ಪ್ರಚಾರಪ್ರಿಯ ಸಂಸ್ಥೆಗಳಿಗೆ ಅನುದಾನ: ಸಿಂಘಿ ಬೇಸರ

ಹುಬ್ಬಳ್ಳಿ : ಪ್ರಾಮಾಣಿಕವಾಗಿ ಬಡವರ ಹಾಗೂ ನಿರ್ಗತಿಕರ ಪರವಾಗಿ ಸೇವೆ ಸಲ್ಲಿಸುವ ಸಂಘ-ಸಂಸ್ಥೆಗಳಿಗೆ ಸರಕಾರಗಳು ಅನುದಾನ ನೀಡದೇ, ಕೇವಲ ಪ್ರಚಾರಕ್ಕಾಗಿ ಕೆಲಸ ಮಾಡುವ ಸಂಸ್ಥೆಗಳಿಗೆ ಅನುದಾನ ನೀಡುತ್ತವೆ ಎಂದು ಮಹಾವೀರ್‌ ಲಿಂಬ ಸೆಂಟರ್‌ ಅಧ್ಯಕ್ಷ ಮಹೇಂದ್ರ ಸಿಂಘಿ ಅಸಮಾಧಾನ ವ್ಯಕ್ತಪಡಿಸಿದರು.

ನಗರದ ಕಿಮ್ಸ್‌ ಆವರಣದಲ್ಲಿರುವ ಮಹಾವೀರ ಲಿಂಬ್‌ ಸೆಂಟರ್‌ನಲ್ಲಿ ಹಮ್ಮಿಕೊಂಡಿದ್ದ ಕೃತಕ ಕಾಲು ಜೋಡಣಾ ಶಿಬಿರದಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು.

ಸರಕಾರಗಳು ಸೇವಾ ಸಂಸ್ಥೆಗಳಿಗೆಂದು ಪ್ರತಿವರ್ಷವೂ ನೂರಾರು ಕೋಟಿ ಅನುದಾನವನ್ನು ಮೀಸಲಿಡುತ್ತದೆ. ಆದರೆ ಅದನ್ನು ಪ್ರಾಮಾಣಿಕವಾಗಿ ಸೇವೆ ಸಲ್ಲಿಸುವ ಸಂಸ್ಥೆಗಳಿಗೆ ನೀಡದೇ ಅನ್ಯಾಯ ಮಾಡುತ್ತಿವೆ ಎಂದು ದೂರಿದರು.

ಈಗಾಗಲೇ ಮಂಗಳೂರು, ಹೈದರಬಾದ, ಮುಂಬೈ ಹಾಗೂ ಹುಬ್ಬಳ್ಳಿಯಲ್ಲಿ ಮಹಾವೀರ ಲಿಂಬ್‌ ಸೆಂಟರ್‌ ಸೇವೆ ಸಲ್ಲಿಸುತ್ತಿದೆ. ಲಿಂಬ್‌ ಸೆಂಟರ್‌ ಕಾರ್ಯವ್ಯಾಪ್ತಿಯನ್ನು ವಿಸ್ತರಣೆ ಮಾಡುವ ಯೋಜನೆ ಹಾಕಿಕೊಳ್ಳಲಾಗಿದೆ ಎಂದು ತಿಳಿಸಿದರು.

ಮೇಘರಾಜ ಬಲಘಟ್‌, ಮಹಾವೀರ ಪಿ., ಪ್ರಕಾಶ ಬಾಪಣ, ಕೇಸರಿಚಂದ ಗೋಲೇಚ, ಸುರೇಶ ಮೆಹ್ತಾ, ಮಹೇಂದ್ರ ಜೈನ,ದಿನೇಶ ಸಿಂಘ್ವಿ, ರಮೇಶ ಓಸ್ತವಾಲ್‌ ಸೇರಿದಂತೆ ಅನೇಕರು ಹಾಜರಿದ್ದರು.

20 ಜನರಿಗೆ ಕೃತಕ ಕಾಲು ಜೋಡನೆ... : ಶಿಬಿರದಲ್ಲಿ 20 ಜನರಿಗೆ ಕೃತಕ ಕಾಲು ಜೋಡಿಸಲಾಯಿತು. ಗೋಪನಕೊಪ್ಪದ ಎಂಟು ವರ್ಷದ ಬಾಲಕಿ ಸರಸ್ವತಿಗೆ ಬಾಲ್ಯದಿಂದಲೇ ಒಂದು ಕಾಲು ಕಳೆದುಕೊಂಡಿದ್ದಳು. ಆಕೆಗೆ ಶಿಬಿರದಲ್ಲಿ ಕೃತಕ ಕಾಲು ಜೋಡಿಸಲಾಯಿತು.