ಹುಬ್ಬಳ್ಳಿ ಐಎಂಎ ಶಾಖೆ ಚಾಂಪಿಯನ್‌

ಹುಬ್ಬಳ್ಳಿ : ನಗರದ ಬಿವಿವಿ ಮೈದಾನದಲ್ಲಿ ಐಎಂಎ ಕರ್ನಾಟಕ ಶಾಖೆ ವತಿಯಿಂದ ಸೋಮವಾರ ನಡೆದ ರಾಜ್ಯ ಮಟ್ಟದ ಕ್ರೀಡಾಕೂಟದಲ್ಲಿ ಎಲ್ಲ ವಿಭಾಗದ ಗುಂಪು ಸ್ಪರ್ಧೆಯಲ್ಲಿ ಉತ್ತಮ ಪ್ರದರ್ಶನ ತೋರಿದ ಹುಬ್ಬಳ್ಳಿ ಐಎಂಎ ಶಾಖೆ ಸಮಗ್ರ ಚಾಂಪಿಯನ್‌ ಪ್ರಶಸ್ತಿ ಮುಡಿಗೇರಿಸಿಕೊಂಡರೆ, ಬೆಳಗಾವಿಯ ಐಎಂಎ ಶಾಖೆ ರನ್ನರ್‌ ಆಪ್‌ ಆಗಿ ಹೊರಹೊಮ್ಮಿದೆ.

ಸ್ಪರ್ಧಾ ವಿಜೇತರು:

ವೈಯಕ್ತಿಕ ವಿಭಾಗ: 50 ವರ್ಷ ಮೇಲ್ಪಟ್ಟ ಪುರುಷರ ವಿಭಾಗದಲ್ಲಿ ಬೆಳಗಾವಿಯ ಐಎಂಎ ಶಾಖೆಯ ಡಾ.ಮಿಲಿಂದ್‌ ಹಲಗೇಕರ್‌ (ಪ್ರ), 50 ವರ್ಷದೊಳಗಿನ ವಿಭಾಗದ ಸ್ಪರ್ಧೆಯಲ್ಲಿ ಹುಬ್ಬಳ್ಳಿ ಐಎಂಎ ಶಾಖೆಯ ಡಾ.ಅರುಣ ವಿ.ಎಳಮಲಿ ಹಾಗೂ 50 ವರ್ಷದೊಳಗಿನ ಮಹಿಳೆಯರ ವಿಭಾಗದಲ್ಲಿ ಡಾ.ಉಜ್ವಲಾ ಹಲಗೇಕರ್‌ (ಪ್ರ) ಸ್ಥಾನ ಪಡೆದುಕೊಂಡರು.

ಕ್ರೀಡಾಕೂಟದಲ್ಲಿ 5 ಕಿ.ಮೀ, 1500 ಮೀಟರ್‌, 800 ಮೀ, 400 ಮೀ, 200 ಮೀ ಹಾಗೂ 100 ಮೀಟ್‌ರ ಓಟ ಹಾಗೂ ಶಾರ್ಟ್‌ಪುಟ್‌ ಮತ್ತು ಜಾವಲಿನ್‌ ಥ್ರೋ ಸ್ಪರ್ಧೆಗಳು ನಡೆದವು. ರಾಜ್ಯದ ಮಂಗಳೂರು, ಬೆಳಗಾವಿ, ಮುಧೋಳ, ಗದಗ, ಭದ್ರಾವತಿ, ಶಿವಮೊಗ್ಗ, ಬಳ್ಳಾರಿ, ಕೋಲಾರ, ಹು-ಧಾ ಸೇರಿದಂತೆ ವಿವಿಧ ಭಾಗದ 30 ರಿಂದ 76 ವರ್ಷದೊಳಗಿನ ಉತ್ಸಾಹಿ ವೈದ್ಯರು ಕ್ರೀಡಾಕೂಟದಲ್ಲಿ ಭಾಗವಹಿಸಿದ್ದರು.

ಹಿರಿಯ ಕ್ರೀಡಾಪಟುಗಳಾದ ಡಾ.ಪ್ರಭಾಕರ್‌ ಜಾಟರ್‌, ಡಾ.ಟಿ.ಜಿ. ಪಾಟೀಲ, ಡಾ.ರಡ್ಡೆರ್‌, ಡಾ.ತಿಪ್ಪಾ ರೆಡ್ಡಿ, ಡಾ.ಅಭಯ ಮಟಕರ್‌, ಡಾ.ಎಸ್‌.ಪಿ. ಬಳಿಗಾರ ಭಾಗವಹಿಸಿದ್ದರು.

ಅದಕ್ಕೂ ಮುನ್ನ ನಡೆದ ಕಾರ್ಯಕ್ರಮದಲ್ಲಿ ಕ್ರೀಡಾಕೂಟವನ್ನು ಐಎಂಎ ಕರ್ನಾಟಕ ರಾಜ್ಯಾಧ್ಯಕ್ಷ ಡಾ.ಅನ್ನದಾನಿ ಮೇಟಿ ಉದ್ಘಾಟಿಸಿದರು. ಐಎಂಎ ರಾಜ್ಯ ಶಾಖೆಯ ಮುಖ್ಯಸ್ಥ ಡಾ.ಮಹೇಶಕುಮಾರ ಶಂಕರ್‌ ಸೇರಿದಂತೆ ಅನೇಕರು ಇದ್ದರು.