ಹುಬ್ಬಳ್ಳಿ: ಶಾಸಕ ಅಬ್ಬಯ್ಯ ಕೊರೊನಾದಿಂದ ಗುಣಮುಖ, ಡಿಸ್‌ಚಾರ್ಜ್‌

ಹುಬ್ಬಳ್ಳಿ: ಕೊರೊನಾ ಜನರು ಭಾವಿಸಿರುವಂತೆ ಮಹಾಮಾರಿ ರೋಗವಲ್ಲ. ಹಾಗಂತ ಅದರ ಕುರಿತು ದಿವ್ಯ ನಿರ್ಲಕ್ಷ್ಯ ವಹಿಸುವುದೂ ಸರಿಯಲ್ಲಎಂದು ಶಾಸಕ ಪ್ರಸಾದ ಅಬ್ಬಯ್ಯ ತಿಳಿಸಿದ್ದಾರೆ.

ಕೊರೊನಾ ಸೋಂಕಿನಿಂದ ಗುಣಮುಖರಾಗಿ ಭಾನುವಾರ ಆಸ್ಪತ್ರೆಯಿಂದ ಬಿಡುಗಡೆ ಹೊಂದಿ ಮನೆಗೆ ಹಿಂದಿರುಗಿರುವ ಅವರು ಜನರಿಗೆ ಒಂದಷ್ಟು ಮಾಹಿತಿ ನೀಡಿದ್ದಾರೆ.

''ಸೋಂಕು ದೃಢಪಟ್ಟಾಗ ಆರಂಭದಲ್ಲಿ ನಾನೂ ಸಹ ಸಾಮಾನ್ಯರಂತೆ ಸಹಜವಾಗಿ ಭಯಭೀತನಾಗಿ ಆತಂಕಕ್ಕೊಳಗಾಗಿದ್ದೆ. ಆದರೆ, ಕಿಮ್ಸ್‌ನಲ್ಲಿ ಉತ್ತಮ ಚಿಕಿತ್ಸೆ, ಅಲ್ಲಿನ ವೈದ್ಯರ ಸಲಹೆ, ಮಾರ್ಗದರ್ಶನದಿಂದಾಗಿ ಕೊರೊನಾ ಸೋಂಕು ಹೊರಗಿನ ಜನರು ತಿಳಿದುಕೊಂಡಷ್ಟು ಭಯಾನಕವಲ್ಲಎಂಬ ಭಾವನೆ ಮೂಡಿತು'' ಎಂದು ತಮ್ಮ ಅನುಭವ ಹಂಚಿಕೊಂಡಿದ್ದಾರೆ.

''ಇದೊಂದು ಸಾಮಾನ್ಯ ಜ್ವರ, ಶೀತದಂಥ ಕಾಯಿಲೆಯಾಗಿದೆ. ಜನರು ಕೊರೊನಾ ಕುರಿತಾಗಿ ಅನಗತ್ಯ ಆತಂಕ ಪಡಬೇಕಿಲ್ಲ. ಆತ್ಮಸ್ಥೈರ್ಯವಿದ್ದರೆ ಎಂಥ ಕಾಯಿಲೆಗಳನ್ನು ಸಹ ಗೆದ್ದು ಬರಬಹುದಾಗಿದೆ. ಇನ್ನೆರಡು ದಿನದಲ್ಲಿಕುಟುಂಬದ ಎಲ್ಲಾ 13 ಸದಸ್ಯರೂ ಸಹ ಬಿಡುಗಡೆ ಹೊಂದಲಿದ್ದಾರೆ'' ಎಂದಿದ್ದಾರೆ.

ಖಾಸಗಿ ಆಸ್ಪತ್ರೆಗಳ ವಿರುದ್ಧ ಆಕ್ರೋಶ

''ಕುಟುಂಬದ ಕೆಲ ಸದಸ್ಯರಿಗೆ ಸೋಂಕು ತಗುಲಿದಾಗ ಆರಂಭದಲ್ಲಿ ಕಿಮ್ಸ್‌ನಲ್ಲಿ ಬೆಡ್‌ ಖಾಲಿ ಇರಲಿಲ್ಲ. ಆಗ ಅವರನ್ನು ಗೋಕುಲ ರಸ್ತೆಯ ಅಸ್ಪತ್ರೆಯಲ್ಲಿ ದಾಖಲಿಸಲಾಯಿತು. ಆದರೆ, ಸರಕಾರದ ನಿರ್ದೇಶನವಿದ್ದರೂ ಎರಡು ದಿನ ವೈದ್ಯರು ಚಿಕಿತ್ಸೆ ನೀಡಲಿಲ್ಲ. ಅಲ್ಲದೇ ದುಬಾರಿ ಬಿಲ್‌ ನೀಡಿದ್ದು, ಇದು ಅತ್ಯಂತ ಬೇಜವಾಬ್ದಾರಿತನವಾಗಿದೆ'' ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.