ಜಾಗ ಗುರುತಿಸಿ ಶೆಡ್‌ ನಿರ್ಮಿಸಲು ಪ್ರಸ್ತಾವನೆ ಸಲ್ಲಿಸಿ: ನಾಯಕ

ಧಾರವಾಡ : ಸ್ವಯಂ ಉದ್ಯೋಗ ಪ್ರಾರಂಭಿಸುವವರು ಕೆಐಎಡಿಬಿ ನಿವೇಶನ ಪಡೆಯುವುದು ಕಷ್ಟ. ಹೀಗಾಗಿ ನಾವೇ ಜಾಗ ಗುರುತಿಸಿ ಶೆಡ್‌ ನಿರ್ಮಿಸಿದರೆ ಅವರಿಗೆ ಅನುಕೂಲವಾಗಲಿದೆ. ಇದಕ್ಕೆ ಪ್ರಸ್ತಾವನೆ ಸಲ್ಲಿಸುವಂತೆ ಸಿಡಾಕ್‌ ಹಾಗೂ ಹು-ಧಾ ಜಿಟಿಟಿಸಿ ಅಧಿಕಾರಿಗಳಿಗೆ ಕೌಶಲಭಿವೃದ್ಧಿ ಮತ್ತು ಉದ್ಯಮಶೀಲತೆ ಜೀವನೋಪಾಯ ಖಾತೆ ಸಚಿವ ಸಚಿವ ಪಿ.ಟಿ. ಪರಮೇಶ್ವರ ನಾಯಕ ಸೂಚಿಸಿದರು.

ನಗರದ ಕರ್ನಾಟಕ ಉದ್ಯಮಶೀಲತಾಭಿವೃದ್ಧಿ ಕೇಂದ್ರದಲ್ಲಿ (ಸಿಡಾಕ್‌) ಬುಧವಾರ ಸಿಡಾಕ್‌ ಹಾಗೂ ಹು-ಧಾ ಜಿಟಿಟಿಸಿ (ಗೌರ್ನಮೆಂಟ್‌ ಟೂಲ್‌ರೂಂ ಆ್ಯಂಡ್‌ ಟ್ರೈನಿಂಗ್‌ ಸೆಂಟರ್‌) ಅಧಿಕಾರಿಗಳೊಂದಿಗೆ ನಡೆದ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ಮಾತನಾಡಿದರು.

ತರಬೇತಿ ಪಡೆದು ಸ್ವಯಂ ಉದ್ಯೋಗ ನಡೆಸುವವರಿಗೆ ಕೆಎಎಸ್‌ಎಫ್‌ಸಿ ಸದ್ಯ ನೀಡುತ್ತಿರುವ ಶೇ.70ರಷ್ಟು ಹಣವನ್ನು ಶೇ. 90ಕ್ಕೆ ಏರಿಸಲು ಪ್ರಸ್ತಾವನೆ ಸಲ್ಲಿಸಲಾಗಿದೆ. ಸಂಸ್ಥೆಯಲ್ಲಿ ಇನ್ನೂ ಹೆಚ್ಚಿನ ಸುಧಾರಣೆ ಆಗಬೇಕಾಗಿದೆ. ತರಬೇತಿ ಪಡೆದು ಉದ್ಯೋಗ ಪ್ರಾರಂಭಿಸುವವರ ಸಂಖ್ಯೆ ಹೆಚ್ಚಾಗಬೇಕು ಎಂದರು.

ಸಂಸ್ಥೆಗೆ ಬರುವ ಅಭ್ಯರ್ಥಿಗಳಿಗೆ ಉದ್ಯಮದ ಬಗ್ಗೆ ಸಮಗ್ರ ಮಾಹಿತಿ ನೀಡುವ ಕೆಲಸವಾಗಬೇಕು. ಟೆಕ್ನಿಕಲ್‌ ಹಾಗೂ ನಾನ್‌ ಟೆಕ್ನಿಕಲ್‌ ಅಭ್ಯರ್ಥಿಗಳಿಗೆ ಒಟ್ಟಿಗೆ ತರಬೇತಿ ನೀಡದೆ ಪ್ರತ್ಯೇಕವಾಗಿ ನಡೆಸಿದರೆ ನಮ್ಮ ಉದ್ದೇಶ ಸಫಲವಾಗಲಿದೆ. ಇನ್ನು ಅಲ್ಪಾವಧಿಯ ತರಬೇತಿಗಳ ಅವಧಿ ಹೆಚ್ಚಿಸಿದರೆ ಉದ್ಯೋಗದ ಬಗ್ಗೆ ಸಮಗ್ರ ಮಾಹಿತಿ ನೀಡಲು ಸಾಧ್ಯ. ಈ ಬಗ್ಗೆ ಅಧಿಕಾರಿಗಳು ಚಿಂತನೆ ನಡೆಸಬೇಕು ಎಂದು ಹೇಳಿದರು.

ಸಿಡಾಕ್‌ ನಿರ್ದೇಶಕ ಬಿ.ಎಂ. ಗೋಟೂರ, ಜಿಟಿಟಿಸಿ ವ್ಯವಸ್ಥಾಪಕ ನಿರ್ದೇಶಕ ಎಚ್‌. ರಾಘವೇಂದ್ರ ಸೇರಿದಂತೆ ಮತ್ತಿತರ ಅಧಿಕಾರಿಗಳು ಸಭೆಯಲ್ಲಿದ್ದರು.