ಬರದ್ವಾಡಕ್ಕೆ ಗ್ರಾಪಂ ಕೇಂದ್ರ ಸ್ಥಾನ ಕೊಡಿ : ಸಚಿವ ಶಿವಳ್ಳಿಗೆ ಘೇರಾವ್‌

ಕುಂದಗೋಳ : ಕೊಡ್ಲಿವಾಡ ಗ್ರಾಮ ಸೇರಿಸಿ ಕೂಡಲೇ ಗ್ರಾಮಕ್ಕೆ ಪಂಚಾಯಿತಿ ಕೇಂದ್ರ ಸ್ಥಾನ ಕೊಡಬೇಕು ಎಂದು ಆಗ್ರಹಿಸಿ ತಾಲೂಕಿನ ಬರದ್ವಾಡ ಗ್ರಾಮಸ್ಥರು ರಾಜ್ಯ ಪೌರಾಡಳಿತ ಸಚಿವ ಸಿ.ಎಸ್‌.ಶಿವಳ್ಳಿ ಅವರಿಗೆ ಸೋಮವಾರ ಘೇರಾವ್‌ ಹಾಕಿದರು.

ಈಗಾಗಲೇ ಈ ಗ್ರಾಮದಲ್ಲಿ ಪಂಚಾಯಿತಿ ಸ್ಥಾಪನೆಯಾಗಬೇಕೆಂಬ ಬೇಡಿಕೆಗೆ ಜಿಲ್ಲಾಧಿಕಾರಿಗಳ ಅನುಮೋದನೆ ದೊರಕಿದೆ. ಅಲ್ಲದೇ ಪಂಚಾಯತ ರಾಜ್‌ ಇಲಾಖೆಯಿಂದಲೂ ಒಪ್ಪಿಗೆ ಸಿಕ್ಕಿದೆ. ಹೀಗಿದ್ದಾಗೂ ನೀವು ಏಕೆ ನಮ್ಮ ಗ್ರಾಮ ನಿರ್ಲಕ್ಷಿಸುತ್ತಿದ್ದೀರಿ ಎಂದು ಗ್ರಾಮಸ್ಥರು ಸಚಿವರಿಗೆ ಪ್ರಶ್ನಿಸಿದರು.

ಇದಕ್ಕೆ ಉತ್ತರಿಸಿದ ಸಚಿವ ಶಿವಳ್ಳಿ 'ನನ್ನ ತಾಲೂಕಿಗೆ ಹೆಚ್ಚಿನ ಪಂಚಾಯತಿ ಕೇಂದ್ರ ಸಿಗುತ್ತಿದೆ ಎಂದರೆ ನಾನೇಕೆ ಬಿಡಲಿ? ನಿಮ್ಮ ಗ್ರಾಮಕ್ಕೆ ಪಂಚಾಯತಿ ಸಿಗಲೆಂದು ನಾನೂ ಪ್ರಯತ್ನಿಸುತ್ತಿದ್ದೇನೆ 'ಎಂದು ಹೇಳಿದಾಗ ಗ್ರಾಮಸ್ಥರು ನಮ್ಮ ಗ್ರಾಮಕ್ಕೆ ಮುಖ್ಯವಾಗಿ ಬೇಕಾದ ಪಂಚಾಯಿತಿಯನ್ನು ನೀಡಿದ ನಂತರವೇ ನಿಮನ್ನು ಗೌರವಿಸುತ್ತೇವೆ ಎಂದು ಹೇಳಿದರು. ಇದಕ್ಕೆ ಪ್ರತಿಯಾಗಿ ಸಚಿವರು ಈ ಕಾರ್ಯ ಆದಷ್ಟು ಬೇಗ ಆಗುವಂತೆ ಪ್ರಾಮಾಣಿಕ ಪ್ರಯತ್ನ ಮಾಡುತ್ತೇನೆ ಎಂದು ಭರವಸೆ ನೀಡಿದಾಗ ಗ್ರಾಮಸ್ಥರು ಸಚಿವರಿಗೆ ಜೈಕಾರ ಕೂಗಿದರು.

ಸಚಿವ ಸಿ.ಎಸ್‌.ಶಿವಳ್ಳಿ ಅವರು ಕೊಡ್ಲಿವಾಡ-ಬರದ್ವಾಡ ರಸ್ತೆ ಮಧ್ಯದ ಮೇಲ್ಸೆತುವೆ ,ಬರದ್ವಾಡ-ಹಿರೇಗುಂಜಳ ರಸ್ತೆ ಮಧ್ಯದ ಕೆಳಸೇತುವೆ ಮೇಲ್ದರ್ಜೆಗೇರಿಸುವ ಕಾಮಗಾರಿ ಸೇರಿದಂತೆ ನಾನಾ ಅಭಿವೃದ್ಧಿ ಕಾಮಗಾರಿಗಳಿಗೆ ಭೂಮಿ ಪೂಜೆ ನೆರವೇರಿಸಲು ಬರದ್ವಾಡಕ್ಕೆ ಬಂದಾಗ ಗ್ರಾಮಸ್ಥರು ಆಕ್ರೋಶಿತರಾಗಿ ಸಚಿವರಿಗೆ ಘೇರಾವ ಹಾಕಿದರು.