ದೇಶದ ಭದ್ರತೆಯೂ ಹೆಚ್ಚಾಗಿರುತ್ತದೆ ಎಂದರು. ಸುಂದರ ಮತ್ತು ಸೌಹಾರ್ದ ವಾತಾವರಣ ನಿರ್ಮಾಣವಾಗಿದ್ದರೆ, ನೆಮ್ಮದಿ ಜೀವನ ದೊರೆಯುತ್ತದೆ ಎಂದರು.

ಸಿ.ಎಚ್‌. ಮೆಹಬೂಬಪಾಷಾ, ಶಾಕೀರ ಸನದಿ, ಅಶ್ರಫ್‌ ಅಲೀ, ಫಿರಾಜೀ ಖಂಡೇಕರ, ಜವಳಿ, ಬೀರಪ್ಪ ಖಂಡೇಕಾರ, ಮೋಹನ ಗುರುಸ್ವಾಮಿ ಸೇರಿದಂತೆ ಇತರರು ಇದ್ದರು.